Arantza Tapia sailburua, Javier Zarraonandia sailburuordearekin eta SPRI Taldeko zuzendareakin, Alex Arriola, Intergune inaugurazioan.
Albisteak 19 otsaila, 2018

Tapiak jakinarazi du Jaurlaritzak laguntasun handiagoa emango diela euskal enpresei atzerrira irteteko

Ekonomi Garapen eta Azpiegitura sailburuak Intergune+ ekitaldiaren inaugurazioan esan du estrategiak helburutzat duela “laguntasuna ematea beren kabuz moldatu ezin duten enpresa txikiei”
-

Ekonomi Garapen eta Azpiegitura sailburuak Intergune+ ekitaldiaren inaugurazioan esan du estrategiak helburutzat duela “laguntasuna ematea beren kabuz moldatu ezin duten enpresa txikiei”.

Enpresen nazioartekotze foroa astelehen eta astearte honetan egingo da Barakaldoko BECen, 600dik gora konpainiaren parte-hartzearekin.

Intergune foroan aurkeztu dira SPRI Taldearen barruan integratua dagoen eta Eusko Jaurlaritzak aurten abiarazi duen Euskadiko Nazioartekotze Agentziaren  planak.

 

Arantxa Tapiak, Ekonomi Garapen eta Azpiegitura sailburuak, adierazi du Euskadik nazioartekotzearen alde egin duen apustua sei herrialdetan zentratuko dela: Alemania, Italia, Erresuma Batua, Txina, Mexiko eta Estatu Batuak. “Enpresaren nazioartekotzea Euskadiko Politika Industrialaren zutabe garrantzitsuenetako bat bihurtu da”, baieztatu du sailburuak eta aipatu du Eusko Jaurlaritzak “laguntasun handiagoa eman” nahi diela euskal enpresei atzerrira irtetean, “batez ere beren kabuz moldatu ezin duten enpresa txikiei”.

 

Tapiak eman dio hasiera astelehen eta astearte honetan Barakaldoko BECen egingo den Intergune+ ekitaldiari, hots, enpresen nazioartekotzearekiko hitzorduari. 600dik gora enpresak parte hartuko dute eta 20tik gora hitzaldi eta mahai-inguru egingo dira 40 hizlariren eskutik. Sailburuak ondoan izan ditu Javier Zarraonandia, Industria sailburuordea, Alexander Arriola, SPRI Taldeko zuzendari nagusia, eta Ainhoa Ondarzabal, Euskadiko Nazioartekotze Agentzia berriko (Basque Trade and Investment) zuzendaria. Aurreko edizioetan bezala aurten ere negozio-areto bat antolatuko da, non posible izango baita 35 enpresa bisitatzea eta beren zerbitzu eta produktuak ezagutzea. Horrez gain, 70 herrialde baino gehiagotan dauden SPRI Taldearen Kanpo Sareko agente eta aholkulariek banan-banan erantzungo diete nazioartekotu nahi duten konpainien premia partikularrei.

 

Intergune+ topagune bat bihurtu da, non euskal enpresek informazio baliagarria jaso dezaketen nazioartekotze-zerbitzu arloko eskaintzaz, Europako politikez, herrialde gorakorrez eta atzerrian izan ditzaketen enpresa-aukerei buruz. SPRI Taldeak –Ekonomi Garapen eta Azpiegitura Sailaren menpeko enpresen garapenerako euskal agentziak- antolatu du foroa, zeinetara bertaratu baita SPRIren Kanpo Sare (Basque Trade and Investment) osoa, eta baita ere nazioartekotze produktuak eta zerbitzuak dituzten erakunde eta enpresak. Topaketan hainbat jardunaldi egingo dituzte zenbait gairi buruz, hala nola merkatu interesgarriak, merkatu gorakorrak, laguntza programak eta kasu arrakastatsuak.

 

Arantxa Tapiak segurtatu du esportazioek osatzen dutela BPGaren %30 baino gehiago, gainera, “egiaztatu dugu ohiko esportatzaileen kopurua %16 handitu dela azken 4 urteetan eta esportatzaile handien kopurua ere -50 milioi eurotik gorakoak- %18 hazi dela”.

