Adimen artifiziala ikuskapen-prozesuak bizkortu eta automatizatzeko: Gisteken proposamen teknologikoa
Peritu-bulego baten adar teknologikoetako bat bezala 2004an Erandion sortu zenetik, Gistekek merkatuaren garapen digitalera egokitzen jakin du, eta ikuskapen, egiaztapen eta kontrol prozesuei aplikatutako soluzio teknologikoen garapenean funtsezko eragile gisa sendotu da.
Gaur egun, enpresa hamalau pertsonek osatzen dute, eta aseguru-, industria- edo SAT sektoreetan funtsezko prozesuak optimizatzeko diseinatutako tresna teknologikoak garatzen ditu; sektore horietan beharrezkoa izaten baita makinen egoera egiaztatzea, segurtasun-baldintzak baliozkotzea edo egindako lanak egiaztatzea. “Peritu-bulegoekin estuki lan egin izanak behar oso zehatzak antzematea ahalbidetu digu, eta denborarekin beste sektore batzuetan ere behar horiek identifikatu ditugu”, azaldu du Joserra Lizarragak, Gistekeko merkataritza-zuzendariak.
Horrela, Gisteken balio-proposamena kudeaketa eta ikuskapenerako plataformen garapenean, bideo bidezko urrutiko egiaztapen-sistemetan eta adimen artifizialean oinarritutako ikuskapen-soluzioetan oinarritzen da. “Soluzio hauek makinen berrikuspenetan, instalazioen kontroletan, araudia betetzen dela egiaztatzeko prozesuetan eta industria-inguruneetako segurtasun-neurrietan bereziki erabilgarriak dira”, ziurtatu du merkataritza-zuzendariak.
Bere tresnarik nabarmenen artean ‘Ubiquos’ dago, adimen artifizialaren garapenari esker hainbat zerbitzu bateratzen dituen teleperitazio-sistema. Plataforma honen barruan, Gistekek aseguru-arloan erabiltzeaz gain, industria-ikuskapen teknikoetan ere aplika daitezkeen ikusizko egiaztapen gidaturako soluzioak eskaintzen ditu. Hala, konpainiak bere bezeroei gorabeherak antzemateko, egiaztapenen fidagarritasuna hobetzeko eta joan-etorriak, denborak eta kostuak murrizteko aukera ematen die.
“Enpresak bere plataformen etengabeko hobekuntzaren, ikuskapen eta egiaztapen prozesuetan adimen artifiziala txertatzearen eta bezero industrial eta laguntza teknikokoekin lankidetza zuzenaren alde egiten du, soluzioak benetako lan-inguruneetara egokitzeko. Izan ere, ingurune horietan egiaztapenen fidagarritasuna eta trazabilitatea funtsezkoak baitira”, adierazi du Lizarragak.
Horrelako soluzioek, gorabeherak berehala konpontzen eta itxaronaldiak murrizten laguntzeaz gain, ingurumenarentzat ere eragin positiboa dute; izan ere, alferrikako joan-etorriak saihesten dira eta emisio kutsatzaileak minimizatu edo, are gehiago, ezabatu egiten dira.
Etorkizunari begira, Gistekek ikuskapen teknikoetako prozesuetan adimen artifiziala modu eraginkorrean integratzen, industria-segurtasuneko araudietara egokitzen eta eguneroko zereginak bizkortu eta automatizatzeko soluzio sendo, seguru eta eskalagarriak eskaintzen jarraitzea du helburu.
SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
