Arabako multinazional horrek, 100dik gora herrialdetan presente dagoenak, erantzunak eskaintzen dizkie metalaren industriaren digitalizazio-prozesuetan sortzen diren arazo zehatzei
Lantek-ek, metalezko txapa, hodi eta profilen eraldaketa eta deformazio sektorera beraizik zuzendutako lantegiko kontrol eta kudeaketarako software konponbideak (CAD/CAM/MES/ERP) garatzen, merkaturatzen eta integratzen dituen konpainiak, Miñaon dauzka bere bulegoak. Duela 33 urte sortua, 20 bulego ditu 14 herrialdetan, 244 langile enplegatzen ditu (2018an 30 langile gehiago hartu zituen), eta benetako erreferente teknologikoa da nazioartean. 4.0 Industriaz eta Lantek enpresaren etorkizunaz mintzatu gara Lantek-eko zuzendari nagusi Alberto López de Biñasprerekin.
Zein da Lantek enpresaren jarduera?
Jatorria Euskadin duen multinazional bat da, bere sektoreko antolakunde teknologiko aitzindari bihurtu dena eta bere portfolio tradizionalean fabrikazio aurreratuko konponbide espezifiko berriak txertatu dituena, erantzunak emateko metalaren industriaren digitalizazio-prozesuan sortzen diren arazo zehatzei. Teknologiaz hornitzen ditugu fabrikatzaileak, 4.0 Industriaranzko bideari ekin diezaioten, horrela lortuko baitute lehiakorrago, errentagarriago eta, beraz, sostengarriago izatea ekonomia hiper-konektatuaren merkatu globalean. Proiektuak eta konponbideak diseinatzen eta gauzatzen ditugu metalaren (txapa, hodi eta profilak) eraldaketako enpresentzat. Horretarako, arreta bereziz aztertzen ditugu bezeroen premiak: beren arazoak identifikatzen ditugu eta konponbide baliagarri eta egokituak proposatzen dizkiegu, eta, horrezaz gain, lantegien, bulegoen, tailerren eta abarren kudeaketan sor litezkeen egoerei aurre hartzen diegu.
Nolako harremana du Lantek-ek 4.0 Industriarekin?
Lantek-en natibo digitalak gara. Gure helburua da metal eta txapa eraldaketaren sektoreko enpresei laguntzea beren digitalizazio prozesuan. Makinez dugun jakintza handia konbinatzen dugu teknologia berriekin eta merkatuko joerekin, horrela Smart Factory bat sortzeko. Lantegi adimendunetan makinak elkarrekin konektatuta daude Gauzen Internet bidez, zehazki cloud plataformekin, eta horri esker prozesuak automatizatu eta koordinatu daitezke. Negozioari balioa ematen dioten datuak erauziz eta behar bezala aztertuz, posible da produkzio-prozesua hobeto kontrolatu eta bistaratzea, eta erabiltzaileak denbora errealean interpretatzen du informazioa, hori lagungarri delarik erabakiak hartzeko.
Gainera, aukera bertikal eta horizontal berriak aztertzen ari gara partner industrial berriekin lankidetzan jarduteko, 4.0 Industriaren ezaugarri garrantzitsuenetako bat delako sistemen integrazioa eta plataformen arteko komunikazioa. Produktu bakar bat eskaini beharrean, saiatzen gara ulertzen zein fasetan dagoen antolakundea eta bere lantegia digitalizatzen laguntzen diogu.
Esango dizkiguzu 4.0 Industriaren eta eraldaketa digitalaren arloan eskaintzen dituzuen zerbitzuen adibide eta kasu arrakastatsu batzuk?
4.0 Industriaren adibideetako bat da Espainiako enpresa multinazional batekin daukagun lankidetza teknologikorako akordioa; enpresa hori mundu mailako liderra da makinentzako kontrol numerikoen fabrikazioan eta Lantek-en konponbide bat, Lantek Expert Inside, integratu du ebaketa-makinen kontrol numerikoetan. Urrats horri esker erabiltzaileak azkarrago, eraginkorrago eta produktiboago bihurtzen dira, hobeto kontrolatu dezaketelako mekanizatuen kudeaketa eta ez bulego teknikotik edo produkzio sailetik, baizik eta tailerretik bertatik, langilearen bitartez eta modu azkar eta sinple batean.