 

Sailburuak azpimarratu du euskal esportazioen datuak onak direla eta iaz inoiz erdietsi gabeko kopuruak erdietsi zirela. “Esportazioak %10,8 hazi dira 2016arekin alderatuta, eta Estatu osoko esportazioen %8,6 dira. Baina ezin dugu horrekin konformatu, aztertu behar dugu zer gehiago egin dezakegun”.

 

Arantxa Tapiak hiru ildotan banatu du Eusko Jaurlaritzaren nazioartekotze estrategia. Lehentasunezkoa sei herrialde hauetan zentratzen da: Alemania, Italia, Erresuma Batua, Txina, Mexiko eta AEBak. Sailburuak bereziki azpimarratu du Italiaren aldeko apustua, Italiako industriak antzekotasun handiak baititu Euskadikoarekin. “Aukera paregabea da sinergiak sortzeko puntako sektoreetan, hala nola aeronautikan, bioteknologian, manufaktura aurreratuan, robotikan eta energian. Gainera, sektore horiek euskal politika industrialaren RIS3 estrategiaren barruan kokatuta daude”. Elikaduraren industria ere nabarmendu du, esanaz “aukera asko ireki” ditzakeela, “Italia lehengaien inportatzaile handia delako”.

 

Bigarren mailako lehentasuna duten herrialdeak dira Frantzia, Brasil, Errusia, India eta Kolonbia, eta hirugarren mailan leudeke beste hauek: ASEAN (Singapur, Malaysia, Indonesia, Thailandia); Ekialde Ertaina; Maroko; Japonia; Iran eta Hego Korea. “Horrek ez du esan nahi beste sektore batzuetan lan egin nahi duten enpresek ez dutela jasoko Jaurlaritzaren laguntzarik, bulegoetako zerbitzuen edo aholkulari-kolaboratzaileen bidez”.

 

Sailburuak gogoratu du legealdi honetan 94,1 milioi euroko partida bideratu dela nazioartekotze arloko politiketara eta hizpide hartu ditu laguntza programak, besteak beste, ETEei zuzendutako Pilotu eta oso nazioartekotuta dauden ETEei zuzendutako Sakondu. Orobat esan du Basque Trade and Investment – Euskadiko Nazioartekotze Agentzia berria sortu dela, “eta bertan bildu ditugu Jaurlaritzak eta SPRIk ematen dituzten zerbitzuak”.

 

Euskadiko Nazioartekotze Agentzia

Hain zuzen, Intergune foroan aurkeztu dira Eusko Jaurlaritzak aurten abiarazi duen Euskadiko Nazioartekotze Agentziaren planak. Agustín Arostegik, Jaurlaritzako Nazioartekotze programen arduradunak, esan du BTIren helburua dela nazioartekotze arloko gaitasun guztiak integratzea. “Nazioartekotze arloko programa eta zerbitzuen arteko bereizketa funtzionala desagerrarazi nahi dugu, eta enpresen premia zehatzei hobeto egokitu”.

 

Agentzia berri honek antolakunde bakar baten pean biltzen ditu Lakuako eta SPRIko nazioartekotze arloko taldeak eta baliabideak. Eusko Jaurlaritzak kudeatzen dituen programak kudeatuko ditu, adimen lehiakorrerako sistema berria diseinatu eta abiaraziko du, atzerriko Bulego Sarea indartuko du, pertsonak gaituko ditu nazioartekotze arloko beken bidez, nazioartekotzea finantzatzeko egungo programak berrikusiko ditu, eta laguntza emango du finantza-tresnak eskuratzeko edota Basque Country markaren erabilera bultzatzeko.

 

Euskadiko Nazioartekotze Agentziak 22 milioi euroko aurrekontua izango du 2018an eta profesionalen talde bat esleituko zaio, 30 profesional egongo direlarik egoitza nagusian eta 19 Kanpo Sarean.

 

Intergunen beste mahai-inguru bat ere antolatu da Basque Country Lizitazioak Plataformari buruz. Programa horren bidez euskal enpresei laguntzen zaie finantzaketa multilateraleko lizitazio proiektuetan parte hartzen. Iaz 7 bidaia egin ziren, proiektu horien deialdiak egiten dituzten organismoekin harremanak sortzeko eta gure enpresak 3 herrialdetan preskribatzeko: Kolonbian, Mexikon eta Argentinan.

 

Lizitazio konplexuak eta handiak direnez, euskal enpresek erakundeen babesa eta kudeaketa-laguntza behar dute beren proposamenak aurkezteko.

