Zubiola, zurgintzatik automozio eta aeronautikara
Zubiola enpresa gipuzkoarrak joan den hamarkadako krisi ekonomikoa aprobetxatu zuen bere negozioa dibertsifikatzeko; zurgintzaren eta eraikuntzaren sektoreetan zentratuta egotetik beste arlo batzuetara zabaldu zuen bere jarduera, hala nola aeronautika eta automoziora. Ebaketarako tresna bereziak fabrikatzen dituen Azkoitiko konpainia honek SPRI Taldearen laguntza jaso du BDIH Konexio programaren bitartez, zeinarekin Basque Digital Innovation Hub-ek ETEen eskura jartzen baitu fabrikazio aurreratuko aktibo eta zerbitzuen sare konektatu bat prestakuntzarako, ikerketarako, testak egiteko eta baliozkotze prozesuetarako.
Zubiola enpresak ebaketa-tresnak fabrikatzen eta hornitzen ditu txirbil erauzketa bidezko mekanizaturako, batik bat burdina ez diren metalekin eta konposatuekin, zurarekin nahiz haren eratorriekin erabiltzeko. Kalitate handiagoa ematen dioten bi material erabiltzen ditu: PCDa (diamante polikristalinoa), metala baino eraginkorragoa dena burdinazkoak ez diren materialetarako; eta PCBN (boro nitruro polikristalinoa), burdinazko materialetarako.
BDIH Konexio programaren laguntzarekin, konpainiak ikerlan bat egin du altzairuak mekanizatzeko PCBNzko tresnetarako ebaketa-geometriak, zorrozte motak eta txirbil apurtzaileak aztertzeko. “Azterketak eta lehen probak egiten ari gara bezeroari konponbide desberdinak eskaini ahal izateko” dio Oihan Aizpuruk. Helburua da otxabuak, barautsak eta fresagailuak fabrikatzea automoziorako eta aeronautikarako, “sektore horietan altzairua mekanizatzen dutelako. IK4-Tekniker zentroaren laguntza izan dugu, zeinak arlo teknologikorako aholkularitza eman baitigu”.
Enpresak hainbat erronka ditu, eta horietako bat da gehiago nazioartekotzea (gaur egun negozioaren % 38 atzerrira bideratzen da). “Polonia, Italia, Txekiar Errepublika eta Alemaniako merkatuetan sartu nahi dugu. Gaur egun, Frantzia, Portugal eta Mexikon gaude batez ere”. Zubiola 2030erako plan estrategikoa egiten ari da. “Asmoa da prest izatea urtearen amaierarako”.
Bere proiektuen artean aipatzekoa da Gipuzkoako Foru Aldundiaren laguntzarekin garatu duen Gaitzen proiektua, zeinak barnekintzailetza bultzatzen baitu enpresan produktu berriak merkaturatzeko. “Helburua da gure produktuen % 20-25 berriak izan daitezela”.
Halaber, Europako hainbat proiektutan murgilduta dago Gipuzkoako Foru Aldundiaren, SPRI Taldearen, Eusko Jaurlaritzaren, CDTIren eta Europako Funtsen laguntzarekin. Horietako batzuk dira Comach (likido kriogenikoz lagundutako mekanizatua), Comach (compositezko piezetarako akatsik gabeko mekanizatu sistema robotiko garbi eta zehatza), eta Machstack (material konposatuzko pilen mekanizatu-prozesuaren optimizazioa).
Enpresaren bilakaera 55 urteko ibilbidean
Konpainiak 55 urte ditu. Azpeitian sortu zen 1966an, zura prozesatzeko makinak fabrikatzen zituzten bi bazkideren eskutik. Handik urte batzuetara, makinez gain tresnak egiten ere hasi ziren, eta 1985ean erabaki zuten tresnetan zentratzea.
Enpresaren bilakaerako hurrengo jauzia 2000. urtean iritsi zen, zurgintzaren sektorerako PCDzko tresnak fabrikatzen hastean. “2005ean automozio eta aeronautika sektoreetarako tresnak egiteari ekin genion, produktua dibertsifikatzeko” dio Oihan Aizpuruk, Zubiolako zerbitzu teknologikoko arduradunak. Eta 2007an Azkoitiko instalazioetara eraman zuten enpresa.
Konpainiak hainbat motatako tresnak egiten ditu: zura ebakitzeko tresnak, automozio eta aeronautika sektorerako piezak mekanizatzeko mota guztietako erremintak, “one-shot” tresnak, kainoi barautsak eta abeilanatzaileak hegazkinen fuselaje eta egituretarako, etab. Sektore hauetarako lan egiten du batik bat: automozioa, aeronautika, zurgintza eta bere eratorriak, eta industria orokorrean.
Gehienbat zurgintzaren mundura zuzenduta zeuden lehen urteetako tresna haiek (zerrak, barautsak…) sektore berrietarantz eboluzionatu dute. “2008ko krisiak bultzatu gintuen erabaki hura hartzera. Ordura arte, gure merkatuaren % 80 zurgintzaren sektorean zegoen, eta gainerako % 20a aeronautikan eta automozioan. Orain, berriz, merkatuaren % 40 zuraren sektorean daukagu, beste % 40 automozioan eta gainerako % 10a aeronautikan”.
Batez ere bezeroaren neurrira eginiko piezak egiten ditu. Automozioan eta aeronautikan horrelakoak dira eskaera guztien % 90, eta zuraren sektorean, berriz, % 40 inguru.
Enpresak 30 langile ditu, eta 4,4 milioi euro inguru fakturatzen ditu urtean. Negozioaren % 10 bideratzen du I+G-ra.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.