Bunt Planet-ek Estatu Batuetara esportatu nahi du ur-sareetako ihesak saihesteko bere eredua
Ainhoa Lete da Donostiako Bunt Planet ETEaren sortzaileetako bat eta zuzendari nagusia. ETE horren negozioaren esparru garrantzitsuenak dira, besteak beste ingeniaritza, digitalizazioa eta teknologia apurtzaileenak. Hogei urtetik gorako esperientzia bildu du sektorean, eta gai izan da goi-mailako kualifikaziodun hogei bat profesionalez osatutako talde bat eratzeko, bai eta nazioarteko bokazioa indartzeko, enpresaren proiektu guztien % 80 atzerrian garatzen baitira gaur egun. Giltzarri horiei esker, enpresaren fundatzaileak aitortza bat jaso berri du bere proiektuaren konpromiso sozial eta berritzaileagatik, zeina jasangarritasunaren eta ingurumenarekiko errespetuaren inguruko politika errealetan zentratzen baita nagusiki.
Zein aitortza jaso duzue?
Zuzendaritza-kargu eta Exekutiboen Fundazio Konfederazioak (CEDE) “Ekintzailetzaren Saria” eman zigun Adimen Artifizialean eta Big Data-n oinarrituriko software bat garatzeagatik hornikuntza-sareetako galerak detektatu eta lokalizatzeko.
Sari horren bidez aitorpena egiten zaio proiektu honen ikuspegi apurtzaile, berritzaile eta sozialki arduratsuari. Horrela ikusten duzue zuen burua?
Bai, zalantzarik gabe. Enpresa gisa, gure helburua da planeta hobetzea teknologia baliatuz. Horretarako, oso baliotsua den baliabide bat zaintzen dugu, ura, zeinak balio ekonomiko handia izateaz gain, sekulako balio soziala baitu. Hasieran, ur edangarriaren sareetako ur galerez arduratzen ginen gehienbat, baina orain saneamendu-sareko anomaliak ere aztertzen ditugu edo uraren kalitateak izan ditzakeen arazoak, eta biki digital bat ere sortu dugu, gure bezeroek aukera izan dezaten askotariko eszenatokiak simulatu eta erabakiak errazago hartzeko.
Adimen Artifiziala aplikatzen duzue banaketa-sarearen inefizientziak detektatzeko… Nola azaltzen da hori?
Adimen Artifizialari esker posible da, besteak beste inefizientziak edo anomaliak detektatzea. Sistemak egoera arrunt edo eraginkor bat identifikatzen ikasten du eta, hala, ihes bat gertatzen denean, gai da detektatu eta lokalizatzeko. Halaber, teknologia hori erabiltzen dugu urari gehitu behar zaion kloroaren banaketa optimizatu eta uraren zaporea hobetzeko. Edo jakiteko zein diren ordezkatu beharreko hodiak.
Zuen aspaldiko helburuetako bat da munduko lider bihurtzea nitxo horretan. Lortu duzue?
Oraindik ez gara liderrak merkatu-kuotari dagokionez, baina zalantzarik gabe liderrak gara berrikuntza arloan. Eta horren erakusgarri, munduko enpresa puntakoenetako batek, Siemens-ek, gure teknologia aukeratu du uraren sektorerako eskaintzen dituen konponbide digitalen portfolioa osatzeko. Gainera, gure bezeroak dira sektoreko mundu mailako liderrak.
Nori interesatzen zaio teknologia hau? Eta zein dira eskaintzen dituen abantailak?
Gure teknologiarekin galerak % 50 murriztu daitezke. Murrizketa hori erdiestea oso garrantzitsua da bezeroentzat, hau da, ur zerbitzua ematen duten enpresentzat. Gure bezeroek ezin dute onartu inolako inefizientziarik ur galerei dagokienez, eta gai izan behar dute eszenatoki desberdinak simulatzeko eta horien araberako erabakiak hartzeko. Gure biki digitalak aukera ematen die hori egiteko, euren ur-sarearen kopia digital bat bezalakoa baita.