 

Marian Ibarrondo, SPRI Taldeko Invest in the Basque Country arloko arduraduna, atzerriko inbertsioa erakartzeaz mintzatu da, eta esan du azken sei urteotan bikoiztu egin dela. “2006-2011 artean 2.980 milioi euro izan baziren, 2012-2016 urteen artean 6.565 izan dira. Madril eta Bartzelonaren ostean, Euskadi da inbertsio gehien erakartzen duen Estatuko hirugarren hiriburua”.

 

Ibarrondok azpimarratu du, atzerriko inbertsioari dagokionez, Euskadik berreskuratu duela krisiaren aurreko maila “eta askoz txikiagoa” dela “Europar Batasunekoa (BPGaren %1,5) edo Estatukoa (%2,5) baino”. Euskal enpresen %0,52 bakarrik dira atzerriko enpresen filialak, baina negozio bolumenaren %15 baino gehiago biltzen dute. BPGaren %13tik gorako ekarpena egin zuten 2015ean.

 

SPRIko Invest in the Basque Country sailaren jarduera lagungarri izan da kopuru horiek lortzeko, lan handia egin baitu balio erantsia eta enplegua sortzen duten enpresa trakziogileak bilatzeko. 2014-2017 urteen artean, 216 proiektu kudeatu ditu guztira; horietatik 62 arrakastatsuak izan dira, 334,5 milioi euroko inbertsioa sortzeaz gain, 1.329 enplegu berri sortu eta 2.637 mantendu dituztelako.

 

Mahai-ingurua

Bestalde, “Nazioartekotze esperientziak tamainaren arabera” mahai-ingurua egin da, non lau enpresek (Ega Master, Inkoa, Irizar eta Lantek) atzerrira irteteak dituen erronkak komentatu baitituzte.

 

“Bi gauza behar dira atzerrira irteteko: batetik, negozio ideia on bat eta lantalde motibatu bat eta, bestetik, atzerriarekin komunikatzea” adierazi du Aner Garmendiak, Ega Master enpresako zuzendari nagusiak. Lantek enpresako zuzendari nagusi Alberto Martinezek azpimarratu du, zuzendaritzaz gain, lantaldeak ere “norabide berean” egin behar duela arraun, eta helburua dela “bide zuzena egitea, ez erosoena”.  Rafael Sterling-ek, Irizar enpresako Nazioarteko zuzendariak, esan du zailena dela atzerrira joateko prest dauden ongi prestatutako langileak lortzea. Lua Legazpik, Inkoa enpresako merkatu multilateralen arduradunak, baieztatu du jarrera pertsonala funtsezkoa dela arrakasta izateko.

 

Etorkizunerako erronka gisa, Martínezek azaldu du langileak behar dituztela 4.0 Industriak dakartzan erronka berriei aurre egiteko, “bestela kanpoan bilatu beharko dugu talentu hori”. Sterling bat etorri da esatean gazteek ez dutela atzerrira joan nahi lanera eta horrek hutsune bat sortzen duela.

 



 

Lotutako albisteak

Voon  Sports,  teknologia  adimenduna  duen  kirol  entrenamenduaren  irtenbidea
13/10/2025 Nazioartekotzea

Voon Sports, teknologia adimenduna duen kirol entrenamenduaren irtenbidea

Donostiako konpainiak kirolarien entrenamendu teknikoa eta kognitiboa hobetzen duten gailuak eta app propioa garatzen ditu.

Eusko  Jaurlaritzak  nazioartekotzea  bultzatu  du  9,5  milioi  euroko  laguntzen  bidez

Eusko Jaurlaritzak nazioartekotzea bultzatu du 9,5 milioi euroko laguntzen bidez

Enpresek Zabaldu, Sakondu eta Elkartu programetarako diru-laguntzak eska ditzakete.

Nazioartekotzerako  enpresa-lankidetzari  bultzada,  Elkarturekin
10/10/2025 Nazioartekotzea

Nazioartekotzerako enpresa-lankidetzari bultzada, Elkarturekin

Urriaren 14an Elkartu programaren deialdi berri bat irekiko da. Nazioartekotze-jardueretarako enpresen arteko lankidetza bultzatzea da programaren xedea. 1.000.000 euroko aurrekontua du programak, eta nazioartean duten posizionamendua hobetu nahi duten enpresa-lankidetzako elkarte eta taldeei zuzenduta dago.

