Emakumeek industriaren lehiakortasunean eta berrikuntzan duten garrantzia defendatuko du SPRIk Porton eta Parman
Teknologia, Berrikuntza eta Jasangarritasun arloko zuzendari Cristina Oyónek azterlan baten emaitza aurkeztu du aste honetan Porton eta hurrengo astean Parman. Azterlan horretan, industria-enpresen berdintasun-mailaren eta lehiakortasun-mailaren arteko erlazioa aztertu da, eta, horren arabera, “aniztasun- eta berdintasun-indize handiak lehiakortasun handiagoarekin lotuta daude”, eta “enpresarik berdinzaleenak lehiakorrenak dira, eta emaitza hobeak lortzen dituzte fakturazioa eta enplegua handitzeko lanean, I+G+b jardueretan eta nazioartekotzeko zereginetan”.
B-Women In Industry
2020az geroztik, SPRIk Women in Manufacturing aditu-taldea gidatzen du Back to the Future proiektuaren barruan. Egoitza Milanen duen World Manufacturing Foundationerakundeak sustatzen duen ekimen horren helburua da mundu osoan kultura industriala zabaltzea. SPRIren baitan, ekimena B-Women In Industry estrategiaren parte da.
SPRI taldeko Teknologia, Berrikuntza eta Jasangarritasun arloko zuzendari Cristina Oyón buru dela, Women in Manufacturing taldeak hogei adituren lana bildu du hilabetetan. Aditu horiek manufakturaren hainbat alorretan diharduten lau kontinentetako enpresetatik, nazioarteko erakundeetatik eta ikerketa-zentroetatik datoz, eta helburua emakumeek industrian duten egoerari buruz eztabaidatzea izan da. Era berean, emakumeak industria-enpresetan sartu eta enpresa horietan igo eta liderrak izateko jardunbide onak eta gomendioak identifikatu dituzte. Eztabaida eta ondorio nagusiak World Economic Foundationerako egin diren txostenetan jaso dira. Hemen ere azalduko dira jarraian.
Porto
Zehazki, SPRIk 360 Tech Industry azokan parte hartuko du maiatzaren 22an eta 23an. Ekitaldia Porton egiten da, eta industria-berrikuntzako azken berritasunak ezagutzera ematen dira bertan. Saioetako baten esparruan, teknologian eta fabrikazioan emakumeen presentzia sustatzeko ekimenak azaldu dira. Hartara, lehiakortasuna hobetzeko eta erakundeen arrakasta bultzatzeko zer zeregin duten aztertu da. Bestalde, STEM alorretara emakume gehiago erakartzeko zenbait ikuspegiri buruz gogoeta egin da, baita emakumeen talentua eskuratzeari eta genero-berdintasuna lortzeko erronkei buruz ere.
Cristina Oyónek parte hartu duen saioan, moderatzailea Antoni Pijoan izan da, EIT Manufacturing Westen zuzendari nagusia, eta hizlari hauek jardun dira: Víctor Alonso, fabrikaziorako eta trantsizio digitalerako CTAGko zuzendari laguntzailea; Teresa Hernández, EIT Manufacturingeko Women TechEU proiektuko burua; eta Ana Alcaine, EIT Community Programeko Supernovas proiektuaren arduraduna.
Parma
Modu berean, SPRIk azterlan bera aurkeztuko du SPS Parma azokan, maiatzaren 28tik 30era arte. Industria-automatizazioko Italiako azoka da, eta ekitaldi nagusia bertako fabrikazio adimendun, digital eta malguaren esparruan. Izan ere, erreferentzia bat da italiar manufakturan. Cristina Oyón irekiera-saioan parte hartzera gonbidatu dute, eta, horren ostean, She SPS Italia Award sarietan egongo da. Sari horiek ematen dituen komunitateak emakumezko erreferentzien arrakasta-kasuak zabaltzen ditu industriarako automatizazioaren eta berrikuntzaren munduan.
