Albisteak 16 urtarrila, 2026

IndeusBerri: Industria eta Euskararen plaza

2026ko lehen IndeusBerri honetan albiste dira: Enpresa Digitalaren ikastaroak, Emakumeak Zientzian, Berba-lapiko proiektua eta Industria seguruaren laborategi 4.0.

Emakumeak Zientzian 2026: 34 erakundek sinatu dute lankidetza-hitzarmena. 2026eko edizioa berezia izango da, Emakumeak Zientzianek 10 urte betetzen dituelako. Hamarkada honetan zehar, proiektuak emakume zientzialarien lana ikusarazteko, neska eta gazteen artean bokazio zientifikoak sustatzeko eta zientzia gizartera hurbiltzeko lan egin du.

Otsailean Adimen Artifizialari buruzko hiru ikastaro egingo dira euskaraz Enpresa Digitalaren eskutik. Beste AA bat: Hugging Face eta open-sourcearen indarra, otsailaren 2an; AAko agenteei buruzko sarrera: HEHen bilakaera, zeregin konplexuei ekiteko eta negozioak eraldatzeko gai baitira, otsailaren 3an; eta Microsoft 365 Copilot: Produktibitatea Adimen Artifizialarekin eraldatzen, otsailaren 6an.

Berba-Lapiko proiektuaren hizkuntza-errutinen metodologia aurkeztu da Fontes Linguae Vasconum aldizkarian. Fontes Linguae Vasconum aldizkariak argitaratu berri duen artikulu batean Berba-Lapiko proiektuaren metodologietako bat aurkeztu da: hizkuntza-errutinetan oinarritutako proposamen pedagogikoa, euskarazko ahozko oinarrizko komunikazioa sistematikoki lantzeko helburua duena.

‘Industria seguruaren laborategia 4.0’ Industria Berriaren Hiztegian. Fabrika adimendunaren kontzeptura bideratutako proba-bankua sortzeko ingurunea. Helburu nagusia da zibererasoak eta mehatxuak integratzea ekoizpen-ingurunearen antzeko etapa eta prozesuetan, baina benetako egoera batean sor daitezkeen ondorio kaltegarririk gabe.

Lotutako albisteak

19/12/2025 Euskara industrian

IndeusBerri: Industria eta Euskararen plaza

Eguberri zoriontsuak eta urte berri ona opatzeko baliatu dugu gaurko IndeusBerri, 2026a izan dadila Euskara Industrian eta Industria Euskaran aldarrikatzen dugun urtea. Bide batez, Enpresa digitalak otsailerako antolatu duen tailer bat ere aipatu nahi izan dugu eta hiztegiko kontzeptu bat: Aingeru Inbertitzaile.

12/12/2025 Euskara industrian

IndeusBerri: Industria eta Euskararen plaza

Euskarazko Wikipediaren 24.urteurrena, Euskrowd ekimena, Adimen Artifizialari buruzko jardunaldi interesgarri bat eta Proba-datu dira gaur bildutako albisteak.