Arabako PlayerOn enpresak datuaren gamifikazioan zentratu du bere jarduera
PlayerOn enpresaren jarduera hiru kontzeptutan laburbiltzen da: kirola, ekintzailetza eta engagementa. Eta hauxe da hiru alderdi horiek elkarrekin uztartzearen emaitza: fan engagement plataforma bat, konponbide interaktiboak eskaintzen dizkiena markei, euren bezeroekin duten lotura hobetu dezaten publiko guztientzako jolas oso pertsonalizagarrien bidez. Momentuz -eta hasiberriak baino ez dira-, esperientzia berriak sortzen ari dira, besteak beste Real Sociedad futbol klubarentzat, eta berriki akordio bat itxi dute zinema-kate ezagun batekin Batman filmaren estreinaldirako, aurreratu du Maitane López de Forondak, startup arabarraren zuzendari nagusi eta fundatzaileak.
Zer egiten duzue zehazki PlayerON-en?
Enpresentzako gamifikazio-plataforma bat gara. Gure helburua da modu ludiko batean uztartzea engagement-a (bezeroekiko konexio positiboa) eta datuen atzematea. “Datuaren gamifikazioa” deitzen diogu horri. Guztiz pertsonalizatutako jolasak konfiguratzen ditugu, enpresek partekatu ditzaten euren sare sozialetako jarraitzaileekin, web orriko zein onlineko dendako bisitariekin edo euren aplikazio ofizialeko erabiltzaileekin…
Zerk bereizten zaituzte zuen lehiakideengandik?
Hiru berritasun eskaintzen ditugu: lehenik eta behin, gai gara jokalariaren sakelakoa bigarren pantaila batekin (bideo-markagailu bat, pantaila erraldoi bat edo telebista bat) konektatzeko jolasaren bidez, eta horrela, erabiltzailea harrituko duten esperientzia berriak sortzeko. Bigarrenik, jolasak sor ditzakegu datu-baseetako eremu desberdinetan oinarrituta. “Datuaren gamifikazioa” deitzen diogu horri, hau da, aukera ematen dugu harmaila bat gainerakoekin lehiatzeko, edo gizonak emakumeen kontra, edo maskota-jabeak maskotarik ez dutenen aurka. Hirugarrenik, sorkuntza eta garapen ekipo propioa dugu, eta horri esker gai gara jolasak ad hoc garatzeko, prozesu guztia geure gain hartuz (kanpainaren diseinua, aktibazioa, amaierako txostena, etab.).
“Zaleen esperientzia hobetzea futbol estadioetan, saskibaloi kantxetan, kontzertuetan…”. Zer esan nahi duzue horrekin?
Esan nahi dugu erabat aldatu nahi dugula ekitaldi batean bizi dugun esperientzia. Ekitaldira doan publikoa ere ekitaldiaren protagonista izatea nahi dugu, hau da, ez daitezela izan lekuko hutsak. Elkarreragin dezatela pantaila erraldoiekin, diberti daitezela eta, horrela, gorde dezatela oroitzapen gogoangarri bat. Hori lagungarria da hainbat negozio-eremu estrategikotarako: marketina, ticketing-a, babesleak, partiduaren dinamizazioa (kirol taldeen kasuan), jatetxeetako salmentak, merchandising salmentak… Bi alderdien arteko lotunea da: ekitaldira doazenek ongi pasatzen dute eta sariak irabazten dituzte, eta markak edo taldeak bere helburu estrategikoak betetzen ditu.
Gamifikazioa eta datuak…
Hori da. Markek euren bezeroen eta balizko bezeroen datu pertsonalak atzeman behar dituzte eurengana zuzenean iristeko, komunikazioak pertsonalizatzeko eta, funtsean, saltzeko. Nola Google-k iragarri duen hemendik aurrera ez duela onartuko hirugarrenen cookie-rik bere nabigatzailean, markak behartuta daude erabiltzaileak zuzenean erakartzera euren kanaletara, eta gero zuzeneko marketin bidez ustiatuko dituzten datuak atzematera.
Zergatik eta zein testuingurutan sortu da enpresa hau?
Esperientzia genuelako eta aukera ikusi genuelako. Urtetan ibili nintzen lanean komunikabide agentzietan eta estrategia digitaleko agentzietan, eta gero bost urtez aritu nintzen Baskonia-Alavés Taldean. Han, arlo digitalaren barruan, nire zeregina zen gainerako sailen kezkei erantzutea (marketina, ticketing-a, babesleak, merchandising-a…), eta horretarako, ezinbestekoa zen gertatzen zen guztiaren ikuspegi osoa izatea. Erabaki genuen mundu mailako pandemiaren testuinguruan aukera itzela izan zitekeela gamifikazioa kontuan hartzea negozio-eremu desberdinei erantzuteko. Hainbat hornitzaile probatu nituen, euren muga eta gabeziak ezagutu nituen, eta haiek ase ezin zituzten aukerak bururatu zitzaizkidan, batik bat datua atzemateko. Hala, merkatuko premia bati erantzuteko sortu zen PlayerON.
BIC Araba eta SPRI Taldeak izan duten papera…
Enpresa martxan jartzea planteatu genuenean, lehenik eta behin aholkularitza bilatu genuen. BIC Araban oso ongi aholkatu gintuzten. Gero, ekintzaileentzako Ekintzaile programan sartu ginen (bide batez, eskerrak eman nahi nizkioke Diegori eman zigun laguntzagatik), eta enpresa bezala sortu ginenetik urtea betetzera doan honetan, pozarren gaude eman digun laguntzarekin. Nire bazkideak Madrilekoak dira eta txundituta daude euskal erakunde publikoek startup-ei ematen dioten babesarekin.
PlayerON kirolaren arlora bakarrik zuzentzen da?
Ez, esango nuke gamifikazioa edozein jarduera-eremutan aplikatu daitekeela. Hala ere, audientzia handia biltzen duten sektoreetara zuzentzen gara, batez ere zerbait gertatu zain dagoen audientzietara. Kirol profesionalaz gain, orobat zuzentzen gatzaizkie ekitaldi antolatzaileei (kontzertuak, kongresuak, aurkezpenak…), zinema-aretoei edo euren aplikazio ofizialak indartu eta audientziarekin zuzenean elkarreragin nahi duten komunikabideei. Baita ere jatetxeei, retail sektoreari eta kontsumo handiko markei (lagungarri izan gaitezke packaging eta salmenta puntuko elkarreragina bideratzeko). Izan ere, aritu izan gara futbol eta saskibaloi taldeekin, kongresu eta azokekin, ekitaldiak antolatzen dituen areto batekin eta zinema-areto batekin. Esan dizudan bezala, gure plataformak oso erraz pertsonalizatu daitezkeen jolasen katalogo bat eskaintzen du, hortaz, bi enpresek kaleratuko dituzten jolasek ez dute itxura berdina izango, nahiz eta mota berekoak izan.
Kirol klub baten edo kontzertu baten ikuspegitik, zein da bilatzen edo lortzen duzuen errentagarritasuna?
Arrazoi estrategiko desberdinak izan ditzakete. Izan liteke soil-soilik publikoa entretenitzea, publizitate-aktibo berri bat sortzea (jolasarentzat babesle bat bilatuz), datuak atzematea edo salmenta zuzenak bultzatzea sariak eskainiz (beroan eginiko erosketentzako deskontuak, jatetxeetako kontuak handitzea…).