Galdu egiten al da gure hodietan barrena dabilen uraren % 25?
Gaur egun hori baino apur bat gehiago. Duela gutxi eginiko azterlan batek kalkulatu du mundu mailan uraren % 30 galtzen dela batez beste, eta egoera okerrera doa, azpiegiturak zahartzen ari direlako eta ez direlako berritzen ari nahi bezain azkar. 2006an ur-galerek 14 bilioi dolarreko galera ekonomikoa eragin zuten, eta kalkulatzen da 2022an diru galera hori 39 bilioira iritsiko dela. Ia hirukoiztu egin da.
Zenbatekoak dira galera horiek urte batean, adibidez?
Urtean 126 bilioi metro kubiko inguru galtzen dira munduan. Pentsa ezazu etxe batean 120 metro kubiko inguru kontsumitzen direla urtean, beraz, galtzen den urarekin mila milioi etxe baino gehiago hornitu ahal izango lirateke. Uste dugu gure tresnetako batekin (BuntBrain) posible dela galera horiek erdira murriztea.
Ura doakoa izateak eta, hortaz, merkatu baliorik ez izateak badu eragina zabarkeriaren antz handia duen jarrera horretan?
Ura oso merkea da, esaterako, energiagatik ordaintzen dugunarekin alderatuta. Horregatik uste dugu datozen urteetan uraren prezioak igo egin beharko lukeela, kalitatezko zerbitzu bat bermatzeko beharrezkoak diren inbertsioak egin ahal izateko.
Bunt Planet 2000. urtean sortu zen lau ingeniari industrialen eskutik, eta aitortza ugari eta emaitza onak lortu ditu harrezkero, aktibo on bat bilakatzera iritsi delarik. Zuk nahiko zenukeen tokian al dago enpresa?
Bete ditugu gure amets batzuk: punta-puntako produktu propio bat garatu dugu eta, gainera, nazioartekotu egin gara, gure teknologia 18 herrialdetan ezarri baitugu. Baina oraindik badaukagu bidea egiteko, besteak beste Estatu Batuetako merkatura iritsi nahi dugu, oraindik ez baikara sartu, eta han egon nahi dugu.
Aldaketaz betetako garai hauetan, zure ustez zein da enpresa batek egin dezakeen akats larriena?
Autokonplazentzian erortzea, pentsatzea ezin duela ezer hobetu.
Eta ziurgabetasun une honetan, zer esango zenuke iraun ala berrituren artean aukeratu beharraz?
Guk beti aukeratu dugu berritzea. Gure DNAn dago. Eta gero, geure burua berrasmatzea. Guretzat funtsezkoa da, horixe da ehundik gora urteko enpresen arrakastaren gakoa, eta guretzat horiexek dira ispilu onena.
22 urte hauetan bi krisi oso gogor jasan dituzue, eta bitxia bada ere, horietako baten ostean jauzi egin zenuten Uraren sektorera, alegia, gainerakoengandik bereizteko aukera eman dizuen sektorera… Zein ikasgai atera duzue egoera zailenetatik?
Ate bat ixten denean askotan leiho bat irekitzen dela. Edo ikusi gabeko leiho bat deskubritzen dela, lehendik zabalik zegoena.
Lotutako albisteak
Geinsak 30 herrialdetan baino gehiagotan presente dauden tratamendu-lerro automatizatuak fabrikatzen ditu
Bizkaiko enpresak 50 urte baino gehiago eman ditu sektorean erreferente gisa, eta gaur egun bere merkatuaren %70 inguru nazioartekoa da.
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Haizelur, nazioartekotzearen aldeko apustua egiten duen doitasun-mekanizazioaren arloko Debako ETEa
Enpresaren esportazioek SPRI Taldearen zibersegurtasuneko programaren dirulaguntza jaso dute eta negozioaren % 35era iritsi dira dagoeneko
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.