SPRIren azterlana
Women in Industry arloan garatutako lanetako bat da hitzaldian aipatutako SPRIren ikerlana. Zehazki, emakumeek industrian duten presentziaren gaineko datu kezkagarrien aurrean, lan honi ekitea erabaki zuen SPRIk, UNIDOk (United Nations Industrial Development Organization) 2019an nabarmendutako premisa bat frogatzeko helburuz: “Genero-berdintasuna giza baliabideekin lotura duen gaia izateaz gain, lehiakortasuna eta susperraldi ekonomikoa bermatzeko funtsezko gaia ere bada”.
Azterlanaren baitan, genero-berdintasunaren eta lehiakortasun industrialaren arteko korrelazioa aztertzeko aukera ematen duen metodologia bat garatu dute. Gainera, azterketa-kasu bat garatu dute; horretarako, inkesta bat bidali diete sektore industrialeko eta industriarekin lotutako zerbitzuak eskaintzen dituzten SPRIren datu-baseko 2.500 euskal enpresari, eta 474 erantzunez osatutako lagina lortu dute.
Laginaren analisiak agerian utzi duenez, EAEko industriako langileen % 21,7 baino ez dira emakumeak. Euskadiko lan-merkatuaren % 44 ordezkatzen dutela kontuan hartuta, datu kezkagarria da. Oro har, emakumeen presentzia txikiagoa da enpresetan, prestakuntza-maila edo saila edozein izanda ere, baina nabarmen jaisten da lidergo-posizioetan. Izan ere, inkestan parte hartu duten konpainien % 13k bakarrik du emakume bat zuzendari.
Ondorioek frogatzen dutenez, genero-berdintasuneko maila handiena duten enpresak lehiakorragoak dira, eta emaitza hobeak dituzte fakturazioari, enpleguari, I+G+b arloari eta nazioartekotzeari dagokienez. Gainera, enpresa lehiakorrenek genero-berdintasunaren maila altuagoa dute. Hortaz, honako giltzarri hauek identifika daitezke berdintasunean oinarrituta lehiakortasuna bultzatzeko:
- Bereizketa horizontala (sailka).
- Bereizketa bertikala (erantzukizun mailaren arabera).
- Laneko eta norberaren bizitzaren arteko kontziliazio-neurriak (ordutegi-malgutasuna, telelana, zaintzetarako baimenak…).
- Berdintasuneko barne-politikak (planak, batzordeak, prestakuntza eta berdintasun-protokoloak).
Emaitza horiek potentzial handia dute enpresetan genero-berdintasuneko politikak ezartzeko garaian motibazioa sortzeko tresna gisa; izan ere, frogatuta geratu den moduan, “genero-berdintasuna giza baliabideekin lotura duen gaia izateaz gain, lehiakortasuna eta susperraldi ekonomikoa bermatzeko funtsezko gaia ere bada”.
Lotutako albisteak
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa
UNIREn bigarren edizioak 80 enpresa baino gehiago bildu ditu FICOBAn
Soldaduran eta beste lotura-teknologietan espezializatutako Estatuko azoka bakarra da
Euskadik Europan herrialde berritzaile gisa duen ahala finkatu du, enpresa txiki eta ertainen ahaleginari esker
Topaketak lurraldeko eta sektoreko berrikuntzaren 30 eragile eta Euskadiko 70 enpresa txiki eta ertain baino gehiago bildu ditu; eragile eta enpresa horiek 2023an berrikuntza-proiektu bat garatu dute HAZINNOVAren bidez, SPRIk eta Innobasque, Berrikuntzaren Euskal Agentziak kudeatutako Eusko Jaurlaritzaren programaren bidez
Soldaduraren balio-kateari buruzko azokaren, UNIREren, bigarren edizioa egingo dute Ficoban
Sektore horrek Estatu osoan egiten duen kongresu bakarra martxoaren 18 eta 19an izango da
Diker, osasungintzaren sektorerako injekzio bidezko plastikoetan Euskadi mailako erreferente bihurtu nahi duen ETEa
Oiartzungo enpresa, gaur egun, batez ere automobilgintzaren eta elektronikaren sektorearentzat ari da lanean