Eusko Jaurlaritzak Agenda 2030 sustatuko du udako ikastaro baten bidez
SPRI Taldeak Euskal Herriko Unibertsitatearen (EHU) Bilboko egoitzan antolatuko den ekitaldian parte hartuko du irailaren 17 eta 18an
Eusko Jaurlaritzako Kanpo Harremanetarako Zuzendaritzak udako ikastaro bat antolatu du datorren irailaren 17 eta 18rako Euskal Herriko Unibertsitateak (EHU) Bilbon duen egoitzako Bizkaia Aretoa eraikinean. Ikastaro horretan hizpide hartuko dira Agenda 2030 nazioarteko proiektua (garapen jasangarria bultzatzea helburu duena) eta Garapen Jasangarriko Helburuak (GJH).
Ekimen honen helburua da ezagutzera ematea Agenda 2030 proiektuak sektore pribatuarentzat dakartzan aukerak eta enpresak proiektu hori inplementatzeko erabiltzen ari diren estrategiak, horrela, parte-hartzaileek Agendako edukiak eta diskurtsoa txertatu ditzaten euren lan-espazioetan.
Ikastaroan elkarrekin bilduko dira ETEetako, enpresa handietako edo klusterren erakunde dinamizatzaileetako ordezkariak. SPRI Taldetik parte hartuko dute Nazioartekotzeko Euskal Agentziako (Basque Trade & Investment) zuzendari Ainhoa Ondarzabalek eta SPRIko Klusterren Koordinazio arloko David Fernández Terrerosek.
Izena emateko epea zabalik dago esteka honetan, eta bertan dago baita ere ikastaroaren egitarau osoa.
Eusko Jaurlaritzak gai honi buruzko udako ikastaro batean parte hartu zuen iaz Nazioartekotzeko Agentziako zuzendariaren bitartez. Gasteizen eginiko ikastaro hartan argi utzi zen Agenda 2030 “gelditzeko etorri dela”.
