Europar Batasunak Itsaso Beltzean egonkortasuna, garapena eta jasangarritasuna bultzatzeko plana aurkeztu du
Europar Batasunak (EB) estrategia berri bat abiarazi du Itsaso Beltzeko eskualdean segurtasuna, oparotasuna eta erresilientzia sustatzeko. Ekimena bultzatu duen egungo testuinguruan, Ukrainako gerraren inpaktua, itsas-segurtasunerako arriskuak eta eskualdeko desegonkortasunari, mehatxu hibridoei, funtsezko merkataritza-bideen mozketari eta antzeko erronkei erantzun koordinatua emateko beharra dira nagusi. Horren harira, planak Ukraina, Moldavia, Georgia, Turkia, Armenia eta Azerbaijan bezalako herrialdeekiko lankidetza indartzea du xede, Europa, Hegoaldeko Kaukasoa eta Erdialdeko Asiaren arteko loturak sendotzeaz gain.
Helburu horiei begira, estrategiak hiru ardatz nagusi izango ditu: segurtasuna eta egonkortasuna, hazkunde jasangarria eta ingurumenaren babesa. Aurreikusitako neurrien artean, nabarmentzekoa da Itsaso Beltzeko Itsas Segurtasuneko Zentroaren sorrera, itsas-zaintza hobetzeko, itsaspeko kableak eta energia-plataformak bezalako azpiegitura kritikoak babesteko eta eskualdean sor daitezkeen mehatxuei erantzuteko.
Garraioan, energian nahiz sare digitaletan hobekuntzak bultzatuko dituen konektibitateari buruzko agenda ere aurreikusi da, inplikatutako eskualdeen arteko trukeak erraztearren. Horrez gain, kostaldeko komunitateen prestakuntza klimatikoa eta zibila indartuko da, klima-aldaketaren ondorioei eta beste arrisku batzuei aurre egin ahal izateko.
Estrategia Europako beste politika batzuekin koordinatuta garatuko da, EB zabaltzeko prozesua, Ekialdeko Elkartea eta Global Gateway estrategia barne. Inbertsio publikoak zein pribatuak mobilizatzea aurreikusi da, lankidetza estu eta iraunkorragoa bultzatuko duten proiektuak babesteko asmoz.
Jarraipen-prozesuaren barruan, EBkren Itsaso Beltzaren inguruko herrialdeekin ministerio-bilera egiteko deialdia iragarri du, aurreikusitako neurrien aplikazioan aurrera egiteko.
