Europar Batasuna Estatu Batuekin negoziatzen ari da merkataritza arloko akordioa lortzeko
Europar Batasunak (EB) Estatu Batuekiko negoziazioak areragotu ditu, uztailaren 9a baino lehen akordio bat lortzeko eta Etxe Zuriak bultzatutako muga-zergen igoera geldiarazteko. Apirilaren 9an, Trumpek elkarrekiko muga-zergak 90 egunez etetea iragarri zuen, eta ondorioz, EBk bitarte horretan AEBek altzairu eta aluminioaren gainean ezarritako muga-zergen aurkako kontraneurriak etetea erabaki zuen. Erabaki honen laguntzaz, elkarrizketa-aldia ireki ahal izan da irtenbide negoziatua aurkitzeko asmoz.
Elkarrizketa-txanda honen barruan, Maroš Šefčovič Europako Merkataritza komisarioa Estatu Batuetako ordezkariekin bildu da industria-ondasunen gaineko muga-zergak kentzea planteatzeko, automobilak barne hartuta, eta energia eta teknologia bezalako sektoreetan bi aldeen arteko lankidetza sustatzeko.
Maiatzaren 30ean, Trumpek iragarri zuen altzairu eta aluminioaren gaineko muga-zergak % 25etik % 50era igoko zirela ekainaren 4tik aurrera. Karga horiek, automobilen zein osagaien gainean indarrean daudenekin batera, beren horretan mantenduko dira negoziazioek irauten duten bitartean. Horri erantzunez, Europako Batzordeak bi aldeentzat onargarria den konponbide bat lortzeko prest zegoela berretsi zuen, baina akordiorik lortu ezean, Europako kontraneurriak, dagoeneko onartutakoak zein gehigarriak, uztailaren 14an indarrean sartuko zirela ohartarazi zuen, edo lehenago, egoerak horretara behartzen badu.
Batzordearen esanetan, AEBetako muga-zergek Europak Estatu Batuetara egindako esportazioen % 70i eragiten diete, 382.000 milioi euro inguruko inpaktuarekin. Sektorerik kaltetuenan artean, automobilgintza (66.000 milioi euroko esportazioak) eta altzairua (26.000 milioi euroko esportazioak) daude.
Testuinguru honetan, EBk jarduketa-bide bikoitza diseinatu du. Alde batetik, pizgarriak eskaintzen ditu energia arloko inbertsioak bultzatzeko, 5G eta 6G sare mugikorretan lankidetza garatzeko, eta altzairuan, aluminioan, erdieroaleetan, farmazia-produktuetan, auitomobilgintzan eta antzeko sektoreetan lankidetza estrategikoa errazteko. Bestetik, bi kontraneurri-multzo prestatu ditu. Lehenengoak, onartuta baina uztailaren 14ra arte etenda, % 25eko muga-zergak aurreikusi ditu AEBetako produktuetarako, soja, ehungintza eta makineria barne. Bigarrenak, ekainaren 10era arte kontsulta publikoaren fasean dagoenak, 95.000 milioi euroko guztizko balioa duten muga-zergak aurreikusi ditu inportazioetarako, hegazkinak, autoak, produktu kimikoak eta edari alkoholdunak barne hartuta. Era berean, Europatik Estatu Batuetara altzairuzko txatarraren eta produktu kimikoen esportazioak murriztea proposatu da, 4.400 milioi euroko balioarekin.
Aldi berean, Europako Batzordeak argi utzi du Munduko Merkataritza Erakundearengana jotzeko prest dagoela, Estatu Batuetako muga-zergek erakunde horren oinarrizko arauak urratzen dituztela iritzita.
