SISMOS, ikusmen artifizialaren bidez industria-kalitatearen kontrolerako eredu berria duen Bilboko startupa
SISMOS urtebete baino gutxiagoko ibilbidea duen Bilboko startupa da, eta ikusmen artifizialaren bidez kalitate industrialaren kontrolerako eredu berria eskaintzen du. Industria-fabrikazioan gertatu ohi diren akatsak minimizatzen ditu. Haragi-enpresa batean, esate baterako, bere tresnari esker (ordenagailu txiki bat), galtzen zen lehengaiaren % 66 berreskuratzea lortu da. SPRI Taldeak Ekintzaile programaren bidez emandako laguntza jaso du. Programa horrek ekintzailetza-proiektuak babesten ditu.
Enpresa 2025ean eratu zuen Mario Ernesto Antelok (gaur egun CEOa). Ordu hartan, Campofrío enpresan lehengaien galerak murrizteko master-proiektua amaitzen ari zen. “Galerak prozesuaren automatizazioaren bidez murriztu nahi zituzten eta, gainera, barne-mailako soluzioa izatea nahi zuten, kanpoko enpresen menpe egon gabe. Hala, adimen artifizialeko azeleragailua duen konputagailu txikia garatu nuen”.
Tresnak arrakasta izan zuen; izan ere, galtzen zen lehengaiaren % 66 berreskuratzea lortu zuen: hau da, 40 tona inguru. “Segundo erdian erretilu bakoitzeko haragia detektatzen da AAren bidez; sistemak produkzio-lerrotik baztertzen du eta langile batek berriro sartzen du produkzio-prozesuan. Gure sistema edozein industria-erabilera kasutan funtzionatzeko gai da”.
Horren ondoren, sortzaileak LIN3S Bilboko enpresaren interesa jaso zuen. Enpresa horrek soluzio digital globalak eskaintzen ditu, eta “bien arteko lankidetza-aukera ikusi zuen”. Hala, 2025eko irailean, Sismos eratu zuen, eta egoitza soziala Bilbon jarri.
Ibilbide laburra duen arren, automobilgintzan, elikaduran eta energia berriztagarrien biltegiratze-baterien sektorean sartu da dagoeneko. Bere zerbitzua edozein ordenagailutatik eskuratu daitekeen web-plataforman oinarritzen da. “Bezeroak bere irudiak igo eta ikusmen artifizialeko eredua entrenatu dezake, kodea edo programatzen jakin gabe. Gure webguneak modu autonomoan etiketatzen ditu; horri esker, hilabetetako lana ordu gutxitan egiten da”.
Gaur egun, SISMOS hainbat proiektutan ari da lanean. Horietako bat automobilgintzako multinazional batekin elkarlanean da, harien mekanizazioan akatsak detektatzea helburu duena. Beste bat motor-estalkien fabrikatzaile batekin da, inperfekzioak detektatzeko; eta, “horri esker, eskuzko ikuskapenak egiten dituzten langileen kopurua murriztea lortu da”.
Soluzio hori malgua eta merkea da. “Ikuskapen-lana egiten duen ordenagailu txikia 1.800 euro inguruan eskaintzen dugu, eta urteko 2.900 euroko harpidetzari esker, ikuskapenak zure beharretara moldatzen joan zaitezke. Gaur egun, kalitate-kontrolerako sistemek 40.000 edo 50.000 euro inguruko kostua izaten dute proiektuko. Gainera, LIN3S edo Integradores Industriales bezalako partnerrekin zerbitzu konplexuagoak ere eskain ditzakegu. Bestalde, Amazon eta Google Cloud bezalako enpresen babesa jaso dugu kredituen bidez”.
Bere tresna ikusmen artifizialaren bidezko industria-kalitatearen kontrolerako eredu berri gisa definitzen du. “Begi adimendunak jartzen dizkiogu fabrikari, akatsak garaiz detektatu eta galerak saihestu ahal izateko”.
Enpresarentzat, I+G dena da. “Negozioaren % 100 da eta etengabe ari gara teknologia berriak ikusten. JG Automotive (automobilgintza) eta INTERA (erdieroaleak) bezalako bazkide handiak ditugu, produktua merkaturatzen laguntzen digutenak. Gainera, LIN3Seko bazkideekin eta Valentzia eta Burgosko bi azeleragailurekin ere lanean ari naiz”.
SPRI Taldearen Ekintzaile programari esker jasotako laguntza garapen teknologikora, aholkularitza-lanetara, azoketara egindako bisitetara eta aholkularitza legaletara bideratu da, eta “oso lagungarria izan da. Aurten, Fast Track Innobideak programa (SPRIren beste programa bat) eskatu dugu Ikerlanekin eta Vicomtechekin batera softwarea garatzeko”.
Erronken artean dago beren ordenagailuaren industrializazio-prozesua garatzea (ekainerako aurrez ikusten dute), egungo bi laguneko lantaldea handitzea, eta bezero gehiago lortzea bai Euskadin bai Estatuko gainerako tokietan. “Irtenbide bikaina dugu eta ezagutarazi egin behar dugu”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte hartu dezakezu.
