Euskadik Europan duen presentzia indartu du Trade Promotion Europe-ren 2025eko Batzar Nagusian
Trade Promotion Europe (TPE) ETE esportatzaileei laguntzeko Europako sare nagusiaren 2025eko Batzar Nagusia hartu du aste honetan Bruselak. Topaketan Basque Trade & Investment (BasqueTrade) SPRI Taldean sartuta dagoen euskal enpresak nazioartekotzeko agentziak parte hartu du, eta Euskadik ETE esportatzaileei laguntzen eta esportazio-intentsitate handiko industria-sare aurreratua nazioartekotzen izandako esperientzia partekatu du.
Biltzarrean, Europako sareak lehentasunezko lau lan-eremu definitu ditu datozen hilabeteetarako: ziurgabetasun-testuinguruetan merkataritza-estrategiak egokitzea, start-upak eta scale-upak bultzatzea, hornikuntza-kateak indartzea eta lehengaiak eskuratzea, eta merkataritza digitala garatzea. Lehentasun horien helburua da Europako enpresen nazioarteko lehiakortasuna indartzea eta eraldatzen ari den agertoki geoestrategikoari erantzuteko tresna estrategiko erabilgarriak eskaintzea.
Gaur egun, TPEk Europar Batasuneko 19 estatutako 34 kide ditu eta 700 bulego baino gehiago ditu Europa barruan eta kanpoan. 2024an bakarrik, sareak laguntza eman zien Europako 88.000 enpresa baino gehiagori, eta agerian utzi zuen nazioarteko merkatuetan aukerak irekitzen eta ETE-en nazioartekotzea bultzatzen duen rola.
Ildo horretan, BasqueTrade-ko ordezkaritzak modu aktiboan parte hartu zuen batzarreko lan-saioetan eta truke-espazioetan, eta eskualde-ikuspegia eman zuen merkataritza-sustapenean. Ikuspegi horrek aukera ematen du euskal enpresen beharrei azkarrago eta zehatzago erantzuteko. Parte-hartzea Imanol Pradales Lehendakariak adierazitako orientazio estrategikoaren barruan kokatzen da, eta Euskadik Europan duen presentzia indartzeko eta lehentasun eta politika komunak zehazten diren guneetan modu proaktiboan parte hartzeko beharra azpimarratu du.
Eskualdeko agentzien ekarpenaren aitorpen gisa, Batzar Nagusiak antolaketa-erreforma bat onartu du, agentzia horiei eskubide osoko kideen estatusa ematen diena, egungo erronka industrial eta teknologikoetara hobeto egokitzen diren Europako estrategien eraikuntzan duten zeregina indartuz.
Parte-hartze horrekin eta TPEn hartutako rol berriarekin, Euskadik indartu egin du Europan egoteko estrategia, nazioarteko merkataritzaren etapa berrian eragiteko gaitasunarekin eta euskal ETEei nazioartekotzen eta hazkunde globalean laguntzen jarraitzeko konpromiso sendoarekin.
