Euskal enpresek Marokoko automobilgintza sektorea esploratu dute web-mintegi batean
Maroko Afrikako iparraldeko industria-polo nagusietakotzat sendotu da azken urteotan, bereziki automobilgintzaren sektorean. Herrialdearen kokapen estrategikoa, logistika-sare aurreratua eta Europar Batasunarekin zein Estatu Batuekin abian dituen merkataritza-akordioei esker, funtsezko eremutzat posizionatu da ibilgailu eta osagaien fabrikazio eta inportaziorako.
Merkatu honek dituen aukerak eta erronkak aztertu nahian, SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziak web-mintegia antolatu du aste honetan ACICAE Euskadiko Automobilgintza Klusterraren lankidetzaz, industria honek Afrika Iparraldean izandako garapenari buruzko ikuspegi integral eskaintzeko, Marokori arreta berezia emanez.
Saioan automobilgintza sektoreak Afrikako herrialde horretan duen egungo egoera eta etorkizuna aztertu dira beste hainbat alderdiren artean, baita Europan duen inpaktua eta eremu franko, hornidura-kate eta elektrizitate-plataforma berrien inguruko aukerak eta erronkak ere. Era berean, merkatu horrek euskal enpresei eta enpresa globalei eskaintzen dizkien abantaila estrategikoak aztertu dira, ezarpen-prozesuetan zein esportazio eta inportaziorako eragiketetan.
Gainera, merkatu horretan arrakasta lortzeko beharrezkoak diren gai kulturalak eta operatiboak partekatu dira, herrialdean ezarrita dauden enpresen egiazko esperientziekin aberastuta.
Web-mintegiak, hedatzeko, esportatzeko zein lehiatzeko aukerengatik Maroko merkatu estrategikotzat jotzen duten osagaien sektoreko (TIER 1, 2 eta 3) eta makineriaren sektoreko euskal enpresei zuzenduta, lehen mailako hizlariak izan ditu partaide, eta horien artean zeuden Marokoko enpresa-ingurunean esperientzia zuzena duten euskal konpainiak, GEOCAD, Teknia, IC Groupe eta PKF kasu.
Topaketak 90 parte-hartzaile baino gehiago zituen izena emanda, eta Marokok Afrika Iparraldeko automobilgintzako hub nagusitzat duen posizionamendua azpimarratu du, beste merkatu batzuen aldean eskaintzen dituen lehiatzeko abantailak agerian utziz. Horien artean, beren-beregi nabarmendu dira Ekialdeko Europakoak baino lan-kostu nabarmen txikiagoak, eremu franko espezializatuak, Tanger Med portuari lotutako sare logistiko modernoa eta atzerriko inbertsioaren mesedeko gobernu-pizgarrien esparrua.
Era berean, Marokok fosforoa eta kobaltoa bezalako lehengai kritikoen hornitzaile estrategikotzat duen eginkizun gero eta garrantzitsuagoa nabarmendu da, Txina bezalako herrialdeen inbertsio estrategikoak erakartzeko modukoa alegia, balio-kate globalen barruan duen garrantzia are gehiago sendotuz.
