Poloniako Wielkopolska eskualdeak berrikuntza eta transferentzia teknologikorako ereduak esploratu ditu Euskadin
Poloniako Wielkopolska eskualdeko ordezkaritza batek Euskadi bisitatu du aste honetan, Eskualde Garapeneko Europako Funtsak (EGEF) finantzatutako “WIS-E 4 NET ZERO” proiektu europarraren barruan. Topaketak berrikuntza, ikerketa eta transferentzia teknologikorako jardunbide egokiak ezagutzea du helburu, euskal ekosistemako eragileekin eta Poloniako Wielkopolska eskualdeko Espezializazio Adimenduneko Foroko kideekin harremanak ezartzeaz gain.
Bisitaldia eskualde hartako Mariskalaren Bulegoko Ekonomia Departamentuak bultzatutako ekintzailetza arloko aurkikuntza-prozesuaren barruan antolatu da, berrikuntzan garapen aurreratua duten Europako lurraldeekiko eskualde-arteko ikaskuntza sustatu eta espezializazio adimenduneko eskualde-ekosistema indartzeko asmoz.
Horren harira, misioaren agenda Nagore Bonilla Basque Trade & Investmenteko zuzendari nagusiak euskal ekonomiaren ezaugarriak eta berrikuntza-ekosistema aurkezteko egindako ongietorriarekin hasi da.
Ondoren, Cristina Oyón SPRI Taldeko zuzendariorde nagusiak Eusko Jaurlaritzaren berrikuntza-politika azaldu ditu, baita ildo estrategiko nagusiak, azkenaldiko ekimenak eta espezializazio adimendunaren inguruko erronkak ere.
Jardunaldiarekin aurrera eginez, BIND 4.0 berrikuntza irekiko plataforma aurkeztu du Tristan Shedden plataformaren koordinatzaileak. Startupak industria arloko enpresekin konektatzea da plataformaren helburua, fabrikazio aurreratua, adimen artifiziala eta energia jasangarriak bezalako eremu estrategikoetan proiektu pilotuak garatzeko aukera izan dezaten.
Era berean, SPRIko taldeak Basque Digital Innovation Hub (BDIH) delakoaren funtzionamendua azaldu eta argi utzi du azpiegitura eta zerbitzu teknologikoen sare honen helburua enpresen eraldaketa digitala erraztea dela, bereziki ETEena.
Arratsaldean, ordezkaritza GAIA klusterraren egoitzan izan da, IKT, ingeniaritza eta teknologia aplikatuen arloetako enpresa-elkarte honek bultzatutako ekimenak bertatik bertara ezagutzeko.
Agendari jarraipena emanez, Bizkaiko Parke Zientifiko eta Teknologikora egindako bisitan, gertu-gertutik ezagutu ahal izan dute Zamudioko Tecnalia eta Derioko BIC Bizkaiaren jarduera. Innobasque Berrikuntzaren Euskal Agentziarekin bilera bat egitea ere aurreikusia dute, euskal ekosistemaren gobernantza eta lankidetza publiko-pribatuak eskualdeko berrikuntzaren sustapenean duen eginkizuna ardatz.
Basque Trade & Investmentek (BasqueTrade) hartutako misio hau bat dator agentziak euskal enpresen nazioartekotzea sustatu eta Europako eskualdeekiko lankidetza bultzatzeko finkatua duen helburuarekin. SPRI Taldearen barruan, BasqueTradek atzerriko inbertsioa erakartzen eta euskal enpresa-sarearen kanpo-proiekzioa errazten lagun dezaketen ekimenak koordinatzen ditu, lurraldeko ekosistema ekonomiko eta instituzionaleko beste eragile batzuen lankidetza estuarekin.
Gainera, Varsovian duen bulegoaren bitartez, aholkularitza pertsonalizatua eskaintzen die merkatu horretan sartu nahian dabiltzan euskal enpresei.
