Onkoreplica eta Semi Zabala, 2025eko Toribio Echevarria sarien irabazleak
Onkoreplica enpresak, Startup eta Enpresa Proiektuen kategorian, eta Semi Zabalak, Enpresa Berritzailearen kategorian, Toribio Echevarria 2025 sarien 35. edizioko sari nagusiak irabazi dituzte, proposamenen izaera berritzaileagatik eta merkatuari balio bereizgarria emateko duten potentzialagatik.
Horiekin batera, Replay by Wellk eta Acha Herramientas enpresek ere toki garrantzitsua izan dute ekitaldian, Eibarko Enpresa – Made in Eibar saria eta Eibarko Udalak emandako “Iñaki Goenaga” aitorpena jaso baitituzte. Gainera, Reiner Groupek —2010eko edizioan teknologiko kategorian saritua— aipamen berezia jaso du 2025ean bere mendeurrena ospatzeagatik.
Hala, bost enpresa hauek Toribio Echevarria sarien —Euskal Autonomia Erkidegoko ekosistema ekintzailean erreferentzia gisa finkatu den ekimena— aitortutako enpresen zerrendan sartu dira.
Toribio Echevarria sariak Eibarko Udalak eta BIC Gipuzkoak sustatutako ekimena da eta bertan parte hartzen dute Eusko Jaurlaritzako Ekonomia-Garapen, Jasangarritasun eta Ingurumen Saileko Eraldaketa Digitalaren eta Ekintzailetzaren Zuzendaritzak eta Gipuzkoako Foru Aldundiko Ekonomia Sustapeneko eta Proiektu Estrategikoetako Departamentuak
Ekitaldian Ane de Ariño Eusko Jaurlaritzako Ekintzailetzako zuzendariak parte hartu du, eta sarituak zoriondu ondoren, adierazi du Eusko Jaurlaritzak “industria babesten duela, gure Euskadi 2030 Industria Planean jasota dauden ekintza zehatzekin egiten dugulako. Bide-orri argi bat, premisa are garbiago batetik sortua: industria Euskadiren iragana, oraina eta etorkizuna da. Gure aurrerabidearen, aberastasunaren eta ongizatearen iturria da ”
“Ziur nago – azpimarratu du- Toribirio Echevarriaren balioekin eta pentsamenduarekin guztiz bat datorren planteamendua dela. Toribio Echevarríaren figurak dakarren aurrerapenak gure industrian eta enpresa ulertzeko moduan oso presente jarraitzen du. Gure Industria Plan berria, hain zuzen ere, balio horien oinordekoa da: berrikuntzaren, lankidetza publiko-pribatuaren eta jasangarritasunaren aldeko apustu irmoa, Euskadirentzat aberastasuna, kalitatezko enplegua eta gizarte-ongizatea sortzen duten proiektuak bultzatuz “.
2025eko enpresa irabazleak
Startupak eta enpresa-proiektuak
Onkoreplica: botika onkologikoak testatzeko soluzioak eskaintzen ditu, pazienteen tumoreen 3D in vitro ereduak garatuz.
Enpresa Berritzailea
Semi Zabala: Backend zerbitzuen lerro pilotu bat garatzen du, sektore espazialerako GaN gailuak fabrikatzeko.
Eibarko Enpresa-Made in Eibar saria
Replay by Wellk: plataforma digital integrala eskaintzen du kirol-klubetarako eta errendimendu altuko inguruetarako.
Iñaki Goenaga aitortza
Acha Herramientas: 85 urteko ibilbidea duen enpresa eibartarra, doitasun-tresnak fabrikatzen eta merkaturatzen dituena.
Aitortza enpresa-ibilbideari
Reiner Group: duela 100 urte sortua eta doitasun handiko injekzio bidezko moldekatzean espezializatua, nagusiki automobilgintzan eta medikuntzan lan egiten duena.