Duela gutxi, Lantek-ek proiektu bat garatu du enpresa sortu berri batentzat, zeinak laser bidezko onlineko ebaketa-zerbitzu oso bat eskaintzen baitu, apustu sendoa eginaz berrikuntzaren eta teknologia berrien alde. Garapenaren eta merkatuaren abangoardian mantendu dadin, Lantek-ek bezeroentzako webgune automatizatu bat egin dio, baliagarri dena bai txaparako eta bai hodi/profilentzako. Onlineko denda horren bidez erabiltzaileek minutu gutxiren buruan eskuratu dezakete laser automatizatuzko ebaketaren aurrekontu bat 2D eta 3D fitxategientzat. Konpainiak ez du ezer egin behar, prozesua erabat automatizatuta dagoelako, hasi artxiboak kargatzen direnetik edo piezen ezaugarriak sartzen direnetik (materiala, lodiera, kopuruak) eta aurrekontua kalkulatu eta eskaera sortzeraino.
Lantek-ek orobat garatu du Touch & Play berrikuntza teknologikoa, Lantek Inside modulu bat, bertan bildu duelarik mekanizatu prozesuetan eta errealitate areagotuko teknologia berrietan duen esperientzia guztia. Konponbide horrek abantaila handiak eskaintzen ditu: mekanizatuak makinan bertan editatzeko eta berriak sortzeko aukera, piezak gehitu edo ezabatu ahal izatea bulego teknikora itzuli beharrik gabe… horrek guztiak askatasun handiagoa ematen dio langileari materialaren aprobetxamendua maximizatzeko eta piezak egiteko nahiz erantzuteko behar den denbora murrizteko.
Nazioartean duzuen esperientzian oinarriturik, nola aurre egin zaie Euskadin eraldaketa digitalaren erronkei?
Euskadin sentsibilizazio maila handia dago, ulertzen da 4.0 Industriaren gaitasunak barneratu eta konponbideak ezarri behar direla lehiakor izango bagara. Beste herrialde batzuetan dauzkagun bulegoetan ikusi dugu apustu sendoak egiten ari direla, adibidez Italian edo Hego Korean, non industria sektoreak laguntza-programa indartsuak jasotzen baititu, eta horrek azkartu egin du gure bezeroen eraldaketa-prozesua. Baita ere ikusten dugu eskualde batzuk oso sentsibilizatuta daudela 4.0 Industriarekin, hala nola Euskadi, eta gure konpainia sortu zenetik guretzat funtsezkoa izan da ingurune honetan egotea, makina-erremintaren fabrikazioko enpresek presentzia handia dutelako hemen eta horrek lehiakortasun abantaila ematen digulako. Gure alde dugu euskal industria-sarearen dinamismoa eta baditugu baita ere Lantek-en ikuspegi berritzailea eta eraldaketa digitalaren arloko inbertsioetarako erraztasunak.
Zeintzuk dira Lantek enpresaren etorkizuneko erronkak?
Hazkunde helburu bat finkatu dugu 2019rako: gure bezeroei lehiakortasuna hobetzen laguntzen jarraituko dugu merkatu globalean, kostuak eta denborak murriztuz produktiboago eta errentagarriago izan daitezen. Horretarako, gure berrikuntza prozesua azkartzen jarraituko dugu, inbertsio handiak eginaz hobekuntzak sartzeko gure konponbide eta zerbitzuetan.
Orain gure estrategia da fabrikazio aurreratura bideratutako konponbide osoak garatzea, lantegiak eta prozesuak konektatzen dituztenak, gure bezeroen eraldaketa digitala errazteko eta Smart Factory bihurtzeko. Apustu tinkoa egingo dugu negozio-eremu hori eskalatzeko.
Azkenik, gurea bezalako beste enpresa teknologikoen kasuan bezala, guretzat pertsonak eta talentua dira gure arrakastaren giltzarria eta gure benetako balorea, horregatik apustu egiten dugu gure eraldaketa kulturalaren alde.
Bilboko Ingeniaritza Eskolak Informazio eta Komunikazio Teknologien (IKT) eta...Leer más
Partekatu
AEBetako Defentsa Saileko Berrikuntza Unitateak (DIU) CounterCraft euskal enpresa...Leer más
Partekatu
Arantxa Tapia Ekonomiaren Garapeneko, Jasangarritasuneko eta Ingurumeneko sailburuak, gaur,...Leer más
Partekatu
Euskadiko I+G-ko teknologia- eta azpiegitura-eskaintza publiko-pribatua kudeatzen duen Basque...Leer más
Partekatu
Ekimenean murgilduta dauden trakzio-enpresek 73 herrialdetatik jaso diren 750 hautagaitzak –iaz...Leer más
PartekatuEguneroko informazioa, jarduera-sektoreka eta intereseko
hartzeko.
ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.
Interesgarria, ezta?