IndeusBerri: industria eta euskara uztartzen dituen informazioaren topagunea

Gaur albiste dira Enpresa Digitala, Enpatikonomia, Landue eta Phishing

Martiko lehen egunarekin dator IndeusBerri eta hasi berri den hilabete honetan egingo diren bi jardunaldi nabarmendu ditugu gaurkoan: alde batetik ENPATIKONOMIA martxoaren 15ean egingo dena “Lanaren zentzua eta Talentua” ardatz hartuta; bestetik Enpresa Digitalak Google Analytics 4ri buruz hilaren 19an egingo duen tailerra, euskaraz. LANDUE Durangaldeko enpresetan euskara bultzatzeko ekimenari ere egin diogu tokia, joan den astean egin baitzuen bere hirugarren foroa. Eta amaitzeko, industria berriaren hiztegiari maileguan hartu diogun kontzeptua: Phishing.

LANDUE III. Online foroa egin du eta euskara enpresetan sustatzeko diru-laguntzen berri eman. Joan den otsailaren 22an egin zen Landue, Durangaldean Lana Euskaraz ekimenaren onlineko hirugarren foroa. Bizkaiko Foru Aldundiak eta Eusko Jaurlaritzak enpresetan euskara sustatzeko dituzten diru-laguntzen berri eman zuten bi erakundeetako ordezkari Nestor Atxikallendek eta Leire Zuazok, hurrenez hurren. Eskualdeko 30etik gora eragilek, enpresak eta erakundek parte hartu zuten ekitaldian. Durangaldeko eremu sozioekonomikoan euskararen erabilera sustatzea du helburu Landue ekimenak.

Lanaren zentzua eta Talentua izango ditu ardatz ENPATIKONOMIA jardunaldiak aurten. Datorren martxoaren 15ean, ostiralarekin egingo da Enpatikonomia jardunaldia Zinealdea eraikinean, Oiartzunen. Lanaren zentzua eta Talentua ardatz hartuta, enpresentzako adibideak, eredu baliagarriak eta praktika onak erakutsiz, hausnarketarako eduki interesgarriak euskaraz jorratzen dituen elkartrukerako aukera eskainiko du topaketa honek. Jardunaldi honen helburua egungo enpresa-panoraman talentuaren erronka aztertzea eta eztabaidatzea da. Talentua bilatzeak eta atxikitzeak dakartzan erronkei aurre egiten lagunduko diguten ezagutzak, esperientziak eta estrategiak partekatzeko aukera izango da.

Enpresa Digitalak Google Analytics 4rekin lanean hasteko onlineko tailer praktikoa egingo du martxoaren 19an. Google Analyticsen azken bertsioak aldaketa handia dakar web neurketarako tresna honen inguruan orain arte ezagutzen genuenari dagokionez. Horrek informazio bonbardaketa ekarri du, eta baliteke informazo hori dena iragazi, antolatu eta lehenetsi behar izatea aldaketaren irismena ulertzeko eta egunean jartzeko. Tailer praktiko honetan, Google Analyticsen bertsio berriarekin hasiko zara lanean, zure webgunera iristen den trafikoaren jarraipena egiteko. Google Analyticsekin lan egiten duen eta Googlek aurreko bertsioei euskarria emateari utzi aurretik tresnaren bertsio berrira migratu nahi duenari zuzenduta dago.

“PHISHING” Industria Berriaren Spri Hiztegian. Mezu bat posta elektronikoaren bidez edo berehalako beste mezularitza-sistema baten bidez bidaltzea jende-multzo handi bati eta guztiei aldi berean, erakunde finantzario baten edo beste erakunde baten identitatea hartuz eta haren izenean, hartzaileen informazio pertsonala eskuratzeko eta, geroago, iruzurrezko helburuekin erabiltzeko. Mezu horretan, erakundearena omen den web-orri batera bideratzen duen esteka batean klik egiteko adierazten zaio hartzaileari. Egiatan, baina, orri faltsu batera joaten dira, zeinaren bidez ziberkriminalek haien erabiltzaile-izenak eta pasahitzak, kreditu-txartelen zenbakiak eta abar lapurtzen dizkieten.