Eusko Jaurlaritzak Tzitzikostas komisarioaren aurrean defendatu du eskualdeek automobilgintzaren sektorearen eraldaketan duten funtsezko zeregina
Eusko Jaurlaritzako Industriako sailburuordeak, Andoitz Kortak, Garraio Jasangarriko eta Turismoko Europako komisarioaren (Apostolos Tzitzikostas) aurrean hitz egin du, Estrasburgon egindako Automobilgintzarako Eskualdeen Aliantzaren Konferentziaren markoan. Bertan, eskualdeek Europaren Automobilgintzarako Ekintza Plana ezartzeko duten funtsezko zeregina defendatu du, prozesu horretan Euskal Herriak dituen esperientzia eta lidergoa azpimarratuta. Korta Estrasburgora joan da SPRI Taldearen Basque Trade & Investmenteko zuzendariarekin, Nagore Bonillarekin.
«Industria- eta teknologia-eraldaketaren arrakasta hura eraikitzen jakitearen araberakoa izango da, lurraldeekin eta haietatik» baieztatu zuen Kortak, gogora ekarrita eskualdeek zuzenean ezagutzen dituztela haien industria-ehunaren gaitasunak, erronkak eta aukerak. Ildo horretatik, Europako gobernantza-esparru bat aldarrikatu zuen. Esparru horrek, eskualdeak kontsultatzeaz gain, eskualdeak planaren betearazpenean aktiboki integratuko ditu, betiere, sostengua emanda Europako Eskualdeen Batzordeari, komisioarekin elkarrizketa egituratua izateko.
Haren esku-hartzean, sailburuordeak nabarmendu zuen Euskadi eremu oso industriala dela; bertan, automobilgintzak manufaktura-ekoizpenaren % 25 hartzen du eta balio-kate aurreratua, espezializatua eta nazioartekotua du. Azpimarratu zuen Euskadik industria-politikaren erdigunean jarri dituela berrikuntza, digitalizazioa eta trantsizio energetikoa, Europako Planaren oinarriekin bat datozen ekimen zehatzak garatuta.
Horien artean, berrikuntzako hubak sustatzea azpimarratu zuen, hauek garatzeko eta probak egiteko: mugikortasunari aplikatutako adimen artifizialaren irtenbide aurreratuak, ibilgailu autonomoen proiektu pilotuak, software-plataforma irekiak eta modularrak, eta ibilgailuetan sartutako sistemen zibersegurtasuna indartzea, NIS2 Zuzentarauaren ildo beretik.
Era berean, balioa eman zion Euskadik duen konpromisoari, ibilgailuek sortutako datuen kudeaketa etikoa eta eraginkorra izan dadin, berrikuntza errazten duten bertako plataformen garapena sustatuta, erabiltzaileen eskubideak konprometitu gabe.
«Ezin da egon digitalizaziorik talenturik gabe, ezta lidergorik ere lurralde-kohesiorik gabe», baieztatu zuen, Euskadiko lankidetza publiko-pribatuaren eredua azpimarratuta enpresen, teknologia-zentroen, unibertsitateen eta lanbide heziketaren artean, non berrindustrializazio-estrategia finkatzen den.
Amaitzeko, Kortak gogorarazi zuen automobilgintza-industriak bizi duen trantsizioa ez dela teknologikoa bakarrik, ekonomikoa, soziala eta lurraldekoa ere bada, eta eskualdeek Europaren aliatu estrategiko moduan duten zeregina aitortzen duten politikekin heldu behar zaio.
Prestakuntza eta talentua, oinarri estrategiko moduan
Bestalde, Kortak azpimarratu zuen Euskadik talentuaren, prestakuntzaren eta berrikuntzaren estrategia integrala garatu duela, automobilgintzaren sektoreari aplikatua, eta bat datorrena Europako Planaren ardatzekin. AIC – Automotive Intelligence Center jarri zuen adibide moduan, nazioarteko bokazioa duen automobilgintza-zentroa eta ekosistema bakar batean berrikuntza, prestakuntza aurreratua eta teknologia-elkarrekintza barne hartzen dituena. AIC Academyren lana ere nabarmendu zuen, zibersegurtasuneko, konektibitateko eta mugikortasun adimenduneko espezializazio-programak eskaintzen baititu, baita gazte talentudunei eskainitako prestakuntza goiztiarra ere.
Era berean, sailburuordeak lanbide heziketako EAEko eredua azpimarratu zuen, Europan aitortua enpresa-ehunarekin duen lotura estuagatik, baita teknologiara egokitzeko eta ikuspegi praktikoa izateko gaitasunagatik ere. «Berariazko prestakuntza-zikloak diseinatu ditugu, lan-munduratze oso altuarekin: karrozeria aurreratua, konektatutako ibilgailuak eta automobilgintzaren kudeaketa digitala», azaldu zuen.
Gainera, jakinarazi zuen Euskadi unibertsitateko master berriak bultzatzen ari dela fabrikazio aurreratuko tekniketan eta automobilgintzari aplikatutako zibersegurtasunean, hainbat zentrorekin elkarlanean, hala nola Basque Automotive Manufacturing Center, Euskal Herriko Unibertsitatea eta Mondragon Unibertsitatea. «Esfortzu hori gure apustuaren parte da, sektorearen prestakuntza-beharrei aurre hartzeko eta erakargarritasuna indartzeko belaunaldi berrien artean», gehitu zuen.
