CIC energiGUNE, energia berriztagarrien erabilera erraztu eta klimaren aldaketaren eragina murrizten lagunduko duten fluxuzko bateria organikoak diseinatzeko HIGREEW proiektuaren liderra da

Euskal zentroa buru den Europa mailako HIGREEW proiektuak, ingurumenaren ikuspegitik jasangarriak izango diren, energia eta potentzia dentsitate handia, eraginkortasun handiagoa eta bizitza erabilgarri luzeagoa izango duten eta egungo kostuak murriztu ahal izango dituzten redox fluxuzko bateria organikoen garapena du helburu

CIC energiGUNE, energia elektrokimikoa eta termikoa biltegiratzearen arloan Europan erreferentea den ikerketa zentroa, da redox fluxuzko bateria organikoak diseinatzeko HIGREEW proiektuaren liderra. Bateria horiek, energia berriztagarri sistemekin bat eginda, klimaren aldaketaren eragina murrizten lagunduko dute, energia biltegiratzeko sistema merkeagoak, prestazio tekniko hobeagokoak eta eraginkortasun handiagokoak erabiltzeko aukera bultzatuko baitute.

CIC energiGUNEren helburua kostu txikiko ur-oinarria izango duen eta instalazioa kontrolatzeko sistema aurreratua duen fluxu-bateria batean integratuko den elektrolito organiko berria garatzea da. Horrela, 2030. urtean 0,05€/kWh/zikloko kostua lortu ahal izango da. Hori da Europako Batzordeak bere Energia Teknologiaren Europako Plan Estrategikoan (SET Plana) klimarako energia-sistema neutrorako trantsizioa bultzatzeko planteatu duen erronka tekniko-ekonomikoa.

HIGREEW proiektuaren partzuergoa, materialetan, biltegiratze-sistemetan eta energia berriztagarrietan erreferenteak diren 9 erakundek osatzen dute. Madrilgo Unibertsitate Autonomoa eta Bohemiako Unibertsitatea (Txekiar Errepublika) Euskal Zentroarekin elkarlanean ari dira funtsezko materialak (mintza, elektrolitoa eta elektrodoa) garatzen, prestazio tekniko hobeak emateko, bizitza erabilgarria luzatzeko eta birziklapena errazteko. Material horiek gelaxka batean integratuko dira, ekipamendu elektrokimikoaren diseinuan esperientzia handia duen C-TECH ingeniaritza enpresa britainiarrak, eta banadio-fluxuzko baterietan espezializatutako Pinflow txekiarrak, lehenengo balidazio-testak egin ditzaten.

2021ean garapen guztiak Heights ingeniaritza enpresa britainiarrak eta energia berriztagarrien alorrean liderra den euskal bazkide den Gamesa Electric-ek diseinatutako prototipoan integratzen hasiko dira. Azkenik, garatutako sistema Siemens Gamesak La Planan (Valladolid) duen lantegian testatu eta baliozkotuko da; bertan, segurtasunari, bideragarritasun tekniko-ekonomikoari eta bizi-zikloari buruzko analisiak egingo dira.

Partzuergoak 40 hilabetez lan egingo du fluxuzko bateria organikoak garatzeko. Bateriak, sortu zirenetik, birziklapena errazteko diseinatuta daude, eta egungo teknologia gaindituko duen energia eta potentzia dentsitatea izango dute, eraginkortasuna hobetzeaz, bizitza erabilgarria luzatzeaz eta kostuak murrizteaz gain. Proiektuak fluxuzko bateria organikoak banadioaren, Europako Batzordeak lehengai kritikoen zerrendan sartutako materialaren, aurreko alternatiba jasangarria izan daitezkeela erakutsi nahi du.

HIGREEW-ek Europako Batzordearen Horizonte 2020 Programaren 3,78 milioi euroko finantzaketa du 2019ko azarotik 2023ko otsailera bitartean gauzatzeko. CIC energiGUNEk antolatuko duen konferentziarekin amaituko da proiektua.

Ekimena, Europako Batzordearen Horizonte 2020 programaren 2019ko deialdian onartu direnen artean CIC energiGUNEk parte hartzen duen bost proiektuetako bat da, “Baterien belaunaldi berria” atalaren barruan. Horietatik bi euskal zentroak zuzentzen ditu, eta CICek duen aurrekontu bateratua 4 milioi eurotik gorakoa da.

Bost proiektu horiek onartu izanak, baterietarako H2020 programaren 2019ko deialdian Estatu osoan finantzaketa handiena lortu duen erakundea euskal zentroa izan dela erakusten du. Izan ere, aurkeztutako 11 proposamenetatik 5 onartu dira eta, horrela, %45eko arrakasta-indizea lortu da. Kopuru hori Espainiako erakundeen arrakastaren batezbestekoa (% 12,1) baino askoz handiagoa da.

Gainera, onetsitako proiektuetako biren liderra CIC energiGUNE bera izango da, eta BRTAko (Basque Research and Technology Alliance) beste eragile batzuen partaidetza ere izango dute, IKERLAN eta CIDETEC, alegia, eta Gamesa Electric euskal enpresarena eta nazioarteko konpainia handiena ere, Toyota, Renault edo Varta, besteak beste.

CIC energiGUNEri buruz

CIC energiGUNE Europako erreferentziazko ikerketa gunea da energiaren biltegiratzearen arloan. Eusko Jaurlaritzako Ekonomiaren Garapen eta Azpiegitura Sailaren arlo horretako ekimen estrategikoa da, eta Arabako Foru Aldundiaren eta Energiaren Euskal Erakundearen laguntza ere badu, eta energiaren eta biltegiratzearen sektoreko Euskadiko enpresa nagusiak ditu bere patronatuan: Iberdrola, Cegasa Portable Energy, Sener, Siemens-Gamesa, Ormazabal, idom, Solarpack, mondragon KORPORAZIOA eta nortegas.

Horrez gain, CIC energiGUNE Europa hegoaldeko energia biltegiratze arloko erreferentziazko laborategia da, beste inon ez dauden instalazioak baititu. Horien artean, biltegiratze elektrikorako (automoziorako egoera solidoko bateriak barne) eta biltegiratze termikorako prototipatu eta testeatze azpiegiturak azpimarratu behar dira. 500 argitalpen zientifikotik gora ditu eta urtean 35 industria proiektu baino gehiagotan hartzen du parte.

Lotutako albisteak

18 apirila, 2024 Berrikuntza

Ikasplay, Gipuzkoako enpresa aitzindaria prestakuntza-esperientzia murgiltzaile eta elkarreragileak sortzen

Irakurri gehiago

16 apirila, 2024 Berrikuntza

Genero-berdintasunik handiena duten enpresek berrikuntza maila handiagoa izaten dute eta lehiakorragoak dira

Irakurri gehiago

15 apirila, 2024 Berrikuntza

Arreguik erantzun egiten dio eraikinetako behar berriari, etxean egon gabe paketeak jasotzeari

Irakurri gehiago

11 apirila, 2024 Berrikuntza

B Corp izatea, enpresen indarra mundua aldatzeko erabiltzea da

Irakurri gehiago

9 apirila, 2024 Berrikuntza

STEM unibertsoan emakumeen talentua sustatzera bideratutako saio batean parte hartu du SPRIk

Irakurri gehiago

Joan blog-era