Eusko Jaurlaritzak nazioarteko industria-inbertsiorako “lur emankor” gisa kokatu du Euskadi
- Mikel Jauregi: “Euskadi lur emankorra da industria-inbertsio berrietarako. Autogobernu politiko eta fiskaleko sistema bakarra dugu, gure eredu propioa sortzeko aukera eman diguna: industriaren aldeko ingurunea, kohesio sozialaren eta bizi-kalitatearen garapenarekin uztartua. Industria-inbertsioak erakartzeko leku paregabea. Konfiantzazko ingurune bat eskaintzen dugu, eta gobernu hurbil bat, industria-estrategia anbiziotsu batekin”.
- Parte-hartzaileek nabarmendu dute Euskadi fabrikazioan bikaintasuna duen herrialde industriala dela, lurralde berritzailea, talentuduna, fiskalitate propio eta lehiakorrarekin, eta lankidetza publiko-pribatu estuarekin.
- Nazioarteko inbertitzaileek gero eta gehiago baloratzen dituzte bertan biltzen diren faktoreak, besteak beste, erakundeen egonkortasuna, azpiegituren kalitatea —bereziki digitalak eta energetikoak— eta talentua erakartzeko gaitasuna, arlo horietan Euskadik lehiatzeko abantailak baititu.
Eusko Jaurlaritzak “Invest in the Basque Country” ekimena aurkeztu du gaur Madrilen, Euskadiren posizionamendua indartzeko, nazioarteko inbertsiorako helmuga erakargarri, lehiakor eta fidagarri gisa. Mikel Jauregi Industria, Trantsizio Energetiko eta Jasangarritasunaren sailburua izan da hitzorduaren buru. Jardunaldian, hizlariek nabarmendu dute Euskadi manufaktura-bikaintasuna duen herrialde industriala dela, lurralde berritzailea, talentuduna, fiskalitate propio eta lehiakorrarekin, eta lankidetza publiko-pribatu estuarekin.
Ekitaldian erakundeetako ordezkariak, inbertitzaileak eta eragile ekonomikoak bildu dira, euskal lurraldeak eskaintzen dituen aukeren inguruan, gero eta zorrotzagoa den testuinguru global batean. “Invest in Basque Country” ekimenak honako hauen babesa izan du: Javier García Cogorro, General Partner & Founder, Columbus Venture Partnerts; Fernando González Zalba, General Manager, Quantum Motion Spain; Itxaso Berrojalbiz, Bizkaiko Ogasuneko diputatua; Jimmy Vanhoove, CEO Viralgen; Meinrad Spenger, CEO MasOrange; eta Javier Hernández, Vice President of Corporate Strategy, Littlefuse, besteak beste.
Mikel Jauregi sailburuak nabarmendu duenez, “Euskadik industria gehiagoren eta Europa gehiagoren aldeko apustua egiten du. Eta Europan ezin da ongizaterik egon industria indartsu bat gabe. Industria aurrerabidearen, aberastasunaren eta kalitatezko lanpostuen iturri delako. Orain zapaldu behar dugu Europako berrindustrializazioaren azeleragailua. Euskadin dagoeneko asmo handiko proiektuen alde egiten ari gara apustu, Europak abangoardia teknologikoan eta industrialean jarrai dezan”.
Jauregik azpimarratu duenez, “Euskadi lur emankorra da bere sektorean liderrak diren enpresek industria-inbertsioak bertan egiteko. Eta, zergatik Euskadi? Autogobernu politiko eta fiskaleko sistema bakarra dugu, eta horri esker, geure eredu propioa sortu dugu: industriaren aldeko ingurunea, kohesio sozialaren eta bizi-kalitatearen garapenarekin uztartua”.
Eta Euskadi industria-inbertsiorako lurralde erakargarri egiten duten lau gakoak nabarmendu ditu: “fabrikazioaren bikaintasuna, berrikuntza, talentua eta lankidetza publiko-pribatua. Lau gako horiek industria-inbertsioak erakartzeko leku paregabe gisa kokatzen gaituzte. Konfiantzazko ingurune bat eskaintzen dugu, eta gobernu hurbil bat, industria-estrategia anbiziotsu batekin”.
Berrikuntza eta fiskalitatea: euskal industria berria eraikitzen
Jardunaldia bi bloketan banatu da. Lehen mahai-ingurua: “Berrikuntza eta fiskalitatea: euskal industria berria eraikitzen”. Hauek parte hartu dute: Itxaso Berrojalbiz, Bizkaiko Foru Aldundiko Ogasun eta Finantzetako foru diputatua, hiru euskal foru ogasunen ordezkari gisa; Javier García Cogorro, General Partner eta Columbus Venture Partners-en sortzailea, eta Fernado González Zalba, Quantum Motion Spain-eko General Managerra.
