Eusko Jaurlaritzaren nazioartekotze-programa bateko enpresa onuradun batek erreferentziazko proiektu ekologiko batean parte hartu du Kolonbian

15 maiatza, 2019
Euskal enpresako proiektua, aurkezpenean.

 

Basoinsa ingurumen arloko ingeniaritzak ibai bat berroneratzeko proiektua diseinatu du Kolonbian

Basoinsak Nazioartekotzeko Euskal Agentziaren Pilotu programaren (iaz abiarazitakoa) laguntza jaso zuen, zeinak finantzaketa ematen baitu inbertsio publikoko plan pilotuak garatzeko atzerrian.

 

Ingurumen arloko Basoinsa euskal ingeniaritzak erreferentziazko proiektu ekologiko bat diseinatu du Kolonbiako ibai bat berroneratzeko eta Eusko Jaurlaritzaren finantzaketa jaso du horretarako, Nazioartekotzeko Euskal Agentziaren (Basque Trade & Investment) Pilotu programaren bitartez.

 

Basoinsa enpresak esperientzia pilotu batean parte hartu zuen Tenjo herrian (Kolonbia), ingurumen arloko hobekuntzak eta hobekuntza ekologikoak egiteko Chicú Ibaiaren ertzean. Konpainiak gonbita jaso zuen proposamen bat egin zezan ibaiertza gune ekologiko eta sostengarri bihurtzeko eta, bide horretatik, 16 kilometroko tartea berroneratzeko Bogotá ibaiaren adar garrantzitsu horretan. Gune hori Tenjoko biztanleen historiaren eta nortasun ekologikoaren zati bat da. Horregatik, berroneratze-proiektuaren xedea da etorkizuneko belaunaldiei ingurumen-ardatz berriztatu bat eskaintzea, osasuntsua eta bioaniztasun oparokoa.

 

Joan den apirilaren 27an hainbat ordezkari bildu ziren Juan Gabriel Gómez Campos -Tenjoko udaleko agintari gorena- buru izan zuen topaketa batean, besteak beste, Diana Paola García, Cundinamarca departamenduko Lankidetza eta Gobernazioko Lotura Instituzionaletako idazkaria eta Rubén Darío Acero, Tabio udalerriko alkatea. Chicú ibaiertza berroneratzeko proiektuaren inguruan sortu den komunitateak ere aktiboki parte hartu zuen ekitaldi horretan.

 

Pilotu programak izandako arrakastaren erakusgarri, dagoeneko badira dozena bat enpresa prest daudenak euren proiektuak Nazioartekotzeko Euskal Agentziari aurkezteko, nahiz eta oraindik ez den plazaratu deialdia.

 

Pilotu programa iaz abiarazi zen 200.000 euroko aurrekontuarekin, eta diruz lagundu zien sei enpresari. Asmoa da ekainean plazaratzea bigarren edizioaren deialdia.

 

Programa honek atzerriko inbertsio publikoko proiektu pilotuak finantzatzen ditu eta laguntza ematen die euskal enpresei nazioarteko inbertsio publikoko ekimen horiek diseinatu, garatu eta inplementatzeko. Itzuli beharrik gabeko dirulaguntzak eskaintzen ditu, eta laguntza horiek proiektuaren kostuaren %50erainokoak izan daitezke, gehienez 50.000 eurokoak proiektu bakoitzeko.

Erlazionatutako artikuluak

Orobat interesa dakizuke

View all arrow