Erandioko laborategi bat liderra da elikadurako osagarrien sektorean
Nahiz eta sektore atomizatua izan, non teknologia commodity gisa ikusten den sarritan, Euskadi, beste merkatu-hobi batzuetan gertatzen den bezala, erreferentziazkoa da elikadurako osagarrien arloan ere. Bizkaian, Erandion bertan, osagarri nutrizionalak formulatzen eta fabrikatzen dituen laborategi bat dago, Europan erreferentziazkoa dena. Duela 12 urte sortutako ETE bat da, NUA Biological Innovations du izena eta horrelako osagarrien fabrikazioan eta banaketan dihardu, ondoren salgai jartzeko farmazia, belar-denda edo dietetiketan. Arestian AEDek (Bizkaiko Emakumezko Enpresari eta Zuzendaritza-karguen Elkartea) saritutako Mercedes Aguirre (Biologiako doktorea) da enpresako zuzendaria.
Nola azaldu dezakegu zer den NUA?
Elikadurako osagarrietan espezializatutako laborategi bat gara, nazioarteko liderrak itsasoko omega-3 gantz-azido oso purifikatu eta kontzentratuen (DHA eta EPA) garapenean eta merkaturatzean.
2008an enpresa sortu genuenetik, merkatuan parekorik ez duten formulazioak garatu ditugu, horretarako oinarritzat hartuz etengabeko ikerketa eta garapen jarduera bat, bereziki bideratua dagoena gure organismoak erraz barneratzen dituen osagarri nutrizional espezifiko eta konposatuak eskaintzera.
Zer da zehazki elikadurako osagarri bat edo osagarri nutrizional bat?
Elikadurako osagarri bat da nutriente-iturri kontzentratu bat (adibidez, bitaminak, mineralak edo landareen erauzkinak, olioak…) ematen digun elikagai mota bat. Ez du errezetarik behar, eta normalean farmazietan, belar-dendetan edo dietetika zentroetan erosten da. Produktu horien helburua da gure elikaduraren osagarri izatea gabezia nutrizionalen bat dugunean.
Erandion formulatzen dituzuen osagarriek zertan laguntzen diete pertsonei?
Lagungarri izan litezke arlo askotarako. Adibidez, kontzentrazioa eta arreta hobetzeko edo portaera asaldatuak tratatzeko; halaber, badaude nutrienteak azaleko zimurrak disimulatzeko, ugalkortasuna hobetzeko, bihotz-hodietako osasuna zaintzeko… Arnasketari dagokionez, ongi prestatutako osagarri bat dugu arnasbideetako infekzio birikoek eragindako ondorioak hobeto jasateko (berdin balioko luke COVID-19aren ondorioentzat ere). Argi dago produktu hauek ezin dutela ordezkatu tratamendu medikoa, baina haien osagarri izan litezke, eta baliagarri dira askoz hobeto jasateko osasun arloko arazoak eta horien aurkako tratamenduak.
Enpresa hau berrikuntzaren ondorio zuzena da…
NUA ikerketatik sortu zen duela 14 urte, interes berezi bat sortu zenean itsasoko Omega-3arekiko. Orduan hasi ginen aztertzen zer zegoen merkatuan, eta iruditu zitzaigun produktuak nahiko kaskarrak zirela, gantz asko baina Omega-3 gutxi zutelako. Horregatik, nutriente hori nola potentziatu pentsatzen hasi ginen. Handik bi urtera, potentzia handiko kontzentratu bat lortu genuen, ordura arte merkatuan zegoenarekin alderatuta izugarrizko eraginkortasuna zuena.
Eta zer gertatu zen orduan?
Orduan pentsatu behar izan genuen zer egin garapen berritzaile eta harrigarri harekin: kaxoi batean sartu eta ahaztu, edo garatu eta ezagutzera eman. Eta honaino iritsi gara. Erabaki genuen igerilekura jauzi egitea, enpresa sortu genuen eta merkatuan sartu ginen produktu bakar harekin.
Bide batez, nondik dator NUA izena?
