Eusko Jaurlaritzak 20 milioi eurora arte handitu du aurrekontua ETE-etan berrikuntza bultzatzeko
Eusko Jaurlaritzak handitu egin du Fast Track Innobideak laguntza-programaren deialdi berriaren aurrekontua, 20 milioi euroraino, enpresa txiki eta ertainen berrikuntza bultzatzeko. Neurri hori Pradales Lehendakariak deitutako Industria Babesteko Taldeak egindako bileraren ondoren hartu da. Horren bidez, Industria Sailak Euskadiko ETEak dibertsifikatu eta eraldatu nahi ditu, munduko ekonomiarentzat une zaila baita, eta Jaurlaritza dagoeneko hasia da neurri zehatzak aurreratzen.
Hala, 2026ko errekorreko aurrekontuari beste 87 milioi euro gehituko zaizkio orain, gure ETEak eraldatzera eta dibertsifikatzera bideratuta. Guztira, Eusko Jaurlaritzak 277 milioi euro bideratuko ditu ETE-entzako laguntzetara; hau da, 2025eko aurrekontuarekin alderatuta, % 51,4 gehiago.
Ekimen estrategiko horren helburua da Euskadin jarduera duten enpresa txiki eta ertain (ETEak) industrialen eta sektore horri lotutako zerbitzuen lehiakortasuna, espezializazioa eta dibertsifikazioa indartuko duten berrikuntza-proiektuak modu lehiakorrean bultzatzea.
Fast Track Innobideak programaren helburua da euskal enpresetan teknologia aurreratuak, metodologia berritzaileak eta irtenbide eraldatzaileak sartzea erraztea, berrikuntza sistematiko integratua sustatuz eguneroko jardunean, eta ez ekintza puntual gisa, bereziki Industria Plana – Euskadi 2030ek definitutako sektore estrategikoetan.
Fast Track Innobideak programa 2024an jarri zen abian, eta berrikuntzari laguntzeko tresna gisa duen ahalmena erakutsi du lehen bi edizioetan. Lehen deialdian 9 milioi euroko aurrekontuarekin eta bigarrenean 15 milioi eurokoarekin, programak 311 berrikuntza-proiektu eta 23 funtsezko ekintza osagarri babestu ditu, hau da, jasotako eskaeren % 59. Guztira, 54,9 milioi euro mobilizatu dira jarduera berritzaileetarako 270 enpresa txiki eta ertain industrialetan eta lotutako zerbitzukoetan, bereziki teknologia berritzaileen garapena eta ezarpena bultzatuz.
Laguntzaren aurrekontua eta ezaugarriak.
Deialdi honek 13,5 M € ditu euskal ETE industrialetan berrikuntza modu egituratuan ezartzen lagunduko duten berrikuntza-proiektuak eta ekintza osagarriak laguntzeko.
- Itzuli beharrik gabeko laguntzak, diruz lagundu daitezkeen kostuen % 50 artekoak.
- Enpresa eta urte bakoitzeko gehieneko zenbatekoa:
- 250.000 € berrikuntza-proiektuetarako.
- 30.000 € berrikuntza sustatzeko funtsezko ekintza osagarrietarako eta kudeaketa aurreratuko ekintzetarako, hala nola BDIHek (Basque Digital Innovation Hub) eskaintzen dituzten laguntza teknikoko jarduketetarako.
- Eskabidea onartzean onartutako zenbatekoaren % 60ko aurrerakina, proiektua gauzatzea errazteko.
Laguntza-lerroak
Programak bi jarduera-lerro nagusi jasotzen ditu:
- Berrikuntza-proiektuak (1. lerroa):
Berrikuntza-proiektuak egitea, produktu, prozesu edo negozio-eredu berriak edo nabarmen hobetuak garatzeko, bereziki Euskadi 2030 Industria Planean definitutako sektore estrategikoetan. - Ekintza osagarriak (2. lerroa):
Enpresen berrikuntzarako barne-gaitasuna indartzera bideratutako laguntza teknikoa eta zerbitzu espezializatuak sartzen dira, bai eta teknologia berriak (BDIH) eta kudeaketa-metodologiak (KUDEABIDE) segurtasunez eta eraginkortasunez hartzea erraztera bideratutakoak ere. Oro har, jarduera horiek prozesu berritzaileak planifikatzen, testatzen eta egituratzen laguntzen diete enpresei, etorkizuneko irismen handiagoko proiektuetarako prestakuntza sendotuz.
Helburua eta onuradunak
Fast Track Innobideak Euskadin jarduera-zentroa duten ETE industrialei zuzenduta dago, bai eta industria-arloarekin lotutako zerbitzu-enpresei ere, baldin eta beren lehiakortasunean eta jarduteko moduetan benetako eragin ukigarria duten proiektuak egiten badituzte.
Laguntza ekonomikoaz gain, programak berrikuntzaren sistematizazioa sustatzen du, erakundeen barruko etengabeko prozesu gisa, eta euskal enpresen antolamendu- eta teknologia-eraldaketa bultzatzen du.
