Albisteak 31 urria, 2025

IndeusBerri: Industria eta Euskararen plaza

Albiste dira gaur EUSKARABILDUA, Hizkuntzen Kudeaketan Praktika onak, Emakume Zientzialarien Argitan, INGUMA, PUNTUEUS eta Cyber Range laborategi.

Azaroaren 4an Hizkuntzen kudeaketan Praktika onak partekatzeko 5.topaketa egingo da Bilboko Euskalduna Jauregian. Hizkuntzak modu eraginkorrean erabili eta kudeatu nahi ditugun erakundeok hizkuntzen kudeaketa praktiken bilatzailea daukagu, hainbat erakunde publiko eta pribaturen jardunbide onak ikusteko eta gurean aplikatzeko. Eusko Jaurlaritzako Hizkuntza Politikarako sailburuordetzak diruz lagundutako proiektu honi esker, momentu honetan 184 praktika erakunde guztien esku jarri ditugu.

EUSKARABILDUA 2025: Nork gobernatzen du Internet? Euskal komunitate digitala erronka globalaren aurrean. Euskarabildua jardunaldiaren helburua da, teknologia ikuspegi kritiko, burujabe eta arduratsu batekin begiratzeko gakoak gizarteratzea eta esperientziak partekatzea. Aurtengo edizioan, begirada Interneteko gobernantzan jarriko da: nork hartzen ditu erabakiak? Zer interes daude jokoan? Eta zein da euskaldunona bezalako komunitate txikien tokia, aukera eta papera sare global horretan? Egun erronka global bati begiratzen diogu gure txikitasunetik.

Emakume Zientzialarien argitan zikloaren azken solasaldia egingo da azaroaren 6an Eli Gallego nutrizionistarekin. Emakume Zientzialariak ezagutzera ematea helburu duen Emakume Zientzialarien argitan zikloaren aurtengo azken solasaldiak Elikadura Osasungarria izango du hizpide. Eli Gallego nutrizionista izango da hizlari eta ‘Zer da elikadura osasungarria?’ galdera nagusi. Irailaren 30ean hasi zen aurtengo zikloa Ariketa fisikoari buruzko solasaldiarekin. Urriaren 21ean egin da bigarrena, Ingurunearen Osasuna ardatz hartuta. Eta azaroaren 6an egingo da azkena Ernest Lluch Kultur Etxeko areto nagusian.

“Cyber Range laborategi” Industria Berriaren Spri Hiztegian. Ingurune birtuala, langileen prestakuntzarako eta zibersegurtasuneko teknologiaren ikerketa eta garapenerako erabiltzen dena. IT/OT sistemen egonkortasuna, segurtasuna eta errendimendua indartzen laguntzen duten tresnak biltzen ditu, eta bi osagai nagusi ditu: Cyber Range Master aretoa eta segurtasun-eragiketetarako zentroa (SOC). SPRI erakundeak enpresei eskaintzen dien aktibo edo baliabideetako bat da.

PUNTUEUSek .EUS domeinua erregistratzeko laguntza-zerbitzua jarri du abian, EUSEBIO pertsonaiarekin batera. PUNTUEUSek, .EUS domeinuaren kudeatzaileak, zerbitzu berria jarri du abian euskal enpresa eta profesionalei interneten presentzia sendotzen laguntzeko. Domeinua erregistratzeko prozesua erraztea helburu, laguntza-zerbitzua eskainiko du, eta kanpaina berezia jarri du martxan zerbitzua ezagutzera emateko.

Inguma datu-baseak 25 urte bete ditu. Inguma UEUk sortutako euskal komunitate zientifiko-intelektualaren datu-basea da, Bizkaiko Foru Aldundiaren laguntzaz garatua. Bertan, 1968tik unibertsitate-mailako zientzia- eta jakintza-arloetan euskaraz ahoz eta idatziz sortu diren lanen oinarrizko informazioa biltzen du: nork, zer eta noiz argitaratu duen. Komunitate zientifiko-intelektualaren euskarazko ekoizpena bildu, aztertu eta zabaltzea...

Lotutako albisteak

19/12/2025 Euskara industrian

IndeusBerri: Industria eta Euskararen plaza

Eguberri zoriontsuak eta urte berri ona opatzeko baliatu dugu gaurko IndeusBerri, 2026a izan dadila Euskara Industrian eta Industria Euskaran aldarrikatzen dugun urtea. Bide batez, Enpresa digitalak otsailerako antolatu duen tailer bat ere aipatu nahi izan dugu eta hiztegiko kontzeptu bat: Aingeru Inbertitzaile.

12/12/2025 Euskara industrian

IndeusBerri: Industria eta Euskararen plaza

Euskarazko Wikipediaren 24.urteurrena, Euskrowd ekimena, Adimen Artifizialari buruzko jardunaldi interesgarri bat eta Proba-datu dira gaur bildutako albisteak.