SPRIk hartu du EURADAko, Garapen Agentzien Europako Elkartearen, presidenteordetza bere gain
Cristina Oyón, Teknologia, Berrikuntza eta Jasangarritasun arloko zuzendaria, elkarteko Zuzendaritza Batzordeko kide eta presidenteorde izendatu dute. Postu horri esker, SPRIk elkartean garatzen dituzten jardueretan inplikatzeko eta funtzionamendu egokia bultzatzeko aukera izango du. Aste honetan, SPRI EURADAren, Garapen Agentzien Europako Elkartearen, Batzar Nagusian ari da parte hartzen. Aurten, gainera, Batzarrak garrantzi berezia izango du, Zuzendaritza Batzorde berria izendatzeko hauteskundeak ere egingo baitira.
SPRIren ordezkaria EURADAren ospakizunean
Hautagaiek beren printzipioak, helburuak eta estrategiak azaldu dituzte eta, ondoren, kideek Zuzendaritza Batzorde berria aukeratu dute. Ondoren, Zuzendaritza Batzordea izan da hurrengo hiru urteotarako presidentea, presidenteordea, diruzaina eta idazkaria aukeratzeko arduraduna.
Batzar horretan, gainera, beste gai batzuk landu dira: abian dauden proiektuak, lorpenak, etorkizuneko ekimenak eta aurtengo lan-programa, besteak beste.
Ondoren, Cristina Oyónek EURADAk “Eskualdeak ahalduntzen” lelopean antolatutako AGORADA konferentzian hartu du parte. Ekitaldiak garapen-agentziek aurre egin beharreko erronka nagusiei buruzko gogoeta egiteko topagunea eskaintzen du eta, bertan, Cristina Oyón emakumeak industriaren lehiakortasunean duen inpaktuari buruz SPRIk egindako azterlanaren ondorioak entzuleen aurrean aurkeztera gonbidatu dute. Txosten horrek agerian utzitako ondorioen arabera, berdintasun handiena duten enpresak lehiakorragoak dira, eta fakturazio- eta enplegu-gorakadari eta I+G+b jarduerari eta nazioartekotzeari dagokienez emaitza hobeak dituzte.
Women in Industry arloan garatutako lanetako bat da konferentzian SPRIk aurkeztutako ikerketa-lan hori. Zehazki, emakumeek industrian duten presentziaren gaineko datu kezkagarrien aurrean, lan honi ekitea erabaki zuen SPRIk, UNIDOk (United Nations Industrial Development Organization) 2019an nabarmendutako premisa bat frogatzeko helburuz: “Genero-berdintasuna giza baliabideekin lotura duen gaia izateaz gain, lehiakortasuna eta susperraldi ekonomikoa bermatzeko funtsezko gaia ere bada”.
AGORADA da EURADAk antolatutako konferentzia nagusia. Urtero egiten den ekitaldia kideei honako hauetarako aukera ematen dien plataforma bakarra da: joera politikoak aztertzea, finantzaketa-aukerei buruzko informazioa trukatzea eta eskualdeko garapen-agentzien errendimendua hobetzea tresna partekatuen eta jardunbide egokien bidez.
EURADAko kideak elkarrentzako inspirazio-iturria dira eta ideiak trukatzen dituzte beren eskualdeetan arrakasta-politikak eta haien jardunbide egokienak partekatuta. AGORADA 2024k Europako eskualdeko garapen-agentzien egoera hobeto ulertzeko EURADAk egiten dituen ahaleginekin aurrera jarraituko du. Hala, ELGArekin batera egindako eta 2023. urtearen amaieran kaleratutako inkestaren aurretiazko lehenengo emaitzak aurkeztuko ditu eta garapen-agentzietako elkarte nazionalek estatu mailako testuinguru ugarietan betetzen duten rolaren eta bideratzen dituzten jarduera espezifikoen inguruko eztabaida bultzatuko du.
Eskualdeko elkarteen egitekoaz gain, aurtengo edizioak inpaktuaren inbertsioa eta aukera-berdintasuna bermatzea izango ditu ardatz. Bi gai horiek funtsezkoak dira eskualdeko garapen-agentzien lanerako.
Gaur egun, EURADA 17 herrialdetan ari da lanean, eta haren lankidetza-jarduerak eta sareak sortzeko egiten duen lana Europako kideez harago hedatzen dira. Gainera, mundu osoan zehar ditu harreman egonkorrak. Elkartea da lurralde mailako garapen sozioekonomikoarekin lotutako harremanak finkatzeko, garatzeko, defendatzeko eta horietan parte hartzeko lekua.
EURADAk arrakasta izan dezan, lotura estua izan behar du bere kideekin eta alderdi interesdunekin, eta elkarteak aurrera eramaten dituen jardueretan lankideak inplikatzeko konpromisoa eta gaitasuna izan behar ditu.
Honako hauek dira elkartearen helburuak:
- Garapen-agentzien arteko esperientzia-trukea sustatzea eta “jardunbide egokiak” bultzatzea.
- Garapen-agentziak lurraldea garatzeko indar eta erakunde ekonomiko espezifiko gisa onar daitezen sustatzea;
- Lurralde-garapeneko eta/edo tokiko eta eskualdeko ekosistemetarako laguntza-programak garatzen eta ezartzen laguntzea eta parte hartzea.
