Electro Alavesa: “Errotzea ez da diluituko; betiko gertutasun berarekin jarraituko dugu lanean”

Electro Alavesa Arabako enpresa historikoak berrogei urtetik gorako ibilbidea du Segurtasunaren sektorean, eta etorkizunerako urrats erabakigarria eman berri du Cottesekin integratuta. Hala, Attlon sortu dute, estatu osoko sektorean liderra izateko sortu den enpresa-talde berria. Euskadiko enpresak industriako berrikuntzarako eta babeserako erreferente gisa duen rola indartu du operazio horrekin, eta sendotu egin du Euskadik arlo geroz eta estrategikoago horretan duen pisua. Horri buruz hitz egin du Leire Fernández de Alaiza Electro Alavesako zuzendari nagusiak Made in Basque Countryn.

Nola sortu zen Cottés eta Electro Alavesa Attlon izenpean batzeko ideia?

Attlon uste partekatu batetik sortu zen, eta uste hori da bereizita eskaintzen genuena baino askoz ere gehiago eskain dezakegula elkarrekin. Industriako segurtasunak soluzio integratuagoak, prediktiboagoak eta akatsei aurre hartzeko gai direnak behar dituela hauteman dugu bi enpresok. Ikuspegi partekatu hori dugunez, eta Henko Partnersen laguntzarekin, une ezin hobea da aurrerapauso bat emateko eta sektorearen erronka berriei erantzungo dien proiektu komuna eraikitzeko.

Eta zer emango dio enpresa bakoitzak proiektuari eta nola izango da osagarritasun hori praktikan?

KPIn izugarrizko gaitasun teknikoa, kearen kontrola, 100 espezialistatik gorako ekipo bat eta ingeniaritzaren gaineko ikuspegi oso osatua ditu Cottések. Electro Alavesak 40 urte baino gehiago daramatza segurtasun elektronikoaren arloan berritzen eta harreman oso estua du herrialdearen iparraldeko industria-ehundurarekin. Elkartzerakoan, bi erakundeen teknologiak integratzeaz gain, kulturalak ere batuko dira. Zerbitzuarekiko bokazioa, xehetasunarekiko obsesioa eta pertsonen benetako segurtasunarekiko konpromisoa.

Zer inpaktu sortzea espero duzue zuen sektoreetan?

Talde berriak, sistemak instalatzeaz gain, enpresei egunerokoan lagunduko dien aliatua izan nahi du, segurtasuna kritikoa baita. Logistikan, elikaduran edo energian babesa hobetzea, mantentze-lan prediktiboen bitartez balizko jazoerei aurre hartzea eta denbora errealean monitorizatzea da bere helburua. Azken batean, jarduera inoiz ez etetea eta langileak eta inguruneak beti babestuta egotea da xedea.

Bezeroek eta kolaboratzaileek zer espero dezakete etapa berri horretatik?

Talde hurbilagoa, azkarragoa eta etorkizuneko ikuspegi argia duena espero dezakete. Attlonek talentua erakarri nahi du, zerbitzu berriak garatu eta Estatu osoan industria-segurtasuneko erreferente gisa finkatu. Baina, batez ere, konfiantzazko harremanak eraikitzen jarraitu nahi du eta pertsonen babesaren, instalazioen eta operazioen arloan desberdintasuna markatzen duten soluzioak eskaini nahi ditu.

Euskadiko enpresa historikoa zarete, eta 43 urteko ibilbidea daukazue. Integrazio horrekin, askoren zalantza izango da ea tokiko izaera eta Euskadiko industriarekiko gertutasuna lausotuko diren. Nola bermatuko duzue errotze hori ez galtzea?

Gure indarra Arabako eta Euskadiko industria-ehunduraren ezagutza sakonean eta 40 urte baino gehiagoz eraikitako konfiantza-harremanean egon da beti. Identitate hori mantendu ez ezik, indartu egingo da Attlonen barruan. Zuzendaritzako taldeek proiektua zuzentzen eta kapitalean parte hartzen jarraituko dute. Hortaz, kulturak, tokiko ikuspegiak eta lurraldeko bezeroekiko gertutasunak bere horretan jarraituko dute. Gainera, taldeak badaki Euskadin presentzia hori izateak zer nolako balio estrategikoa duen. Hori dela eta, betiko gertutasunarekin jarduten jarraituko dugu, baina egitura handiago baten babesa izango dugu orain, soluzio are aurreratuagoak eta konektatuagoak eskaini ahal izateko. Errotzea ez da desegin; etorkizunera proiektatu dugu baliabide eta berritzeko gaitasun handiagoarekin.