TABE, ia 60 urte mailu hidraulikoei eskainiak
TABE Hammers (Talleres Betoño S.A.) merkatuko edozein hondeamakinetara egokitu daitezkeen mailu hidraulikoak ekoizten dituen enpresa da. Duela ia 60 urte sortu zen, 1968an, Gasteizen, eta ibilbide luzea du produktu horiek diseinatzen, fabrikatzen eta merkaturatzen.
Ander Sáenz Zubillaga TABEko presidenteak azaldu duenez, “lurraldeari oso lotutako enpresa parte-hartzailea gara; gure bazkide guztiek enpresarekin harreman zuzena dute edo izan dute”. Pixkanaka, bere produktu-sorta zabaldu du merkatuaren eskakizunei erantzuteko; horren ondorioz, bere jarduera-lurraldea hazten joan da: orain, eta hamarkada batzuen ostean, bere ekoizpenaren zati bat esportatzen du, nahiz eta produkzio-planta mantentzen duen Arabako hiriburuan.
Bere produktuek “diseinu zilindriko bereizgarria dute eta aitzindariak dira tiranterik gabeko diseinuan“, azaldu du TABEko presidenteak. Bere gamak “merkatuko makina guztiak hartzen ditu bere gain”, mailuak 67kg-tik ia 8 tonako batera arte eskaintzen baititu. Bere produktu-zorroak ez ditu mailuak bakarrik, eraikuntzarako, obra publikorako eta meatzaritzarako osagarri hidraulikoak ere baditu: kazoak, zizailak, eraisleak eta matxardak, besteak beste.
Sektore askotan egiten du lan: eraikuntzan, eraispenean, birziklatzean, meatzaritzan, basogintzan eta nekazaritzan. Bere banaketa-sareak Espainia osoa hartzen du, baita kontinente guztietako herrialdeak ere: Europako zati handi bat eta Afrikako, Latinoamerikako, Ekialde Ertaineko eta Asiako hainbat puntu. Era berean, Sáenz Zubillagaren arabera, “kalitatezko arreta bermatzen duen”, zerbitzu teknikoa eskaintzen du. TABEk “funtsezkotzat” jotzen du langile teknikoak eta saldu osteko zerbitzua eskain dezaketen instalazioak dituzten banatzaile eskarmentudunekin lan egitea, “batez ere, mantentze-lan on batekin, erraz, 20 urte baino gehiago iraun dezaketen mailuak eskaintzen ditugulako”.
Etorkizunera begira egindako apustua argia da: “tokiko fabrikazioak jarraitzea belaunaldien arteko erreleboan murgilduta dagoen enpresa parte-hartzaile honetan, merkatuak aurkezten dituen transformazioetara egokituko den enpresan”, ondorioztatu du TABEko presidenteak.
Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.
