Euskal sektore aeronautikoa Txinara joan da Asiako merkatua gertutik esploratzeko
Txinak aireontziak fabrikatzeko duen gaitasuna areagotzen eta industria-kate propioa garatzen jarraitu du, eta datozen 15 urteotan munduko abiazio-merkaturik handiena izango da. Testuinguru honetan, COMACek, herrialde hartako aeronautika arloko jatorrizko ekipoen fabrikatzaie (OEM) nagusiak, aurrera egin du ARJ21 eta C919 hegazkin komertzialen programekin eta C929aren garapenarekin, maila globalean funtsezko eragiletzat posizionatuz.
Merkatu hau sakon ezagutzeko asmoz, euskal enpresen ordezkaritza bat Txinan dago bisitari aste honetan, SPRI Taldeari atxikitako Basque Trade & Investment (Basque Trade) euskal enpresak nazioartekotzeko agentziak antolatutako enpresa-misio batean, lurraldeko konpainien parte-hartzea sustatu eta sektore honetako Txinako eragile estrategikoekiko harremanak errazteko.
Aernnova, Tubacex, Ibarmia, GH Cranes & Components, Couth, Ona, Soraluce S. Koop, Glual, MCC, Tecnalia, Fagor Automation eta Trimek euskal enpresak dira ordezkaritzako kideak. Horiek guztiek BasqueTradek Txinan duen lantaldeak lagunduta parte hartuko dute agendan, Nagore Bonilla agentziako presidenteordea eta Yuete Ye Wu bulegoko zuzendaria.
Misio honen bitartez, euskal enpresei goi mailako harremanak ezartzeko aukera eskaini nahi zaikie COMACekin, AVIC Tier 1eko bere hornitzaile nagusiarekin, eta aireko mugikortasun elektrikoaren ekosistema emergentearekin (eVTOL). Horretarako, agendak hiru jardunaldi aurreikusi ditu beste horrenbeste hiritan: Shanghai (COMAC, helburu), Wuhu (eVTOL sektorea) eta Shenyang (AVIC, helburu).
Programaren barruan, hitzaldi tematikoak antolatu dira hornidura-kateaz, aeronatikako ekoizpenaz eta aireko mugikortasun elektrikoaz, baita mahai-inguruak, B2B bilerak eta COMAC, AVIC eta eVTOL sektoreko enpresen instalazioetarako bisita gidatuak ere.
Ildo horretan, BasqueTradek etengabeko presentzia du Txinan Shanghaiko bulegoaren bitartez, eta bertatik, arreta pertsonalizatua eskaintzen die dagoeneko herrialde hartan lanean diharduten enpresei eta horretarako interesa dutenei, aholkularitza estrategikoa emanez eta bertan ezartzeko nahiz herrialdean dauden negozio-aukerak identifikatzeko laguntza eskainiz.
