Imanol Pradalesek “Europaren berrindustrializazioa eta autonomia estrategikoa gidatzeko” euskal industriak duen zeresana aldarrikatu du

• “Industria Planaren trakzio-proiektuetako bat enpresa-aliantza bat abiaraztea da, hain justu ere, sare elektrikoetan puntako teknologiak hedatzeko”, iragarri du Imanol Pradalesek
• Estatu Batuen eta Europar Batasunaren arteko merkataritza esparru berria zein izango den argitzeko zain, Lehendakariak baieztatu duenez, “Euskadin gure sarea defendatzeko prestatuta gaude, Trumpek alde bakarretik eta akordiorik gabe muga-zergak handitzen baditu”

Imanol Pradales Lehendakariak gaur goizean bisita ofiziala egin du Velatia taldearen Ormazabal lantegira, Igorrera. Bere mintzaldian, Lehendakariak Euskadin daukagun enpresa-kulturaren balioak goraipatu ditu, eta euskal industriaren ikuspegia, gidaritza, ahalegina eta berrikuntzaren aldeko apustua nabarmendu ditu; era berean, Europaren berrindustrializazioa eta autonomia estrategikoa gidatzeko euskal industriak duen zeresana aldarrikatu du, sektorea eraldatzen jarraitu eta lehiakortasuna bermatzeko. “Europaren berrindustrializazioa eta autonomia estrategikoa gidatu ahal dugu eta gidatu nahi dugu”, ziurtatu du.

Ekoizpen gunearen instalazioetara egindako egonaldian, Lehendakariarekin batera, bertan izan dira Mikel Jauregi, Industria, Trantsizio Energetiko eta Jasangarritasuneko sailburua; Javier Ormazabal eta Alejandro Ormazabal, Velatiaren presidentea eta presidenteordea, hurrenez hurren; Jorge González, Ormazabaleko CEOa; eta José Luis Bilbao, lantegiaren zuzendaria.

Ordezkariek lehen eskutik izan dute inbertsio planaren aurrerapenen berri eta lantegitik ibilbide bat osatu dute. Horrela, upelen eta oinarrien ekoizpen gunea, muntatzeko eta mihiztatzeko eremua eta produktua probatzeko eta pertsonalizatzeko lekua bisitatu dituzte.

Testuinguru honetan, Imanol Pradalesek Velatiak irudikatzen dituen ekosistema eta balioak nabarmendu ditu, bai eta egokitzeko, dibertsifikatzeko eta zabaltzeko duen gaitasuna ere. “1967an abian ipini zen armairu metalikoen lantegi txikia gaur egun enpresa globala da, eredugarria da sare elektrikoak garatzen, elektronikan, eraginkortasun energetikoan edo ingeniaritza adimendunean. Mundu osoko enpresa eta entitateak erakartzen dituzten azpiegiturak eta entsegu-laborategiak ipini dituzue abian eta talentuaren eta ikerketaren aldeko apustua egin duzue”, nabarmendu du Lehendakariak.

Etorkizuneko apustua

Ziurgabetasunez betetako uneotan, Imanol Pradalesek “Herri gisa eta ongizatean hazten jarraitzeko etorkizuna lantzen” jarraitzearen aldeko apustua egin du, eta Europar Batasuneko txosten bati aipamena egin dio, zeinak agerian uzten baitu “energia azpiegituretan, 2040ra arte, 1,3 bilioi euro inbertitu behar ditugula, ekonomia deskarbonizatu ahal izateko. Kantitate horren % 48, 730.000 milioi, sare elektrikoa modernizatzera eta hedatzera bideratu behar da”, adierazi du, berriz ere.

Lehendakariaren ahotan, energia azpiegituretan inbertitzeari esker, euskal industriaren etorkizuna eta enplegua bermatuko ditugu, energia garbiak integratuko ditugu, mugikortasun jasangarrian eta ekonomia digitalean aurrera egingo dugu, eta azpiegitura gakoen hornikuntza bermatuko dugu. “Euskadin  erronka eta merkatu berri hau benetako aukera bihur dezaketen ezaugarri bereizgarriak dituzten enpresa eta berrikuntza gune ugari ditugu. Are gehiago, batzuek Euskadiri Electric Valley esan izan diote, alegia, argindarraren harana, bertan ditugun industriaren eta talentuaren kantitatearengatik eta talentuarengatik”, defendatu du Imanol Pradalesek; era berean, Industria Plan berriaren trakzio-egitasmoetako bat iragarri du, zeina “sare elektrikoetan punta-puntako teknologiak zabaltzeko enpresa aliantza bat abian jartzean” datzan.

Trumpen muga-zergen geldiunearen amaiera

Bere mintzaldian, Lehendakariak gogora ekarri du Trumpen asteazken honetako muga-zergen geldiunearen amaiera, eta, “Estatu Batuen eta Europar Batasunaren artean akordio bat” lor daitekeela eta “baikor” azaldu bada ere, ziurtatu duenez, edozein kasutan ere, “Euskadin  gure sarea defendatzeko prestatuta gaude, Trumpek alde bakarretik eta akordiorik gabe muga-zergak handitzen baditu”.

Horretaz gain, ohartarazi duenez “erantzuterakoan, Europak argia eta finkoa izan behar du, duda-mudarik gabe Europako industria defendatzeko; eta, beraz, euskal industria defendatzeko. Izan ere, industriako milaka enplegu ditugu jokoan. Gure egungo eta etorkizuneko ongizatea dugu jokoan”.

Testuinguru honetan, eta lankidetza publiko-pribatuan oinarrituta, Lehendakariak nabarmendu duenez, “Euskadiren gaitasun guztiak aktibatu eta lerratuko ditugu, eraldaketa ekonomikoa sustatzeko, gure industria defendatzeko eta kalitatezko enplegua bermatzeko”.