Euskadik bere energia-ekosistema aurkeztu die Japoniako eta Kanadako ordezkaritzei
Basque Trade & Investment-ek (BasqueTrade) Japonia eta Kanadako enpresa eta erakundeek osatutako ordezkaritza bat hartuko du aste honetan, Madrilen ospatzen ari den WindEurope nazioarteko azokaren baitan. Topaketak bi merkatuek euskal energia-ekosistemarekiko erakutsi duten interesari erantzuten dio, eta energia eolikoaren arloan lankidetza-bide berriak aztertzea du helburu nagusi.
Misio honen garrantzia Japonia eta Kanada itsas eolikoaren sektorean potentzial estrategikoa duten nazioarteko merkatuak izatean datza. Egoera horren aurrean, euskal industriak eskakizun tekniko handiko proiektuetan parte hartzeko aukerak identifikatu ditu, eta, horretarako, kaudimena eta gaitasun lehiakorrak egiaztatu ditu bere balio-kate osoan.
Bisita teknikoak eta enpresa-topaketak
Ostegunean, bisitaren programazioak zenbait ibilbide tekniko izango ditu, Euskadiko ekosistemak parte hartzen duen trantsizio energetikoko proiektuen ikuspegi orokorra eskaintzera bideratuak. Zehazki, Bilboko Portua, Tecnalia zentro teknologikoa eta EIC – Energy Intelligence Center bisitatu ahal izango ditu ordezkaritzak. Topaketa hauek Tecnalia, EIC Fundazioa, Alba/Petronor eta Parkeren laguntza ere izango dute.
Ostiralean, jarduerak Offshore Wind izango du ardatz. Gune horretan, euskal enpresek aukera izango dute Japoniako eta Kanadako itsas eolikoaren garapenean funtsezkoak diren erakundeekin zuzenean konektatzeko eta sinergiak identifikatzeko. Agenda osatzeko, Navacel eta Saitec Offshore konpainien azken garapen teknologikoak gertutik ezagutzeko aukera izango dute, haien instalazioetara bisita teknikoak eginez.
