Europako Batzordeak ‘Raw Materials Mechanism’ aktibatu du lehengai estrategikoak modu bateratuan erosteko
Europako Batzordeak Raw Materials Mechanism jarri du martxan, Europako industriaren erresilientzia eta lehiakortasuna indartzeko diseinatutako EU Energy and Raw Materials Platform-en barneratutako tresna. Mekanismo honek topagune digital gisa funtzionatzen du; Europar Batasuneko (EB) erosleak nazioarteko hornitzaileekin eta biltegiratze-zerbitzuekin lotzen ditu, eta lehia handiko merkatu global batean funtsezko horniduretara sartzea errazten du.
Plataforma honen funtzio nagusia eskariaren agregazioa da. Sistema honen bidez, enpresek euren banakako erosketa-beharrak Europako beste konpainia batzuenekin elkartu ditzakete, merkatu globalaren aurrean erosle handi bakar gisa aritzeko. Bolumen horiek batzean, enpresek, bereziki ETEek, euren negoziazio-posizioa indartzen dute eta banaka lortzen zailak izango liratekeen nazioarteko hornitzaileengana iristen dira. Ekimen hau EBren estrategiaren barruan kokatzen da, Lehengai Kritikoen Legean (CRMA) zehaztutako 17 material estrategikoen hornidura bermatzeko.
Nabarmentzekoa da, plataformak kontaktua eta agregazioa errazten baditu ere, azken prezioen negoziazioa eta kontratuen formalizazioa tresnatik kanpo egiten direla.
Egutegia eta sektoreak
Martxoan ofizialki merkaturatu ondoren, jarduera-kronogramak bere lehen dibertsifikazio-txanda aktibatu du 2026ko apirilean. Hasierako fase honek honako material estrategikoen talde hauek lehenesten ditu:
- Lur arraroak.
- Defentsa-sektorerako lehengaiak.
- Baterietarako material estrategikoak.
Berehalako erosketetaz gain, mekanismoak proiektuak garatzeko ildo bat aurreikusten du epe luzerako erosketa-akordioak errazteko. Honen helburua da Europako lurretan materialak ekoizteko eta eraldatzeko gaitasuna handitzeko beharrezkoak diren inbertsioen arriskua murriztea.
Industriarako abantailak
Mekanismo honetan parte hartzeak onura operatibo zuzenak eskaintzen ditu:
- Negoziatzeko ahalmena: Eskaria batzeak eskala-ekonomiak lortzea eta hornidura-baldintzak hobetzea ahalbidetzen du.
- Kide estrategikoekiko konexioa: EBk lehengaien arloan merkataritza-akordioak edo aliantza estrategikoak dituen 15 herrialdeetako hornitzaileetarako sarbidea, hala nola Kanada, Australia, Norvegia, Argentina edo Txile.
- Finantza laguntza: Plataformak finantza-erakundeen panel bat barne hartzen du hornidura- eta prozesamendu-proiektuei laguntza emateko.
- Hornidura-segurtasuna: Biltegiratze-zerbitzuak identifikatzeko eta balio-katea prezioen hegazkortasunetik babesteko tresnak.
Plataforman erregistratzea
2026ko negoziazio-txandetan parte hartzeko, enpresek aldez aurretik erregistratu behar dute Europako Batzordearen atari ofizialean. Izapide horrek EU Login erabiltzea eta eguneratutako legezko dokumentazioa aurkeztea eskatzen du. Erregistroa aldez aurretik egitea gomendatzen da, lehen txanda ireki aurretik egiaztagirien balidazioa ziurtatzeko.
Interesa duten enpresek plataformara sartu eta erregistroa izapidetu dezakete esteka honetan.
Informazio-webinarra
Lehen txanda honen funtzionamendu teknikoa azaltzeko eta plataformaren erakustaldi bat egiteko, webinar bat egingo da apirilaren 23an, osteguna, 15:00etatik 16:30era CET. Saioak aholku praktikoak emango ditu eta egungo fasearen kronograma zehaztuko du; erosleentzako eskaerak aurkezteko epea ekainaren 5era arte (ostirala) egongo da zabalik.
Webinarrera joateko interesa duten enpresek apirilaren 22a (asteazkena), 12:00ak CET baino lehen eman behar dute izena esteka honen bidez.
