Euskal enpresek Bogotako hiri-eraldaketari lotutako aukerak esploratu dituzte
Kolonbian finkatutako euskal enpresek SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren Kolonbiako bulegoak antolatutako lan-gosari batean parte hartu zuten joan den astean Bogotan. Topaketa Bogotako Alkatetza Nagusiaren eta Barrutietako Plangintza Idazkaritzaren lankidetzaz egin zen, eta erakundeen zein sektore pribatuaren ordezkariak bildu zituen hiriko proiektu estrategiko handiei heltzeko.
Jardunaldian azpiegituretan espezializatutako hamar euskal enpresak parte hartu zuten, Kolonbiako hiriburuari soluzio teknologikoak eskaintzeko asmoz. Kolonbiako ordezkaritzari dagokionez, Julio Abril Tabares Inbertsioen Plangintzako Idazkariordea eta Gabriel Andrés Millán Hiriko Laborategi-Bulegoko Buru izan ziren bileran, eta honelako aliantzek bogotarren bizi-kalitatea hobetzeko moduko proiektuak bultzatzeko duten garrantzia nabarmendu zuten.
Proiektu estrategiko nagusiez gain, topaketak eskala txikiagoko ekimenetan lankidetza-aukerak identifikatzeko aukera eman zuen, Pilotu programa aplika daitekeen osagai teknologiko nabarmena dutenei arreta berezia emanez. SPRI Taldeak bultzatutako ekimen honen helburua euskal enpresei nazioarteko proiektu pilotuak garatzen laguntzea da, eta 50.000 eurorainoko dirulaguntzak ematen ditu, edo inbertsioaren % 51, atzerriko erakunde publikoek ebaluatutako ekimen berritzaileak aurrera ateratzeko.
Topaketa honi esker, Euskadiren eta Bogotaren arteko lankidetza-loturak sendotu ahal izan ziren, hiri-eremuko berrikuntza eta hiriaren garapena sustatuz
