AEBek altzairu, aluminio eta kobrezko produktuen 232. Ataleko muga-zergen araubidea aldatu dute
Ameriketako Estatu Batuetako Gobernuak metal jakin batzuen eta haien eratorrien inportazioari aplika dakiokeen arau-esparrua eguneratu du joan den apirilaren 2an sinatutako Aldarrikapen baten bidez. Neurri honek aldaketak sartzen ditu Trade Expansion Act delakoaren 232. Atalaren barruko kalkulu-metodologian eta zerga-tasetan, indarrean dagoen sistema sinplifikatzeko eta AEBetako aduanetan zerga-oinarriaren balorazioan distortsioak saihesteko helburuarekin.
Araudiaren berrikuntza nagusia zera da, muga-zergak azken produktuaren balio osoaren gainean aplikatuko direla, hau da, inportatzaileak helmugan ordaindutako prezioaren gainean, eduki metalikoaren balioan soilik oinarritutako estimazioak egin beharrean.
Irizpide berri horren arabera, nagusiki altzairuz, aluminioz edo kobrez fabrikatutako artikuluek % 50eko muga-zergari eutsiko diote; berriz, eduki metaliko esanguratsua duten produktu eratorriek % 25eko tasa izango dute. Hala ere, araudiak salbuespenak ezartzen ditu ondasun estrategikoentzat, besteak beste, ekipo industrialentzat eta sare elektrikoentzat; horiek % 15eko muga-zerga murriztua izango dute 2027ra arte.
Era berean, Aldarrikapenak tokiko materialen erabilera sustatzen du, jatorri estatubatuarreko metalak soilik dituzten atzerriko produktuei % 10eko karga aplikatuz. Bestalde, bazterketa-atalase bat finkatu da altzairu, aluminio edo kobre-edukia % 15ekoa edo txikiagoa duten ondasunentzat; horiek muga-zerga horien aplikazio-eremutik kanpo geratzen dira.
Eszenatoki horren aurrean, beharrezkoa da euskal enpresa esportatzaileek beraien katalogoen osaketa teknikoa aztertzea, kostuetan izango duen eragina ebaluatzeko eta Estatu Batuetako merkatuan duten posizionamendu lehiakorrari eusteko.
Aduana-esparru berrirako egokitzapen hori errazteko, Basque Trade & Investment-ek bere bulego-sarea eta aholkularitza-zerbitzuak jartzen ditu euskal enpresen eskura. SPRI taldean integratuta dagoen euskal enpresa nazioartekotzeko agentziak aholkularitza pertsonalizatua eskaintzen du neurri horiek negozio-eredu bakoitzean duten eragina aztertzeko, konpainiei araudia interpretatzen lagunduz eta AEBetako merkatuan haien jarduera komertziala bermatuko duten nazioartekotze-estrategiak diseinatuz.
