Euskadiko eta Txileko erakundeek Txileko ingurumen-erronkei buruzko jardunaldietan parte hartuko dute hilabete honetan
Euskadiko eta Txileko ingurumen arloko enpresa eta erakundeek jardunaldi eta topaketa telematikoetan parte hartuko dute hil honen amaieran, eta hizpide hartuko dituzte Txilek arlo horretan dauzkan erronkak. Nazioartekotzeko Euskal Agentziak eta Aclima ingurumen klusterrak antolatu dituzte topaketa horiek. Izena emateko epea zabalik dago SPRI Taldearen plataforman.
Hala, Nazioartekotzeko Euskal Agentziak Txileko ingurumen arloko erronkei buruzko topaketa telematikoetan parte hartuko du azaroaren 24tik 28ra. “II. Aclima Global Topaketa, Ingurumen arloko Erronkak Txilen” izenburupean, helburua da elkarrekin konektatzea nazioarteko enpresa, erakunde eta instituzioak, elkarlanean aritu daitezen ingurumen arloan, gizarte jasangarriagoak sortzeko, ezagutza transferituz eta ekimen publiko-pribatuetan kolaboratuz.
Saio telematikoak azaroaren 24an eta 25ean egingo dira, eta Txileko instituzio, enpresa nahiz erakundeetako ordezkariek Txileko erronkak eta desafioak aurkeztuko dituzte. Orobat parte hartuko dute ingurumen arloko euskal erakunde garrantzitsuetako ordezkariek.
Saioetan aztergai izango dira ekonomia zirkularra, klima aldaketa nahiz ingurumenaren kalitatea bezalako gaiak, eta baita ere aurkeztuko dira nazioarteko proiektuetan lankidetzan jarduteko eta finantzaketa lortzeko dauden laguntzak.
Ainhoa Ondarzabalek, Nazioartekotzeko Euskal Agentziako zuzendariak, lehen jardunaldian parte hartuko du eta azalduko du zein garrantzitsua den atzerrira irtetea Euskadiko ingurumen sektorearentzat. Biharamunean, agentzia publikoko enpresa zerbitzuetako arduradun Maite Subinasek mintzagai izango ditu ingurumen sektoreko euskal enpresei nazioartekotzen laguntzeko eskaintzen dituzten programa eta zerbitzuak.
Bestalde, Aclima-Basque Environment Cluster-aren aldetik, Xabier Caño presidenteak eta Olga Martín zuzendari nagusiak parte hartuko dute.
Txileko aditu eta zuzendaritza-karguek hizpide hartuko dituzte hondakinen balorizazioa, trantsizio hidrikoa eta, besteak beste, ekonomia zirkularreko lankidetza.
Azaroaren 24tik 28ra, enpresa parte-hartzaileek aukera izango dute B2B bilerak egiteko, bai hizlariekin eta baita ere beste parte-hartzaile batzuekin, eta bilera interesgarriz betetako agenda bat osatu ahal izango dute, horrela esperientziak trukatzeko eta balizko lankidetzak sortzeko sektoreko beste enpresa batzuekin.