Europako  Batzordeak  proposamen  bat  iragarri  du  beste  herrialde  batzuetatik  datorren  altzairuaren  muga-zergak  %50era  igotzeko  eta  haren  jatorriaren  trazabilitatea  indartzeko

Europako Batzordeak proposamen bat iragarri du beste herrialde batzuetatik datorren altzairuaren muga-zergak %50era igotzeko eta haren jatorriaren trazabilitatea indartzeko

Xedapen horiek Europako Parlamentuak eta Kontseiluak erregelamenduaren azken testua adostu ondoren aplikatuko dira, 2026ko ekainetik aurrera altzairuaren gaineko egungo babesa ordeztuko duena.

WOMEXen  Eskualde  Taldea  martxan  da  Euskadin,  nazioartekotzean  genero-berdintasuna  sustatzeko
09/10/2025 Berdintasuna

WOMEXen Eskualde Taldea martxan da Euskadin, nazioartekotzean genero-berdintasuna sustatzeko

Enpresa, erakunde, irakaskuntza eta elkarte arloko eragileak joan den astean bildu ziren Euskadiko Eskualde Taldearen lehen saioan, WOMEX - The role of women in the competitiveness of exporting SMEs proiektu europarraren esparruan.

Zure  enpresaren  nazioartekotze-kostuak  geldiaraz  ez  zaitzan…  Hona  hemen  Zabaldu  laguntzak!
09/10/2025 Nazioartekotzea

Zure enpresaren nazioartekotze-kostuak geldiaraz ez zaitzan… Hona hemen Zabaldu laguntzak!

SPRI Taldeak atzerrian mikroenpresen, ETE-en eta startupen presentzia bultzatzera zuzendutako Zabaldu 2025 laguntzen beste edizio bat deitu du. Aurten, programak 5 milioi euroko aurrekontua izango du nazioartekotze-prozesua berme osoz abiaraztearen kostua finantzatzen laguntzeko.

Sakonduk  kanpo-merkatu  berrietara  sartzeko  zure  enpresaren  nazioartekotzea  bultzatuko  du  75.000  euro  arteko  finantzaketa  emanda
09/10/2025 Nazioartekotzea

Sakonduk kanpo-merkatu berrietara sartzeko zure enpresaren nazioartekotzea bultzatuko du 75.000 euro arteko finantzaketa emanda

Programak 3.500.000 euroko aurrekontua du eta aurrekontuaren % 60 arteko finantzaketa emango du. Gehienez, enpresa bakoitzeko 75.000 euro. Laguntza nazioartekotze maila altua duten eta merkatu berrietarako hedapena hasi nahi duten mikroenpresei, ETE-ei eta startupei zuzenduta dago.

KSP  Basque  P5G  Master  Plan  programak  Euskadiren  eta  Hego  Korearen  arteko  lankidetza  sendotu  du  berrikuntzan  eta  digitalizazioan
02/10/2025 Nazioartekotzea

KSP Basque P5G Master Plan programak Euskadiren eta Hego Korearen arteko lankidetza sendotu du berrikuntzan eta digitalizazioan

Proiektuaren helburua 5G sare pribatuen hedapenari buruzko ezagutzak eta esperientziak partekatzea izan da, euskal industrian aplikatzeko aukerak eta erronkak identifikatuz.

IKT  sektoreko  euskal  enpresek  euren  presentzia  indartu  dute  Kolonbian,  Bogotan  egindako  topaketa  batean
25/09/2025 Nazioartekotzea

IKT sektoreko euskal enpresek euren presentzia indartu dute Kolonbian, Bogotan egindako topaketa batean

Kolonbian dauden euskal enpresen eta tokiko eragile estrategikoen arteko harreman zuzena erraztu da

Industria  sailburua  EMO  Hannoverren  dauden  32  euskal  enpresen  alboan  izan  da

Industria sailburua EMO Hannoverren dauden 32 euskal enpresen alboan izan da

Azken hamarkadan, Eusko Jaurlaritzak makina-erremintaren sektoreari SPRIren bitartez lagundu dio: 91 milioi euroko dirulaguntzaren bidez 850 milioi eurotik gorako inbertsio pribatua egin da eta 2.000 enpresa baino gehiago babestu dira

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.