Lehendakariak aliantza politiko berri bat aldarrikatu du, Europak “benetako autonomia” izan dezan bere berrindustrializazioan

• Parte hartu duten 14 industria-lurraldeek balio-kate estrategiko nagusietan (teknologia garbi eta digitalekin hasi eta bioteknologiarekin eta bizitzaren zientziekin amaitzeraino) betetzen duten funtsezko zeregina aldarrikatu dute
• “Europako lurraldeen, estatu kideen eta erakundeen arteko aliantza berritu baterako deia egiten dugu. Horrela baino ez dugu lortuko Europa arin eta erabakitzaile bat, benetako autonomia politikoa izango duena”, defendatu du lehendakariak

Imanol Pradales Lehendakariak amaiera eman dio astearte honetan Leaders Meeting – Fit for the Future goi-bileraren bigarren edizioari, Euskalduna Jauregian egindako ekitaldi batean. Ekitaldia amaitzeko, ‘2026ko Bilboko Adierazpena’ sinatu da, foroan parte hartu duten 14 industria-lurraldeen posizionamendu politiko eta estrategikoa zehazten duen dokumentua. Dokumentu horretan, industria-lehiakortasunaren, berrikuntzaren eta teknologia estrategikoen arloko konpromiso komunak jasotzen dira. “Europako lurralde, eskualde eta nazio industrializatuenak eta berritzaileenak prest gaude batuta, asmo handiz eta etorkizun-senarekin jarduteko. Une erabakigarri honetan Europako autonomia politikoa eta estrategikoa bermatzeko gakoa gara”, ziurtatu du Lehendakariak.

Azelerazio teknologikoaren, tentsio geopolitikoen eta gizarte-aldaketa sakonen testuinguru honetan, ‘Bilboko Adierazpenak’ Europak oparotasun jasangarria, industria-lehiakortasuna eta autonomia estrategikoa sortzeko duen ahalmena indartzeko beharra azpimarratzen du. “Estatu azpiko errealitateek eta lurraldeek ahots propioa izan behar dugu, eta Europa berpizteko erabakietan, inbertsioetan eta gobernantzan parte hartzeko gaitasuna”, defendatu du Imanol Pradalesek”.

Ildo horretan, izenpetutako testuak borondate eta anbizio politiko hori islatzen du, eta Europar Batasunaren funtzionamendu instituzionala sakonean berrikusteko beharra adierazten du. “Ziurgabetasunari ibilbide-orri zehatz batekin aurre egiteko elkarrekin jardutea erabaki dugu. Urrats bat egin dugu Europaren subiranotasuna klusterren eskutik indartzeko, hiru arlo estrategikoetan: teknologia garbiak, adimen artifiziala eta kuantikoa, eta osasuna eta bioteknologia”, azpimarratu du Pradalesek.

Era berean, lankidetza publiko-pribatua eraldaketarako elementu estrategiko gisa sendotzen da ekimenean parte hartzen duten klusterren bidez jorratutako funtsezko hiru sektoreetan: Teknologia Garbiak, Teknologia Digitalak, hala nola adimen artifiziala eta kuantikoa eta Biozientziak.

Bilboko Adierazpenak elkarren mendekoak diren lau printzipiotan oinarritutako ikuspegi partekatu bat egituratzen du. Printzipioak honako hauek dira:

• Maila anitzeko gobernantza, agindu estrategiko gisa: Europaren eraldaketa-ahalmenak Europaren, estatuen eta eskualdeen arteko lankidetza eraginkorra behar du. Eskualdeak bazkide estrategikotzat hartu behar dira politikak diseinatu eta gauzatzeko garaian, eta, horregatik, subsidiariotasun-printzipioa benetan aplikatzeko, ikuspegi uniformeak gainditzeko eta lurralde-aniztasuna aitortzeko eskatzen da.
• Lehiakortasuna, industria-lidergoa eta balio-kateen erresilientzia: industria-politikak ikerketa, berrikuntza eta lankidetza bultzatu behar ditu balio-kate osoan, eta Europaren lidergoa sendotu behar du esparru estrategikoetan, hala nola teknologia garbietan, digitalizazioan, erdieroaleetan, mikroelektronikan eta bioteknologian.
• Berrikuntza, ezagutza eta eskumenak gizarte inklusibo baterako: Europako bikaintasun zientifikoak lehiakortasun globala ekarri behar du. Adierazpenak inbertsio handiagoa eskatzen du I+G+B arloan eta azpiegitura zientifiko, digital eta teknologikoetan, baita finantzaketa pribatua lortzeko aukera hobea ere.
• Jasangarritasuna eta trantsizio berdea: adierazpenak energia garbiekiko, ekonomia zirkularrarekiko eta mugikortasun jasangarriarekiko konpromisoa berresten du, eta jasangarritasunak, lehiakortasunak eta inklusioak batera aurrera egin behar dutela azpimarratzen du.

Europako ekintzarako deia

Adierazpenaren arabera, datozen urteak erabakigarriak izango dira Europako anbizioak ageriko emaitza bihurtzeko. Ildo horretan, 2027. urtearen ondorengo Urte Anitzeko Finantza Esparruak eskualdeek Europako industria- eta berrikuntza-agendan bazkide estrategiko gisa betetzen duten zeregina erabat aitor dezan eskatzen du Adierazpenak. “Europako lurraldeen, estatu kideen eta erakundeen arteko aliantza berritu baterako deia egiten dugu. Horrela baino ez dugu lortuko Europa arin eta erabakitzaile bat, benetako autonomia politikoa izango duena”, ziurtatu du Lehendakariak.

Azkenik, ‘Bilboko Adierazpenean’ adostutakoa lehenbailehen gauzatzeko konpromisoa hartu du Lehendakariak. “Ardura erabakigarria dugu: industria oinarria indartuz, demokrazia eta Europa indartzea. Ezinbestekoak gara Europar politikek arrakasta eta benetako inpaktua izan dezaten. Ez bakarrik horiek ezartzerakoan, baita diseinuan eta ebaluazioan ere”, amaitu du.

Mikel Jauregi sailburuak Leaders Meeting ekitaldian parte hartu du

Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak “Leaders Meeting – Fit for the Future” Europako goi-bilera industrialaren bigarren jardunaldiari hasiera emateko saioan parte hartu du gaur goizean. Goi-bilera horretan parte hartu duten 14 lurralde industrialetako ehun ordezkari politiko eta ekonomikok baino gehiagok hartu dute parte.

Mikel Jauregik ireki ditu foro ekonomiko eta politiko nagusia eta sektore pribatuaren topaketa espezifikoa, 40 kluster inguruk parte hartu duten jardunaldian, hiru eremu teknologiko estrategikoren inguruan: teknologia garbiak, teknologia digitalak (adimen artifiziala eta kuantikoa) eta biozientziak.

Topaketak Europako industria-lurralde nagusietako ordezkari politiko eta ekonomikoak biltzen ditu, eskualdeen arteko lankidetza indartzeko eta Europaren autonomia estrategikoan aurrera egiteko.

Sailburuaren hitzetan, “Europan autonomia estrategikoa behar dugu, hau da, Europak gure erabakiak hartzeko duen gaitasuna. Bereziki, industria, teknologia, energia eta segurtasuna bezalako eremu estrategikoetan. Europak berrindustrializazio sakona behar du, eta guk, Euskaditik, Herri industrial txiki honetatik, prozesu honen protagonista izan nahi dugu. Munduko ekonomiaren hodeiak gorabehera, datuek erakusten dute euskal industria erresilientea dela eta Europaren berrindustrializazioaren protagonista izan nahi dugula “.