Euskadik osasun arloko berrikuntzan duen posizioa indartu du Alemaniako MedtecSUMMIT 2025 delakoan
SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren ordezkaritza bat Nurembergera joan zen otsailean, Basque Health Clusterraren ordezkariekin batera, MedtecSUMMIT 2025 delakoan parte hartzeko. Ekitaldi honek industria, zientzia, politika eta medikuntza arloetako nazioarteko 785 aditu bildu zituen, eta bertan parte hartzearen helburua Euskadik osasun arloko berrikuntzan duen eginkizuna indartzea izan zen, nazioarteko lankidetzarako aukera berriak esploratzeaz gain, bereziki Bavariako erakundeekin, Bayern Innovativ eta Medical Valley EMN kasu.
Topaketan, euskal ordezkaritzak Bavariako erakunde garrantzitsuekiko harremanak estutu eta lankidetzarako arloak jorratzeko aukera izan zuen, medikuntza arloko gailuei aplikatutako adimen artifiziala eta osasun digitala tarteko. Interakzio horiek ageri-agerian utzi zuten Euskadik osasunaren arloko soluzioen garapenean parte hartzeko duen gaitasuna, Europako osasun-ekosistemako bazkidetzat duen posizioa berretsiz.
Bisitaren une garrantzitsuetako bat Nurembergeko gazteluan egindako harrera izan zen, Tobias Gotthardt Bavariako Ekonomia, Energia eta Eskualde Garapenerako Estatu Idazkaria buru, izan ere, ekitaldi honi esker, bertaratutako ordezkaritzek ideiak trukatu eta lankidetza-aukera berriak esploratu ahal izan zituzten, erakunde zein enpresa mailetan, etorkizunean Euskadi eta Bavariaren arteko aliantza berriak gauzatzeari ateak irekiz.
Ekitaldian hainbat euskal enpresak ere parte hartu zuten, eta horien artean zegoen Ulma Medical Technologies. Erik Isusquiza merkataritza-zuzendariak “Artificial Intelligence – Opportunities, Use Cases and Return of Investment” izenburuko panelean parte hartu eta beren-beregi nabarmendu zuen nola eraldatzen ari diren terapien optimizazioa eta pazienteen kudeaketa adimen artifizialaren eraginez. Ulma Medical Technologies-ek osasunaren arloko teknologia aurreratuen ezarpenean izandako esperientzia partekatu zuen sektoreko beste enpresa garrantzitsu batzuekin batera, euskal enpresek soluzio berritzaileen ezarpenean duen presentzia sendotuz.
Euskal ordezkaritzak MedtecSUMMIT 2025 delakoan izandako parte-hartzeari esker, lurraldeak osasun sektorearen nazioartekotze eta berrikuntzaren alde hartutako konpromisoa indartu da. Ekitaldian landutako harremanek aukera berriak irekiko dizkiete euskal enpresei, baterako proiektuetarako sarbidea, Europako finantzaketa eta teknologien balidazioa erraztuz. Bavaria hedapenerako gune estrategikoa izanik, Euskadik aurrera jarraitzen du osasun arloko berrikuntzaren erreferentetzat finkatzeko helburuari begira, nazioarteko hazkunde eta lankidetzarako aukera berriak sustatuz.
