Europar Batasunak zigor ekonomiko eta energetiko berriak onartu ditu Errusiaren aurka
Europar Batasuneko (EB) enbaxadoreek Errusiaren aurkako hamazazpigarren zigor-sorta onartu dute, Errusiak Ukrainaren aurka hasitako gerrari erantzunez. Zigor-sorta berriak murrizketa berriak ekarriko ditu ekonomiaren eta energiaren esparruetan.
Onartutako neurri horietan, beste 200 itsasontzi sartu zigortutako ontzien zerrendan, eta horrenbestez, 342 dira guztira portu eta zerbitzuetara sartzea debekatua duten itsasontziak. Neurriek, halaber, aldez aurreko zigorrak saihestuz Errusiako petrolio gordina garraiatzeko erabiltzen den “itzalpeko flota” delakoari eragingo diote.
Ekonomiaren arloan, Errusiako industria militarrari lotutako edo zigorrak saihestean inplikatutako 30 finantza-erakunderekin negozioak egitea debekatu zaie EBko enpresei, bereziki erabilera bikoitzeko ondasunekin (zibila eta militarra) zerikusia dutenei. Gainera, zigortutakoen zerrenda luzatu da, Errusiako gerra-makineriarekin lotura zuzena duten 75 pertsona eta enpresa gehituz, hauen jarduerek Moskuren ahalegin militarrari eusteko ondasunen ekoizpena eta banaketa barne hartzen dituzten heinean. Zigor hauei lotuta, aktiboak izoztuko zaizkie Europako lurraldean eta debekatua izango dute EBko herrialdeetan sartzea.
Paketeak teknologia esportatzeko murrizketak areagotu ditu, misiletan erabilitako prekurtsore kimikoak eta doitasunezko makineriarako funtsezko osagaiak barne. Horrekin batera, 2026ko ekainera arte luzatu da Sakhalin-2 proiektutik Japoniara petrolio gordina garraiatzeko salbuespena.
Energiaren esparruan, Europako Batzordeak REPowerEU ibilbide-orria aurkeztu du, Errusiako erregai fosilekiko (petrolioa, gasa eta energia nuklearra) mendekotasuna pixkanaka-pixkanaka eta modu koordinatuan eteteko plan estrategikoa. Plan honetan zehaztu denez, Errusiako energia-inportazioak apurka-apurka ezabatuz joango dira horniduraren segurtasuna bermatu eta prezioen gaineko inpaktuak minimizatzeko asmoz. Proposamenean aurreikusi denez, estatu kideek plan nazionalak aurkeztu behar dituzte urtea amaitu baino lehen, trantsizio honetan nola lagunduko ote duten zehazteko.
Gasaren sektorean, Batzordeak hainbat neurri proposatuko ditu ekainean, Europako merkatuetan Errusiako gasaren gardentasuna, jarraipena eta trazabilitatea hobetzeko asmoz. Errusiako hornitzaileekin kontratu berriak egitea debekatuko da, gasbide bidezko gasa zein gas natural likidotua (GNL) eskuratzeko, eta indarrean dauden kontratuak deuseztatuko dira 2025aren amaiera baino lehen. Horrez gain, 2027ko amaierarako Errusiako gas-inportazio guztiak eteteko asmoa dago.
Aldi berean, EBk bere lege-esparrua zabaldu du itsaspeko kableak, aireportuak, zerbitzariak eta bestelako azpiegiturak kaltetzen dituzten itsasontzien aurka jarduteko eta Errusiak Ukrainaren aurka hasitako gerran inplikatuta dauden komunikabide eta finantza-erakundeei aurre egiteko.
Euskal enpresei egoera honi buruzko azken eguneratzeak eskuratzeko aukera bermatzearren, BasqueTradek jarraipen sistematikoa egiten die, Errusiak Ukrainan egindako inbasioaren harira Europar Batasunak abiarazitako politikei eta zigor-sortei.
