Mikel Jauregi sailburua Petronorren izan da deskarbonizazioaren eta trantsizio energetikoaren aldeko horren apustua ezagutzeko
- Petronor funtsezko bazkidea da Eusko Jaurlaritzak bultzatzen dituen lankidetza publiko-pribatuko proiektuetan industria-deskarbonizaziorako, Basque Zero Industrial Super Clusterrekin, eta trantsizio energetikorako, Hidrogenoaren Euskal Korridorearekin
Industria, Trantsizio Energetiko eta Jasangarritasuneko sailburu Mikel Jauregi Muskizen izan da bertatik bertara ezagutzeko Petronorren jarduera eta Bizkaiko enpresa horrek industriatik eta teknologiatik deskarbonizazioa bultzatzeko abian dituen proiektuak. Emiliano López Atxurra Petronorreko presidenteak hartu du sailburua, zeinak lagun izan dituen Andoitz Korta Industriako sailburuordea eta Mikel Amundarain EEE – Energiaren Euskal Erakundeko zuzendari nagusia.
Findegiko instalazioak ibiltzeaz gainera, sailburuak ezagutu ahal izan ditu gero eta berriztagarriagoak diren erregaiak produzitzeko bidea ematen duten ekintza guztiak, hondakin organikoak (landare-olio erabiliak, biomasatik eta nekazaritzako elikagaien industriatik datozen hondakinak…) barne hartzen baitira.
Jarraian, Euskadin hidrogeno berriztagarria sortzen duen 2,5 MW-eko lehen elektrolizadorea bisitatu dute, eta bertatik bertara ezagutu dituzte 2050ean zero emisio garbietara iristeko egiten ari diren beste proiektu batzuk.
Emiliano López Atxurrak adierazi duenez, “Petronor funtsezko eragilea da Euskadiko eta Arku Atlantikoko industrian, energian eta teknologian, eta trantsizio energetiko jasangarri eta eutsiaren parte aktibo izan nahi dugu. Sozietate, enpresa eta partikular guztiei horniduraren segurtasuna bermatuko dien trantsizioa da. Erronka honekin bat egin nahi duten pertsonentzako inbertitzeko eta balioa eta etorkizuna sortzeko proiektu berrien aldeko apustua egiten dugu”.
Bestalde, Mikel Jauregi sailburuak balorazio hau egin du: “Petronor eragile ekonomiko eta industrial garrantzitsua da Euskadirentzat, eta jasangarritasunerantz aurrera egiteko berrikuntza teknologikoarekin duen konpromisoa baloratzen dugu”. Eusko Jaurlaritzak lankidetza publiko-pribatuko eredu bat sustatzen du etorkizuneko erronka eta aukerei aurre egiteko —besteak beste, deskarbonizazio industrialari eta trantsizio energetikoari—, eta Petronor funtsezko bazkidea da bi arlo horietan”.
Beste euskal enpresa nabari batzuekin, kluster industrialen osotasunarekin eta SPRI taldearekin batera, Petronorrek Basque Net Zero Industrial Super Cluster ekimenean parte hartzen du, Euskadiko industriak 2050erako zero emisio garbi lortzea helburu hartuta. Gainera, BH2C – Hidrogenoaren Euskal Korridorean ere eragile garrantzitsua da. Proiektu horrek Euskadin hidrogenoaren ekosistema bat sortzea bultzatzen du, sektore energetiko eta industrialen deskarbonizazioan aurrera egitea ahalbidetuko duen ekosistema, eta EEE – Energiaren Euskal Erakundearekin batera beste euskal enpresa batzuk lankidetzan aritzen dira horretan.
“Industria gehiago, industria hobea eta emisio gutxiago izango dituen Euskadi baten alde egiten dugu, eta Petronor ezinbesteko kolaboratzailea da konpromiso horietan”, nabarmendu du Jauregik. “Bide horretan aurrera egiteko, Industria Plan berri batean lanean ari gara, Euskadi Europako berrindustrializazioaren aitzindari izan daitekeela sinetsita. Horretarako, gure ekosistema ekonomikoaren eskutik ibiliko gara, enpresa-, teknologia-, zientzia- eta finantza-ehun osoa partaide eginda, gainerako erakunde, kluster eta gizarte-eragileekin batera”.
Lotutako albisteak
Bizitegi-jabeen komunitateetako instalazio elektriko zaharrak berritzeko inbertsioetarako laguntza-programa
EEEren programa Deskarboniza programaren parte da
Energia berriztagarrien bidez autokontsumorako energia elektrikoa sortzeko eta kontsumo termikoak elektrifikatzeko laguntza-programa
EEEren programa Deskarboniza programaren parte da
Deskarboniza 2025 plana aurkeztu da
Deskarboniza plana erakundeen arteko elkarlanean oinarritutako plana da, Eusko Jaurlaritzaren zenbait laguntza-programa eta foru-aldundien kenkari fiskalak biltzen dituena, Euskadiko industriaren deskarbonizazio adimenduna bultzatze aldera
Euskadiko industriaren ingurumen-hobekuntza bultzatzea, Deskarbonizazio Industrialerako Programaren bidez
20 milioi euro Euskadiko enpresen inbertsioei laguntzeko eta haien lehiakortasuna hobetzeko prozesuan laguntzeko, neutraltasun klimatikorako trantsizioan oinarritutako Europako eta mundu mailako testuinguruan.
Maiatzaren 8an ireki da euskal industriaren deskarbonizaziorako 22 milioi euroak eskuratzeko epea
SPRIk kudeatzen duen Eusko Jaurlaritzaren Industria, Trantsizio Energetikoa eta Jasangarritasuna Sailaren programaren bigarren edizioa da
Eusko Jaurlaritzak deskarbonizazio industriala bultzatuko du, pizgarri eta laguntzen bidez, eta hidrogeno berdearen hidroduktu bat egingo du Aiaraldea eskualderako
Imanol Pradales Lehendakariak Laudioko Vidrala enpresaren instalazio berriak bisitatu ditu gaur, eta bertan labe berria inauguratu du
Euskadiko industria normaltasunez ari da, joan den asteleheneko itzalaldi orokorraren ostean
“Gure industria-sektorearen lana aitortu nahi dugu", aditzera eman du Mikel Jauregi, Eusko Jaurlaritzako Industria, Trantsizio Energetiko eta Jasangarritasuneko sailburua
Haizelur, nazioartekotzearen aldeko apustua egiten duen doitasun-mekanizazioaren arloko Debako ETEa
Enpresaren esportazioek SPRI Taldearen zibersegurtasuneko programaren dirulaguntza jaso dute eta negozioaren % 35era iritsi dira dagoeneko
Pradales Lehendakaria: “Gure Plan Industriala europar jarraibideekin lerrokatzen ari gara”
"Euskadi eragile garrantzitsua izan daitekeelako eta izan behar duelako prozesu horretan”
Euskadik bere automobilgintza sektoreko industria indartuko du errepideko garraioaren deskarbonizazio adimendunerako laguntza-programa berri batekin
Eusko Jaurlaritzak "Emisio Txikiagoko Ibilgailuak" laguntza-programa aurkeztu du Industriaren Defentsarako Taldearen baitan, euskal automobilgintzaren sektoreak egungo muga-zergen gerraren testuinguru globalean dituen erronkei erantzuteko