Euskal enpresaren blog-a Zure enpresarentzat garrantzitsua den eguneroko informazioa
20 abendua, 2018

Adimen artifiziala euskal enpresetara eraman nahi du AiPower-ek

AiPower-ek antolatutako topaketetako bat

 

Adimen artifizialari buruzko lehen euskal venture builderak datozen hiru urteetan AA-ko 10 startup sortzea du helburu.

 

Adimen artifiziala gero eta gehiago agertzen da enpresa industrialen eraldaketa digitaleko prozesuetan. Datuak analizatzeko, roboten edo makinen portaera aurresateko eta, ikusmen artifizialeko tresnen bidez, objektuak detektatzeko erabiltzen da. 4.0 Industriaren etorkizuna adimen artifizialari estu lotuta dago, eta horren aldeko apustua egin du AiPower-ek. Euskadin eta estatuan abian jarri den lehen venture buildera da AiPower, eta etorkizuneko erronka industrialei soluzioak ematen dizkien startup-ekosistema bat sortzea du helburu. Jon Blázquez eta Amaia Palacio izan ditugu solaskide, AiPower-en sortzaileetako bat eta kolaboratzaile bat, hurrenez hurren.

 

Zein da AiPower-en helburua?

Venture builder bat gara, startup-en inkubagailu baten antzekoa, eta adimen artifizialean dugu gure ezagutza-muina. AiPower-en, AArekin erlazionatutako ideiak eta enpresa-proiektuak zehazten ditugu, eta ekintzaileekin lotzen ditugu ideia horiek, startup bat sustatu dezaten.

Adimen artifizialari, ekintzailetzari eta talentuari buruz dugun ezagutza batzen dugu Euskadira eta gure beharretara egokitutako startup-ak sortzeko. 2018ko otsailean jarri zen martxan AiPower, eta 2019ko otsail-martxorako lehen bi enpresak eratzea espero dugu. Gure helburua da adimen artifizialari lotutako 10 ‘startup’ sortzea hurrengo hiru urteetan. Are gehiago, 2019ko urtarrilaren 25etik 27ra bitartean, AiPower-ek, Eywa Space-rekin (EB/EA arloetako venture builderarekin) lankidetzan, ekitaldi bat egingo du, “Startup Tech Weekend” deritzona, eremu teknologiko horietakoren batean startup bat sortu eta startup-aren ‘building’ programan sartu nahi dutenei zuzendua.

 

Zer sektoretara bideratuta egongo lirateke ‘startup’ horiek?

Industria da helburu nagusietako bat, baina ‘legaltech’-arekin eta osasunarekin erlazionatutako proiektuak ere sustatzen ari gara. Industriari dagokionez, kalitatearekin erlazionatutako lanetan aplika daiteke adimen artifiziala; esaterako, ikusmen artifiziala erabil daiteke akatsak dituzten piezak atzemateko. Halaber, AA erabil daiteke, adibidez, aurreikuspen-analisiak egiteko eta manufaktura-prozesuetan arriskuak saihesteko. Hizkuntza naturala prozesatzeak ere aplikazio garrantzitsuak ditu 4.0 Industrian, ahotsaren bidez makinak edo robotak maneiatzeko aukera ematen baitu, eskuak beste zeregin batzuetarako libre utzita. Horrez gain, logistikan ere erabil daiteke, eskaerak aurresateko eta gure stocka hobeto kudeatzeko, eraginkortasun handiagoa lortzeko asmoz.

 

Nola dago kokatuta Euskadi adimen artifizialari dagokionez?

Zentro teknologikotan, unibertsitateetan eta zenbait startup-etan ari dira proiektuak garatzen, baina egin beharreko bidea luzea da oraindik. Enpresei zuzendutako AAko produktuak sortu behar dira. Bestalde, uste dut garrantzitsua izan daitekeela AAren eremuan lan egiten duten startup, enpresa, aholkularitza eta zentroak batzea, guztiok elkartuta gure lanari balio handiagoa emateko aukera izango baitugu. Adimen artifizialak lehiakortasunerako abantailak ematen ditu. Tresna oso isila baina oso ahaltsua da, eta enpresak apenas erabiltzen dituen aktiboak –datuak, adibidez– maximizatu egiten ditu. Euskadi eskualde perfektua da AAri lotutako ekosistema sortzeko. Kontuan izan, Etxe Zuriak adimen artifizialari buruzko bere estrategia 2016an jarri zuela abian. Alemaniak, berriz, duela gutxi jakinarazi du 3.000 milioi euro inbertituko dituela adimen artifizialaren inguruko bere industria sustatzeko. Une aproposa da, beraz, Euskadik ere AAren aldeko apustua egiteko.

 

Adimen artifizialaren presentzia argia da gure egunerokoan erabiltzen ditugun soluzio askotan, esaterako, webguneetan zehar gidatzen gaituzten chatbot-ak edo Siri, Alexa edo Cortana bezalako ahots-laguntzaileak ditugu, baina oso ezezaguna da oraindik.

AAri buruzko hedatze-lan handia egin behar da, berarekin zer egin daitekeen eta zer ez azaltzeko. Garrantzitsua da enpresetara eta gizartera kasu eta esperientzia arrakastatsuak hurbiltzea, zertan datzan ezagutu dezaten. Bestalde, bada adimen artifizialari lotutako eztabaida bat ere, gai etikoei buruzkoa eta adimen artifiziala erabiltzeak lanpostuak desagerrarazteko aukerari buruzkoa. Alarma sortu da, eta gizakiak adimen artifiziala beldurra sortzen duen teknologia bezala ikusten badu, ezinezkoa izango da teknologiak bilakaera azkarra izatea. Beldurrak suntsitu egin baititzake halako berrikuntzak.

Basque Industry 4.0 7 apirila, 2020
BDIH sarearen iritzia

Argazkian, Damien Sallé, Tecnaliako Robotika Teknologiaren zeharkako koordinatzailea eta...Leer más

Basque Industry 4.0 6 apirila, 2020
Optimus 3D: “Krisi honekin, fabrikazio aurreratuak adin nagusitasuna erdietsi du”

Optimus 3D euskal enpresak bere 3D fabrikazioaren zati bat egokitu du, eta maskara gardenak edo...Leer más

Ivan Mateos, Zitu enpresako zuzendari komertziala
ERIS, makina-erremintaren produkzioa hobetzeko plataforma

Zitu enpresa gipuzkoarrak software bat garatu du makinen datuak eraginkortasunez atzemateko kontrol...Leer más

Basque Industry 4.0 4 apirila, 2020
Eragile ekonomikoek positiboki hartu dute Deep Dive – 4.0 teknologietan murgiltzeko jardunaldien aurkezpena

Joan den apirilaren 1ean, Basque Digital Innovation Hub erakundeak 4.0 teknologietan murgiltzeko...Leer más

Basque Industry 4.0 2 apirila, 2020
384.000 robot industrial eta gizaki-robot lankidetza Euskadin

4.0 konponbide robotikoak, elkarlaneko fabrikazio malgua bermatzeko. Gure robotikaren hilabetearen...Leer más

Linkedin-a

Eguneroko informazioa, jarduera-sektoreka eta intereseko
hartzeko.

Laguntza berriei buruzko azken orduko albisteak

ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.

Interesgarria, ezta?