Eusko Jaurlaritzak Fabrikazio Aurreratuaren sektorearekin egin du bilera muga-zergen eragina ebaluatzeko
Fabrikazio Aurreratuaren Mahai Sektorialaren lehen bilera egin du gaur Eusko Jaurlaritzak. Helburua izan da euskal ekonomiaren sektore estrategiko honetako lanpostuak eta enpresak babestu eta defendatzeko erantzun publiko-pribatu bateratua koordinatzea. Bilera hau Jaurlaritzak bultzatutako Mahai Sektorialen bileretako bat da, siderurgiaren eta automobilgintzaren sektoreekin egindakoen ondoren.
Ildo horretan, lankidetzarako espazio honen garrantzia azpimarratu du Mikel Jauregik eta adierazi duenez, “Euskadiko Fabrikazio Aurreratuko teknologiaren sektoreak hazkunde-egoerari Estatu Batuetako ziurgabetasuna kontuan hartuta egin behar dio aurre”. Sektorea oso esportatzailea da, % 85etik gora esportatzen du, eta 1.328 milioi euroko kanpo-negozioa izan zuen 2024an. Zenbateko horretatik, 225 milioi euro —sektoreko esportazioen % 17— AEBra esportatu ziren. AEBko administrazioaren muga-zergen zuzeneko eraginaz gain, ziurgabetasun orokorreko egoeraren ondorioz, inbertsioak 2026 urtean geldiaraziko lirateke, eta horrek eragin zuzena izango luke sektorean.
Eusko Jaurlaritzak eta sektoreko enpresa nagusiek Fabrikazio Aurreratuaren sektoreari laguntzeko analisiak, diagnostikoak eta ekimenak partekatu dituzte gaur. Asteotan aipatu bezala, denbora errealean egingo zaio jarraipena muga-zergen bilakaerari, eta lehiakortasuna eta nazioartekotzea indartzeko elkarrekin lanean jarraitzeko konpromisoa hartu dute.
Mikel Jauregi Industria, Trantsizio Energetiko eta Jasangarritasuneko sailburua izan da Mahai Sektorialaren buru, eta enpresa nagusietako ordezkariek parte hartu dute —DanobatGroup, Etxetar, Fagor, Loire Gestamp, Goizper, Zayer, Izar, Heroslam, eta Biele—, AFM klusterraren ordezkariak, Xabier Ortueta zuzendari nagusia, Unai Andueza, Gipuzkoako Ekonomia Sustapeneko foru diputatua eta Eusko Jaurlaritzako Ogasun saileko, Gipuzkoako Merkataritza Ganberako, Elkargirako eta Confebaskeko ordezkariak bildu ditu gaur.
Mahaiko kideek erabaki dute jarraipen espezifiko eta koordinatua egitea, arriskuak aurreratzeko, muga-zergen eragina denbora errealean ebaluatzeko eta enpresei laguntzeko neurri berriak zehazteko, enplegua babesteko eta euskal fabrikazio aurreratuaren nazioarteko posizioa sendotzeko.
Sektorean duen eragina
Bileran, erakundeetako eta enpresetako ordezkariek muga-zergek Euskadiko Fabrikazio Aurreratuaren sektorean duten zuzeneko eta zeharkako eragina aztertu dute, eta nabarmendu da, Jauregi sailburuak adierazi bezala, Euskadiko Fabrikazio Aurreratuko teknologiaren sektoreak hazkunde-egoerari Estatu Batuetako ziurgabetasuna kontuan hartuta egin behar diola aurre.
Makina-sektoreak 991 milioi euro esportatu zituen 2024an, Eustaten arabera. Makinaren osagaiak, erremintak eta osagarriak batuta, 1.328 milioi euro izan ziren; hau da, Euskadiko esportazio guztien (30.963 milioi euro) % 4 baino gehixeago. Intentsitate teknologiko handiko sektorea da, Euskadiren nazioarteko posizionamendua sendotzen du, eta herrialde osoan berrikuntza eta balio erantsia sortzeko eragilea da.
Sektoreko muga-zergen ondoriozko gainkostua 32 milioi euro ingurukoa izango dela kalkulatzen da, eta Estatu Batuetan 20 eta 25 milioi arteko salmenta-bolumena galtzea.
