BRTAko teknologia-zentroek gama altuko mikroskopia elektronikoaren industriako aplikazioa indartu dute

BRTAko teknologia-zentroek gama altuko mikroskopia eta nanofabrikazioko euskarria duen aplikazioa ikerketan eta industrian sendotzea adostu dute. Martxoaren 5ean, CRYO Plasma FIB  izeneko ekipamendua aurkeztuko dute Donostiako CIC nanogunen antolatutako jardunaldian.

Mikroskopia elektronikoko eta manofabrikazio aurreratuko ekipamendu berezi horrek euskarria ematen die energia, biomedikuntza eta material aurreratuen sektoreetako industriari eta ikerketa-zentroei. Jardunaldi horretan bertan aurkeztuko dute Mikroskopia Elektronikoaren Euskadiko Azpiegitura sendotzeko asmoz BRTAko kide diren erakunde hauek sinatu duten hitzarmena: CIC bioGUNE, CIC biomaGUNE, CIC energiGUNE eta CIC nanoGUNE.

Jardunaldi horretan, BRTAko kide diren lau ikerketa-zentroetako mikroskopia elektronikoko plataformetako espezialistek beren plataformen gaitasunak eta elkarlanerako aukerak ezagutaraziko dituzte. Bestalde, nanoGUNEn instalatutako ekipo berriaren gaitasun espezifikoak aurkezteko eta bisitak egiteko ere baliatuko dute jardunaldia.

CRYO Plasma FIB delakoa tresna berezia da eta Europan horrelako gutxi daude. Zientzia, Berrikuntza eta Unibertsitateen Ministerioak finantzatu du eta Mikroskopia Elektronikoaren Euskadiko Azpiegitura osatzen du, haren gaitasunak hobetuta. Arlo askotan aukera berriak eskaintzen ditu: tenperatura baxuko fisikarekin lotutako materialen zientzian, energiaren sektorerako ioi-litiozko bateriak eta tomografia zelular krioelektronikoa, esate baterako.