Eurada
Garapen Agentzien Europako Elkartea (EURADA) 1992an sortu zen eta garapen ekonomikoaren inguruan lan egiten duten Europa osoko profesionalak biltzen ditu. Gainera, garapen-agentziak ordezkatzen ditu Europar Batasuneko erakundeen aurrean. 14 herrialdetako (Austria, Belgika, Kroazia, Frantzia, Grezia, Italia, Malta, Herbehereak, Polonia, Portugal, Errumania, Eslovenia, Erresuma Batua eta Espainia) eta atxikipen aurreko fasean dauden bi herrialdetako (Serbia eta Turkia) eta Ukrainako 59 elkartek osatzen dute.
Elkarteak eskualdeko garapen ekonomikoko profesionalen arteko lankidetza errazten du, harremanak ezartzeko, EBko proiektu komunak planifikatzeko, lankidetzan aritzeko, eta Europa mailan parte hartzeko eta beren proiektuak defendatzeko gune bat eskainita. Beste nolabait esanda, EURADA garapen-agentziak elkarren artean, Europarekin eta Europak eskaintzen dituen aukerekin lotzeko ondo kokatuta dagoen nazioarteko erakundea dela esan dezakegu.
Eskualdeen arteko lankidetzaren onurez jabetuta, EURADAk hasiera-hasieratik hartu du parte modu aktiboan eskualde-garapeneko jardunbide berritzaileak arakatzen, probatzen eta sustatzen. Plataforma dinamikoa denez, EURADAk bere esperientzia baliatzen du jardunbide egokienak identifikatu eta hedatzeko. Hala, kideentzako networkingeko aukerak eskaintzen ditu eta ezagutzak trukatzeko aukera ematen du.
Lotutako albisteak
Euskal enpresek Bogotako hiri-eraldaketari lotutako aukerak esploratu dituzte
Jardunaldian azpiegituretan espezializatutako hamar euskal enpresak parte hartu zuten, Kolonbiako hiriburuari soluzio teknologikoak eskaintzeko asmoz.
Horizon Europe 2025: 7.300 milioi euro enpresa berrikuntza bultzatzeko Europan
SPRI-ren eskutik, EEN sarearen euskal nodoaren koordinatzaileak garen aldetik, euskal enpresei Horizon Europe programan parte hartzen laguntzen diegu. Enterprise Europe Network (EEN) Europako sare bat da, ETEen hazkundea eta nazioartekotzea bultzatzen duena
Global Training bekak kudeatuko dituzten erakunde laguntzaileen bila ari gara
Erakunde bakoitzak 50 eta 80 beka arteko eskaintza aurkeztu ahal izango du graduko unibertsitate-titulua edo goi mailako lanbide-heziketako titulazioa duten gazteentzat
Eusko Jaurlaritzak Euskadiren eta Japoniaren arteko ekonomia- eta enpresa-harremanak estutzen jarraitzen du
Mikel Jauregi sailburua Japoniako Finantza ministrordearekin bildu da, eta erakundeen, ekonomiaren eta enpresen arloko zenbait topaketatan parte hartu du, Euskadiren eta Japoniaren arteko harremanak sendotze aldera.
BEINT bekek ehun hautagai baino gehiago bildu dituzte azterketa-egunean
Guztira 134 pertsonak (73 emakumek eta 61 gizonek) parte hartu zuten hautaketa-prozesuaren fase honetan
Txosten estrategikoak, euskal enpresa-sareari automobilgintzako berrikuntza globala hurbiltzeko
Basque Trade & Investmentek sektorearen nazioarteko azoka nagusietako bostetan aurkeztu diren produktu eta teknologiei buruzko informazio zehatza jarri du euskal enpresen eskura
Euskadiko enpresek nazioartekotzeari buruzko aholkularitza jaso ahal izango dute 23 herrialdetan
Basque Trade & Investment erakunde publikoko profesionalek bilera pertsonalizatuak egingo dituzte maiatzaren 26an, 27an eta 28an.
Eusko Jaurlaritzak eta Hithium enpresak akordio estrategikoa sinatu dute, Europako biltegiratze egonkorraren industria gidatzeko
Hitzarmenari esker, Euskadin biltegiratze egonkorreko sistemak fabrikatzea ahalbidetuko duen soluzio integral baten garapenean lan egingo da, erreferentziazko bazkide industrial batekin elkarlanean eta Euskal Autonomia Erkidegoko zentro teknologikoen babesarekin
Euskadi eta Italiako klusterren haien arteko lankidetza indartu dute
Italiako Emilia Romagna eskualdeko klusterrek euskal lurraldea bisitatu dute aste honetan, sektore estrategikoetan balizko lankidetzak esploratu eta ezartzeko asmoz
Robotikak eta automatizazioak Euskadiren eta Txekiar Errepublikaren industriarako dituzten aukerak aztertu dituzte
Bilboko Merkataritza Ganberan egindako Euskadi – Txekiar Errepublika “Aukerak robotikan eta automatizazioan” jardunaldi ekonomikoan, Euskal Autonomia Erkidegoko hogei bat enpresatako ordezkariak eta ekonomiaren eta industriaren arloko beste eragile batzuk bildu dira.