Euskadik eta Australiak harremanak estutu dituzte industriaren eta energiaren arloan
-
- “Aste honetan aurkeztu dugun Industria Plan berriak Euskadin atzerriko inbertsioa erakartzea funtsezko alderdietako bat dela azpimarratzen du. Gure ahalmen industrial eta teknologikoak Australia bezalako aukera-merkatuetan ezagutarazteko unea da, Euskadi atzerriko enpresak Europar Batasunean sartzeko atea izan dadin”, azpimarratu du Jauregik.
Mikel Jauregi Industria, Trantsizio Energetiko eta Jasangarritasuneko sailburuak aldebiko bilera egin du gaur Rosemary Morris-Castic Australiako enbaxadorearekin. Bilerak energiaren, industriaren eta meatzaritzaren arloetan Euskadi eta Australiaren arteko lankidetza-agenda partekatuan aurrera egiteko balio izan du, eta Nagore Bonilla SPRI Taldeko Basque Trade & Investment – Nazioartekotzeko Euskal Agentziako zuzendariak eta Asier Areitio, Kanpo Harremanetarako Idazkaritza Nagusian Kanpo Harremanen eta Organismo Multilateralen zuzendariak ere parte hartu dute Eusko Jaurlaritzaren aldetik.
Bileran, funtsezko sektoreetan aldebiko lankidetzarako aukerak aztertu dituzte, hala nola energia berriztagarrietan, hidrogenoaren balio-katean, deskarbonizazio-teknologietan, industria aurreratuan eta lehengai kritikoen garapen jasangarrian. Bi ordezkaritzak bat etorri dira trantsizio energetikoko eta industrializazioko estrategiek aliantza publiko-pribatu sendo eta iraunkorrak eraikitzeko ahalmena eskaintzen dutela.
“Australia aukera-merkatua da Euskadirentzat”, nabarmendu du Mikel Jauregik. “Estatu Batuetako Gobernuak abiatutako muga-zergen gerraren ondorioz, gure industriarentzat merkatu berriak bilatu behar ditugu, eta, horregatik, gure apustua da beste lurralde batzuetara hedatzen jarraitzea, Australiara, adibidez. Euskadi globalaz ari garenean, gure herrialdea munduan abangoardiako industria duen lehen mailako bazkide gisa ezagutzea bilatzen dugu. Atzerriko inbertsioak erakartzeko eta euskal enpresari nazioartekotzen laguntzeko ari gara lanean”.
“Aste honetan aurkeztu dugun Industria Plan berriak Euskadin atzerriko inbertsioa erakartzea funtsezko alderdietako bat dela azpimarratzen du. Gure ahalmen industrial eta teknologikoak Australia bezalako aukera-merkatuetan ezagutarazteko unea da, Euskadi atzerriko enpresak Europar Batasunean sartzeko atea izan dadin”, amaitu du Jauregik.
Euskadiko Kanpo Sareak bulego komertzial bat du Sidneyn 2024tik, eta identifikatu du gero eta euskal enpresa gehiago daudela Australian, eta horiek interes komertzialak eta estrategikoak dituztela. Enpresa horiek energiaren, ingeniaritzaren, automobilgintzaren eta meatzaritza teknologikoaren sektoreetan dihardute, besteak beste, eta Asia-Pazifikoa ardatzean euskal nazioartekotzearen dinamismoaren adibide dira.
Halaber, aldebiko bileran, Eusko Jaurlaritzaren interesa aztertu dute, Australiako motor ekonomiko nagusietako bat den eta Hego hemisferioko erreferentziazko industria-berrikuntzako poloa den Victoria Estatuarekin dituen harreman instituzionalak indartzeko. Bilera hori aliantza ekonomiko eta teknologikoak dibertsifikatzeko euskal estrategiaren parte da, batez ere osagarritasun handiko eta euskal enpresak hazteko potentzial handiko merkatuetan.
