Enpresa-garapenerako
euskal agentzia
Enpresa-garapenerako
euskal agentzia
Oinarri gisa irudiak dituen agenda kultural bat sortu du Bilboko startup horrek
Enpresaren bultzatzaileek Cádizera egin zuten bidaia batean jaio zen sortzeko ideia. Ez zuten hiria ezagutzen, eta ohartu ziren zaila zela ekitaldi kulturalak aurkitzea, informazioa kanal askotan baitzegoen banatua. “Pentsatu genuen egon behar zuela modu errazagoren bat informazio hori guztia eskuratzeko, ez bakarrik ekitaldi nagusiei buruzkoa, baita tokian tokiko areto txikietakoen gainekoa ere”, diosku Postwalleko zuzendariak, Aritz Fernándezek.
Sarritan, hiriko kaleetan egoten da informazio hori, paretetan itsatsitako karteletan. “Horma haiek agenda bat ziren, nolabait, eta horrela sortu zitzaigun posterretan oinarritutako agenda kultural bat sortzeko ideia. Kalean gertatzen dena agendara bildu genuen”, dio Aritzek. Horrela jaio zen Postwall proiektua, eta duela urtebete plazaratu zen, mugikor-aplikazio eta webgune gisara.
Kartelen komunikazio-indarraz baliatzen da aplikazioa leku bakoitzeko ekitaldien berri emateko. Batez ere musika-kontzertuei buruzko informazioa ematen du, baina baita arte eszenikoei, zinemari eta kultura-jarduerei buruzkoa ere. Enpresa sustatzaileek eta artistek doan igo ditzakete beren ekitaldiak; baldintza bakarra, posterra egotea. Erabiltzaileentzat, hirian zer ekitaldi dauden jakiteko modu azkarra eta bisuala da; sustatzaileentzat, berriz, beren ekitaldien berri emateko tresna xumea, kartelean ageri den informazioa aprobetxatuz. Beste helburu bat ere badu aplikazioak: plazaratzea posterrak egiten dituzten diseinu grafikoko profesionalen lana, jendaurrean azaltzea haien jarduera eta beren burua ezagutarazteko erakusleiho bat eskaintzea.
Bi finantziazio-bide ditu aplikazioak gaur egun. Ekitaldiak doan igo daitezke, baina badago ordainpeko modalitate bat ere, jarduerei oihartzun handiagoa ematen diena eta publizitatea ere baduena. Beste finantziazio-iturri batzuk garatu nahi ditu startup horrek etorkizunean; besteak beste, sarrerak erostea, posterrak saltzea eta kontzertuen merchandisinga.
2017ko azaroan hasi zen lanean Postwall, eta espainiar estatuko hiri nagusietan dihardu jada; 2019rako, berriz, estatu osoan jarduteko asmoa du, kultura-agenda gisara erreferentzia bihurtzeko. Plazaratu zenean, Beaz-en laguntza jaso zuen; duela gutxi, berriz, lehen saria eman diote Bilbao Ekintzak antolatzen duen Ekintzailetza Digitalaren lehiaketan.
Hemen aurki ditzakezu gure ekitaldiak, argitalpenak eta eduki guztiak.
