Třinecké železárny talde siderurgiko txekiarrak bertatik bertara ezagutu du euskal enpresen eskaintza teknologikoa
Třinecké železárny talde txekiarrak Euskadi bisitatu du aste honetan, prozesu siderurgikorako teknologia eta ekipamenduen euskal fabrikatzaileekin bilerak egiteko helburuarekin. Basque Trade & Investmentek, Euskadiko Siderurgia Klusterren Elkartea den SIDEREXekin elkarlanean, antolatutako misio komertzial honek, gaur egun energia-kostu altuek eta politika arantzelarioen esparruak baldintzatutako sektore bati laguntza emateko beharrari erantzuten dio.
Lan-jardunaldi tekniko bati esker, talde txekiarreko ordezkariek Euskadiren gaitasun industrial eta teknologikoei buruzko informazio zehatza jasotzeaz gain, bertako industria siderurgikoaren espezializazioari buruzkoa ere eskuratu zuten. Testuinguratze horren ostean, Euskadiko hamaika enpresak bakarkako bileretan parte hartu zuten Erdialdeko Europako konpainia horren zuzendari nagusiarekin eta Inbertsioen zuzendariarekin.
Topaketa horietan, Euskadiko konpainiek euren soluzio teknikoak aurkezteko eta Třinecké železárny-ren inbertsioen plangintza aztertzeko aukera izan zuten; izan ere, talde honek, urtero, baliabide ugari bideratzen ditu bere prozesuen deskarbonizaziora bideratutako ekipamenduak erostera.
Třinecké železárny taldeari buruz
Třinecké železárny – Moravia Steel Txekiar Errepublikako altzairu-fabrikatzaile handiena da, eta urtean 2,5 milioi tona ekoizten ditu. Taldearen egitura operatiboak balio-kate osoa hartzen du bere baitan, labe garaien bidezko hasierako ekoizpenetik hasi eta produktu finalen ijezketa zein fabrikazioraino. Bere katalogoan palankillak, desbasteak, produktu lauak, barrak, hodiak, alanbreak eta errailak daude, bai eta doitasuneko osagai mekanizatuak ere.
Taldeak presentzia finkatua du Erdialdeko Europan, Txekiar Errepublikan, Polonian eta Hungarian kokatutako 20 enpresen bitartez. Guztira 15.000 langile ditu, eta horietatik 7.000k dibisio siderurgikoan jarduten dute. Topaketa honi esker, euskal enpresek euren eskaintza teknikoa zuzenean helarazi ahal izan diote korporazioko zuzendaritzari, baita haren industria-ekipamenduko eskakizun espezifikoak ezagutu ere.
