Euskal zentro teknologikoek Euskadiko garapen industrialean duten garrantzia azpimarratu du Jauregik
Mikel Jauregi Industria, Trantsizio Energetiko eta Jasangarritasuneko sailburuak gaur nabarmendu duenez, euskal zentro teknologikoak bultzatzen ari diren inpaktu handiko ekimenek funtsezko egitekoa izango dute datozen urteetan Euskadiko industriaren garapenean. Ildo horretan, bereziki nabarmendu du TECNALIAren lana, “gure herrialdearen garapen teknologiko eta industrialarekin duen konpromisoagatik”, Jesús Valero zuzendari nagusiarekin TECNALIAren egoitzan, Gipuzkoako Parke Teknologikoan, Donostian, egin duen bileran.
Sailburuak adierazi duenez, “oso garrantzitsua da Euskadiko enpresentzat, bereziki ETE-entzat, TECNALIAk duen transferentzia teknologikoaren portzentaje oso handia, I+G+b etorkizun ekonomikoaren berme bihurtzen baita ekoizpen-sarearen zerbitzura jartzen denean eta kalitatezko enplegua sortzen duenean, kasu honetan bezala”. Halaber, nabarmendu du “zentro teknologiko hau garrantzitsua da Euskadiren etorkizunerako funtsezkoak diren arloetan, hala nola fabrikazio adimendunean, energia berriztagarrietan, mugikortasun jasangarrian eta adimen artifizialean; TECNALIA erreferentea da horretan”.
Europako hegoaldeko ikerketa eta garapen teknologikoko zentro handiena da TECNALIA. Enpresa eta erakundeekin lankidetzan aritzen da, lehiakortasuna eta pertsonen bizi-kalitatea hobetzeko eta hazkunde jasangarria lortzeko.
Hala, iaz, industria-ehunarekin batera, 4.600 soluzio teknologiko baino gehiago garatu zituen adimen artifizialaren, hidrogenoaren, konputazio kuantikoaren, zibersegurtasunaren, fabrikazio malguaren, deskarbonizazioaren, ekonomia zirkularraren edo mugikortasun jasangarriaren inguruan, enpresa-sarea etorkizuneko erronketara egokitzea bultzatzeko.
BRTA – Basque Research and Technology Alliance aliantzako kide da TECNALIA, beste 16 euskal zentro teknologikorekin batera. Egoitza nagusia Donostian duen arren, Gipuzkoako Parke Teknologikoan, Araban, Bizkaian, Gipuzkoan, Zaragozan edo Madrilen ere instalazio ugari ditu, baita ordezkaritzak ere Txinan, Kolonbian, Frantzian, Italian edo Serbian. Jarduera-eremu nagusiak fabrikazio adimenduna, eraldaketa digitala, trantsizio energetikoa, mugikortasun jasangarria, osasuna eta elikadura, hiri-ekosistema eta ekonomia zirkularra dira.
Bi ordu inguruko bileran, Eusko Jaurlaritzaren aldetik honako hauek parte hartu dute: Jaione Ganzarain Teknologiako, Berrikuntzako eta Eraldaketa Digitaleko sailburuordeak, Irantzu Allende Trantsizio Energetikoko sailburuordeak, Iñigo Arana Kabinete zuzendariak. TECNALIAren aldetik honako hauek parte hartu dute: Agustín Sáenz Estrategia, Merkatu eta Teknologiako zuzendariak, José Luis Elejalde Trantsizio Energetikoko zuzendariak, David Sánchez Industria eta Mugikortasuneko zuzendariak eta Elena Schaeidt Garapen Korporatiboko eta Giza Baliabideetako zuzendariak.
Ekonomiaren egoerari eta Eusko Jaurlaritza egiten ari den baliabide eta estrategiei buruz Estatu Batuetako Administrazioaren muga-zergen politikaren ondorioz Imanol Pradales Lehendakaria azken aldian egiten ari den hausnarketaren berri eman du bileran Jauregi sailburuak. Industria Planak eta sektoreko bilerek ere zeregin garrantzitsua izango dute egoera berrian.
Bestalde, TECNALIAk Plan horrekin duen konpromisoa nabarmendu du, eta, zehazki, erronka horrekin duena: “I+G+b alorreko inbertsio pribatua eta publiko-pribatua handitzea, lidergo teknologiko jasangarria sendotzeko”. Bileraren ondoren, Hidrogeno Laborategia bisitatu dute.
Gaur egun, 1.520 langile baino gehiago ditu TECNALIAk, horietako 315 doktoreak dira. 137 milioi euroko diru-sarrerak izan zituzten aurreko ekitaldian. Hori dela eta, TECNALIA da gaur egun ikerketa aplikatuko eta garapen teknologikoko Espainiako zentro nagusia.