Hizlariek aztertu dute zergatik den Euskadi gaur egun helmuga erakargarria inbertsio industrial eta teknologikorako. Industria-ingurunea, talentua edo bizi-kalitatea bezalako faktoreak nabarmendu dituzte, “denboran eutsitako estrategia bati erantzuten dioten elementuak eta industria-ehunarentzat funtsezkoak direnak”.
Bereziki nabarmendu dute “Euskadik foru-aldundien eta haien autogobernuaren bidez bere zerga-politika propioa diseinatzeko duen gaitasuna, industria-jarduerarako eta, bereziki, berrikuntzarako ikuspegi argiarekin. Horrela, fiskalitatea benetako palanka bihurtzen da proiektuak, kapitala eta talentua erakartzeko “.
Hizlariek nabarmendu dutenez, esparru horrek emaitza zehatzak dakartza: “proiektu berriak, inbertsioa eta enplegua, praktikan funtzionatzen duen lankidetza publiko-pribatuari esker”.
Lehen pertsonan: industria-inbertitzailearen esperientzia Euskadin
Bigarren mahai-inguruak, “Lehen pertsonan: industria-inbertitzailearen esperientzia Euskadin” izenekoak, Euskadiren aldeko apustua egin duten inbertitzaile industrialen partaidetza izan du.
Gonzalo Sánchez Estatuko enpresa-lider garrantzitsuenetako batek, PwC Españako presidente eta Global Strategy Councileko kide denak, moderatutako mahai batean parte hartu dute Jimmy Vanhove, Virangengo CEOak; Meinrad Spenger, MasOrangeko CEOak; Javier Hernández, Littelfuseko Corporate Strategy presidenteordeak, eta Ane Miren de Ariño, Eusko Jaurlaritzako Ekintzailetza eta Nazioartekotze zuzendariak.
Mahai honetako hizlariak beren inbertsio-proiektuetarako Euskadiren aldeko apustua egin duten enpresen arduradunak dira. Nabarmendu dutenez, Euskadik industria-oinarri sendoa eta gaitasun zientifiko eta teknologiko oso garatuak ditu, “industria-proiektu berritzaileak eta konplexutasun handikoak bultzatzeko gai diren konbinazio irabazlea”.
Identifikatu duten beste ardatz nagusietako bat talentua eskuratzea da, faktore estrategiko bereizgarri gisa ulertuta. “Euskadik gaitasun handia du profesional kualifikatuak prestatzeko, bai eta horiei eusteko ere, enpresa-ehun dinamiko bati eta balio handiko garapen profesionalerako aukerei esker. Horri gehitu behar zaio nazioarteko talentua erakartzeko gaitasun gero eta handiagoa”.
Azkenik, parte-hartzaileek euskal administrazioaren papera nabarmendu dute, “gertukoa eta proaktiboa, enpresei beren bizi-ziklo osoan zehar entzuten eta laguntzen diena, ezartzen denetik hazten eta finkatzen den arte. Lankidetza publiko-pribatua faktore erabakigarria da, industria-garapena bultzatzen duen eta Euskadin inbertsio berriak erakartzeko zirkulu birtuosoa indartzen duen ingurune egonkor eta aurreikusgarria sortzen laguntzen du “.
Zergatik da Euskadi inbertsiorako herrialde erakargarria
Etorkizuneko potentziala duten sektoreetan atzerriko inbertsioa erakartzea da Industria-Euskadi 2030 Planaren Industria Gehiago Ardatzaren lehentasunetako bat. Euskadik erreferentziazko helmuga izan nahi du atzerriko industria-inbertsioarentzat, balio erantsi handiko sektoreetan eta etorkizunerako traktore izan daitezkeenetan. Lehentasun horren helburua da inbertsio eraldatzaileak erakartzea, enplegu kualifikatua sortzeko, teknologia aurreratuak sartzeko eta tokiko industria-sarea balio-kate globaletan txertatzea bultzatzeko.
Jardunaldian zehar, hizlariek nazioarteko inbertitzaileen aurrean nabarmendu dituzte erakundeen egonkortasuna, bertako azpiegituren kalitatea —bereziki digitalak eta energetikoak— eta Euskadik talentua erakartzeko eskaintzen duen gaitasuna. Lehiarako abantaila horiek industria-oinarri sendoarekin, jasangarritasunerako politika aurreratuekin eta bizi-kalitate handiarekin uztartzen dira, eta faktore horiek gero eta garrantzi handiagoa hartzen dute inbertsio-erabakiak hartzeko orduan.
Hala, Euskadi atzerriko inbertsiorako Europako lurralde erakargarrienetako bat da, gaitasun industrialen, berrikuntzaren, egonkortasun instituzionalaren eta lehiakortasun handiko enpresa-ingurunearen konbinazioari esker, lehen mailako adierazle ekonomiko eta sektorialek babestuta.
