Eusko Jaurlaritzak berrikuntza irekiko 23 proiektu sustatuko ditu startup eta enpresen artean, BIND plataformaren 10. edizioan
BIND berrikuntza irekiko plataformak 10. edizioa abiaraziko du mundu osoko 21 startupen parte-hartzearekin. Aurten, 23 proiektu teknologiko garatuko dira Euskadiko 70 enpresa liderrekin batera, Eusko Jaurlaritzaren eta SPRI Taldearen bultzadari esker. Programa publiko-pribatu hori 2016an jarri zen abian, eta, harrezkero, 250 startup baino gehiagori lagundu die eta 360 proiektu baino gehiago bultzatu ditu.
Hautatutako startupek Euskadiko enpresa handiekin lan egingo dute, hala nola, Repsol-Petronor, Betsaide, Elecnor, Ingeteam, GH Cranes, Maier, Orona, Tubacex, Valoriza, Keralty, Uvesco eta abar. Garatutako soluzioak uztailaren 2an aurkeztuko dira BIND Demo Day ekitaldian. Sektore horrek duen erreferentziazko ekitaldia da hori, eta urtero 500 parte-hartzaile baino gehiago biltzen ditu; besteak beste, enpresak, sozietate publikoak, inbertitzaileak eta berrikuntzaren eta ekintzailetzaren funtsezko eragileak. Industrian startupak eta enpresak aplikatzen ari diren azken joerak eta soluzio teknologikoak ezagutzeko hitzordu saihestezina.
Adimen Artifiziala, IoT eta Clean Tech, euskal industriarako funtsezko teknologiak
BINDen 10. edizio honetan martxan jarriko diren proiektuen teknologien artean, honako hauek nabarmentzen dira: partner enpresek hautatutako proiektuen % 40an Adimen Artifiziala aplikatuko da; % 21ean Clean Tech teknologia; eta parte hartzen duten euskal enpresek aukeratutako soluzioen % 9an IoT teknologia.
Proiektuak urteko lehen seihileko honetan garatuko dira, eta helburu nagusi hauek dituzte:
- Industria-prozesuen trazabilitatea digitalizatzea, automatizatzea eta areagotzea.
- Makineriaren mantentze-lanak hobetzea.
- Logistika, balio-katea eta baliabideen zirkulartasuna optimizatzea.
- Osasun digitala sustatzea.
Nazioartean erreferentzia den ekimena
BINDen hamargarren edizio honetan parte hartzeko deialdiak 74 herrialdetako 882 startupen hautagaitzak baino gehiago jaso zituen. Hautagaitza horiek BINDeko bazkide diren enpresek proposatutako 12 erabilera-kasuetarako soluzioak proposatzen zituzten, prozesuen eta eragiketen, jasangarritasunaren, bezeroaren eta negozioaren eta osasunaren arloetan.
2016an egin zen lehen ediziotik, plataforma hazi egin da, eta nazioartean berrikuntza irekiko erreferentzia-eredu gisa finkatu da. Aurten, hautatutako 21 startupen jatorriari dagokionez, 7 atzerritarrak dira, Alemania, Frantzia, Erresuma Batua, Estatu Batuak eta Mexikokoak. Estatuko startupen artean, aukeratutako 10 EAEkoak dira: 7 Gipuzkoakoak eta 3 Bizkaikoak. Gainerako 4ak Bartzelona, Pontevedra, Santander eta Sevillakoak dira.
Hamargarren edizio honetan parte hartuko duten startupek doako azelerazio-programa bat izango dute eskura. Programa horretan, mentoriak, networking saioak berrikuntzaren eta ekintzailetzaren euskal ekosisteman eta inbertitzaileekiko konexioa egongo dira.
Hauek dira azelerazio-programaren 10. edizioan parte hartuko duten startupak:
- Acuratio
- Ailoys
- Alhomna Systems
- Deduce Data Solutions
- Electrogenos
- Emaia Health
- Flexoo
- Isso Technologies
- Innkia Artificial Intelligence
- Muutech Monitoring Solutions
- Neety
- Nneat
- Photokrete
- Process Talks
- reLi Energy
- RueData
- SMARTPM
- SpiralWave
- Trebezia
- Ubitelcare
- Zeru Drones
BINDi buruz
BIND industria adimenduneko berrikuntza ireki publiko-pribatuko plataforma da, Industria, Trantsizio Energetiko eta Jasangarritasunaren Sailak sortua, SPRI Taldearen bidez. BINDek hiru ekimen ditu: BIND Corporate, BIND SME eta BIND GovTech, Euskadiko enpresak, ETEak eta sozietate publikoak mundu osoko startup disruptiboekin konektatzeko eta berrikuntza-proiektuak garatzeko. 2016an martxan jarri zenetik, 250 startup baino gehiago bizkortu dira eta 360 proiektu baino gehiago garatu dira, 9,6 milioi euroko fakturazioa gaindituta. Era berean, plataforma erreferente bihurtu da sektorean, lurraldeko industria eta enpresa-sarea digitalizatzen laguntzeagatik.
