Embalan 3, egur-zerrategia izatetik, industria-enbalajera
Bezeroaren neurrira egindako industria-enbalajea. Hori da Embalan 3ren helburua duela berrogeita hamar urtetik. Bergarako familia-enpresa horrek nahierako industria-enbalajeen diseinuan eta fabrikazioan egiten du lan. Enbalaje horiek mundu osoan zehar saltzen ditu, sektore hauetako enpresentzat: makina-erreminta, dimentsio handiko ondasunak eta ekipoak edo trenen eta energiaren sektoreak. 50 langile ditu, eta egoitzak Bergaran (Larramendiko Poligonoa) eta Gueñesen —azaldu berri du Made in Basque Country programan zuzendari kudeatzaileak, Ion Alberdik—.
Familia-proiektu hau duela 80 urte hasi zen, eta egur-zerrategia zen orduan…
Hori da. Proiektu hau duela 80 urte jaio zen Bergaran, Osintxuko baserri batean. Gure aitak eta osabak egurra mendiko idiekin ateratzen zuten eta asteburuetan kutxak moztu eta fabrikatzen zituzten. Garai hartan, Soraluzen, Eibarren eta Bergaran eraikin bakoitzak torloju-denda txiki bat zeukan beheko pisuan eta kutxak egiten zituzten haientzat. Kartoia iristean, ordea, guztiz aldatu zen merkatua eta enpresa paletak egiten hasi zen kutxak garraiatzeko, baita lehenengo enbalajeak ere, zehazki Soraluce Koop. E.rentzat (gure baserritik oso hurbil dago gainera). Urteen joanarekin, eta makina-erremintako eta ekipo-ondasunen merkatuaren bilakaera ikusita, 2007an Embalan3 sortu zen, egurrezko industria-enbalajeen diseinuan eta fabrikazioan ez ezik logistikan ere ardaztua.
Eta orain erreferente argia da… Nola lortzen da estatus hori?
Puntu honetara iritsi gara dedikazioari, lanari eta lantalde handi baten zati izateari esker. Bide honetan lagundu diguten pertsonekin elkartzeko zortea izan dugu, eta horiek ere lorpen eta arrakasta horren eragileak dira.
Embalan 3 zer puntutan dagoela esango zenuke?
Ziurgabetasun handiko garai batean bizi gara, hori da egia. Urtearen hasieran, eskaera-zorro handia genuen, eskari asko Estatu Batuetara bidaltzekoak ziren, baina bizi dugun ezegonkortasunak proiektu asko gelditu ditu eta une hauetan gordetako material asko daukagu, bidaltzeko prest, gure bezeroek arretaz begiratzen baitituzte muga-zergak.
Nahierara egiten duzuen industria-enbalaje horretan, zer material erabiltzen dituzue normalean?
Nagusiki Euskadiko pinu-egurra erabiltzen dugu, plastikozko babesak ere egin ditzakegu, eta metalezko errefortzuak, baina batez ere egurra erabiltzen dugu, eta beti Made in Euskadi.
Nolakoa da zuen enpresara iristen den bezeroa?
Konpainia handiekin egiten dugu lan, baina baita enpresa txiki eta ertainekin ere, normalean askotariko sektoreetako ekipo-ondasunak fabrikatzen lan egiten dutenak. Gehienek ezaugarri bat dute komunean: dimentsio handiko piezak edo makinak fabrikatzen eta garraiatzen dituzte.
Eta jarraitzen duzuen ohiko prozesuan, nolakoak dira etapak?
Gure bulego teknikoak aztertzen ditu paketeen dimentsioak, ezaugarriak, pisuak eta garraiobidea enbalajea diseinatu aurretik. Diseinua bezeroarekin adostuta lantzen da eta, hortik aurrera, paketeak ekartzen dituzte gure instalazioetara eta orduan hasten gara enbalajeak egiten eta dagozkien garraiobideetan zamatzen. Paketeak garrantzi eta tamaina handikoak izan daitezke —esaterako, Fagor Arrasatek fabrikatutako prentsa-buru baten 200 tonako pieza—.
Baina denak ez dira euskarri handiak izango, ezta?
Hori egia da eta, horren adibide moduan, kasu berri bat konta dezakegu: maletatxo bat landu genuen opari bat babesteko: piolet bat. Alex Txikonek duela gutxi David Broncano aurkezleari oparitu dio La Revuelta programan. Hain zuzen ere, harreman ona dugu Txikonekin eta harekin elkarlanean aritu gara Azpeitiko Mendietxe museoan, eta kutxa eskatu zigun telebista-programara eramateko.
