Tren-industriako euskal enpresek Indiako negozio-aukerak esploratu dituzte
Nazioartekotzeko Euskal Agentziak Asiako herrialdeak eskaintzen dituen inbertsio-aukerak bistaratzeko jardunaldia antolatu du
Tren-industriako euskal enpresek Indiako balizko negozio-aukerak esploratu dituzte astelehen honetan Nazioartekotzeko Euskal Agentziak (Basque Trade & Investment) antolatutako jardunaldi baten bitartez. Topaketan, iritziak trukatu dituzte Indiako tren-industriako erakunde publikoen ordezkariekin.
Jardunaldiaren irekieran, Ainhoa Ondarzabal Nazioartekotzeko Euskal Agentziako zuzendari nagusiak euskal enpresek tren-industriaren arloan dituzten gaitasunak eta esperientziak aipatu ditu.
Bileran parte hartu duten euskal enpresen artean, Arteche eta Danobat nabarmen daitezke, Mafex klusterrarekin batera. Indiaren izenean, bertan izan dira New Delhi Eskualdeko metrotik hurbil dauden hiriak lotzeko sarea eraikitzeaz arduratzen den NCRTC (National Capital Region Transport Corporation) metro operadorea, eta distantzia luzeko trenak kudeatu eta Indiako trenen eragiketa hobetzeko ikerketak bideratzen dituen Indian Railway erakunde publikoari atxikitako RDSO, (Research Designs and Standards Organisation) erakundea. Azken hau arduratzen da Indian Railway konpainiako trenen eragiketari dagozkion teknologia berrien ziurtagiriak emateaz. Horiekin batera, armadarako kamioi eta ibilgailuen horniketan diharduen BEML (Bharat Earth Movers) enpresa publikoak ere parte hartu du.
Indiako konpainia publiko honek meatzaritza arloko ekipamenduak zein trenetako bagoiak fabrikatzeko dibisioak ere baditu. Sortu zenez geroztik, trenetako bagoien ekoizle honek bidaiariak garraiatzeko hainbat motatako 17.000 unitate baino gehiago fabrikatu eta hornitu ditu Indian Railways konpainiaren distantzia luzeko ibilbide nagusietarako.
