Mandiolak bere hazkunde industriala indartu du konpositerako irtenbide aurreratuekin eta Hazitek programaren laguntzarekin
1998an Zumaian sortu zenetik, Mandiolak 360ºko zerbitzu integrala eskaintzen du konpositeen sektorean, eta merkatuaren eskaera berrietara egokitzen jarraitu du etengabe, pixkanaka bere jarduera-eremua zabalduz.
Gaur egun, enpresak diseinu eta modeloen, moldeen, piezen eta azpimultzoen fabrikazioa lantzen ditu, eta, horri esker, erantzun arina eskaini diezaieke askotariko sektoreetatik datozen bezero industrialen behar espezifikoei. Gainera, duela gutxi, bere zerbitzu eskaintzan karbono-zuntzezko piezen eta termoplastiko indartuen 5 ardatzeko mekanizazioa gehitu du, baita hainbat sektoretarako tresneria ere, hala nola aeroespaziala, eolikoa edo automobilgintza.
Konpositea zuntzez indartutako bi osagai edo gehiagoren konbinazioz osatutako materiala da, eta, horri esker, pieza arinak, erresistenteak eta diseinu-aldakortasun handikoak lor daitezke. Ezaugarri horiei esker, gero eta gehiago eskatzen da industria ingurune konplexuetan. “Konpositeak arintasuna eta diseinu abantailatsua ematen ditu”, azaldu du Sorkunde Eizaguirrek, konpainiako finantza saileko arduradunak.
Hala, Mandiolaren balio-proposamena bere perspektiba integralean oinarritzen da, bezeroari prozesu osoan laguntzeko aukera ematen diona, diagnostikoa eta muntaia barne. “Gure balio bereizgarria 360º-ko zerbitzua eskaintzea da”, dio Eizagirrek. Horrez gain, honakoa gehitzen du: “Hobetzeko puntuak aurkitzeko diagnostikoa egiten dugu, moldeak eta piezak diseinatu, modelatu eta fabrikatzen ditugu, eta bezeroak behar dituen gehigarriak muntatzen ditugu, bere makinen itxura eta funtzionalitatean aurrerapauso kualitatiboa eman dezan”.
Hala ere, berrikuntzaren aldeko apustua da konpainiaren beste ardatzetako bat. Arlo honetan, Mandiolak SPRI Taldearen Hazitek programan parte hartu du, enpresen I+G proiektuak bultzatzeko. Laguntza horri esker, enpresak aurrera egin ahal izan du prozesu berrien garapenean eta bere posizionamendu teknologikoa indartu du. “Haziteken parte hartzeak gaur egun gauden egoeran egoteko lagundu digu, lehiakideengandik bereiziz zerbitzu aurreratu eta teknologikoekin”, dio Eizaguirrek.
Horrela, talde egonkor eta fidagarri batekin, Mandiolak etengabeko prestakuntzaren eta teknologia berriak ezartzearen aldeko apustu sendoa mantendu du sektorearen lidergoan jarraitzeko.
Horri esker, etorkizunera begira, konpainiak merkatu berrietara zabaldu nahi du, eta bere lehiakortasuna indartu, gero eta zailagoa den industria-testuinguru batean. “Puntako teknologiak fabrikatzen eta ezartzen abangoardian jarraitzea da gure erronka”, amaitu du Eizagirrek.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