“Berria” esan nahi du gaelikoz. Gure laborategiaren izen osoa Nua Biological Innovations S.L. da, hau da, “ikerketa biologiko berriak”. Izen horrek primeran definitzen ditu gure espiritua eta filosofia, hots, elikadurako osagarrien merkatuan berritzea merkatuari benetako balio erantsia ematen dioten kontzeptu berritzaileekin.
Nolakoa izan da enpresaren bilakaera hamabi urte hauetan?
Gure lehen produktua 2008an merkaturatu genuen, krisi ekonomiko handi baten atarian, baina horrek ez gintuen geldiarazi eta aurrera jarraitu genuen proiektuarekin, uste osoa baikenuen gure produktuan. Hasiera motela izan zen, ahalegin, irudimen eta pertseberantzia handiz lan egin behar izan genuen. Denborak aurrera egin eta hazten joan ahala, aurre egin behar izan genien egoera konplexuei, eta gure marka defendatu eta balioan jarri behar izan genuen mehatxutzat ikusten gintuzten hirugarrenen aurrean.
Zientziari eta Ikerketari dagokienez, zure ustez Euskadik zenbateraino hartzen du serio I+G-ren aldeko apustua?
Iruditzen zait I+G-k toki garrantzitsua duela Euskal Autonomia Erkidegoan, eta horren erakusgarri da duela urte askotik ditugula martxan teknologia berritzaileak garatzera bideratutako teknologia-zentroak. Gainera, oker ez banago, Euskadi da arlo horretan gehien inbertitzen duen Espainiako autonomia. I+G-k pazientzia handia eskatzen du, denbora behar baita ikerketarako. Hala ere, uste dut ongi antolatutako I+G baten aldeko apustuak fruitu ugari eman ditzakeela etorkizunean.
Zurea bezalako milaka laborategi daude, “txanpinoiak bezala” hazten direla esan izan duzu… Zerk bereizten zaituzte gainerakoengandik Europan erreferente izateko?
Gourmet osagaiak erabiltzen ditugu gure formulazioak garatzeko, hau da, potentzia eta kalitate gorenak dituztenak, erabiltzaileak aldea nabaritu dezan amaierako produktuan. Baldintza horretatik abiatuta, azterketa klinikoak egiten ditugu, bai eta kanpoko kalitate kontrolak, eta nolabait, eraginkortasun frogatua bermatzen dugu. Eta hori guztia azpimarratu nahi dut, gure sektorean etengabe ikusten ditugulako itxuraz eta izenez berdinak izan daitezkeen osagarriak, baina kalitatean eta eraginkortasunean gurearengandik oso urrun daudenak…
Zergatik?
Marketin on batekin edozer sal daitekeelako, eta askotan sinestarazten digutelako produktu kaskar bat zoragarria dela, nahiz eta hori horrela ez izan. Nua-n uste dugu propaganda hori engainagarria dela. Esan bezala, kalitate, segurtasun eta eraginkortasun berme objektiboak eskaintzea gustatzen zaigu.
Zu laborategiko emakumea zara, Zientzia eta Ikerketa arlokoa… Enpresa profil berri horri dagokionez, zer da gehien kostatzen zaizuna?
Ez ditut sobera gustuko gai legal, burokratiko edo administratiboak, baina badakit enpresaren egunerokoaren parte direla. Horregatik, borondate guztia jartzen dut ikasteko eta dena aurrera ateratzeko.
Lotutako albisteak
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
HIMUGI proiektuak mugikortasunean eta garraioan aplikazioak dituen hidrogeno-propultsio sistema bat lortu nahi du
Euskal erakundeen arteko partaidetza eta lankidetza handia du, eta SPRIren Hazitek programaren laguntza ekonomikoa jaso du.
Ceit zentro teknologikoak 300 enplegu baino gehiago sortzen dituzten 20 spin-off sustatu ditu eta 30 M € inguruko inbertsioa ekarri dute
Mikel Jauregi sailburuak Ceit bisitatu du, ikerketa aplikatuko eta teknologia enpresara transferitzeko erreferentziazko zentro teknologikoa
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.