Kaytek enpresak Blockchain konponbideak garatzen ditu industria sektorerako
Euskal startupak Blockchain teknologia eta Smart Contracts aplikazioa darabiltza prozesu industrialak digitalizatu eta automatizatzeko
Blockchain teknologiak goitik behera aldatuko ditu hainbat sektore, nola baitira kripto-txanponekin zerikusia dutenak, bankuen negozioa, hiritarren parte-hartzea edo eraldaketa digitala. Azken horri dagokionez, Kaytek euskal startupak erreferente bihurtu nahi du Estatu osoan. Zazpi langile eta hilabeteko ibilbidea duen Barakaldoko enpresa horrek dagoeneko lau proiektu dauzka eskuartean, zeintzuetan Blockchain teknologia erabiltzen baitu prozesuak automatizatzeko eta edozein produkturen fabrikazio parametro guztiak kontrolatzeko. Manu Fandiñorekin hitz egin dugu, Kaytek enpresako zuzendari nagusiarekin.
Zer egiten duzue Kaytek enpresan?
Gure helburua da gure bezeroen negozioak digitalizatzea: euren negozioa identifikatu, prozesuak aztertu, nola lan egiten duten ikusi eta beren prozesuak digitalizatzen saiatu. Konponbideak eta teknologia propioa eskaintzen dizkiegu aldaketa hori egiten laguntzeko. Horretarako, Kaytek izeneko plataforma bat garatu dugu, bezero bakoitzaren premietara egokitu daitekeena. Blockchain eta IoT (Gauzen Internet) teknologietan oinarritutako konponbideak eskaintzen ditugu batik bat.
Nolako Blockchain konponbideak eskaintzen dituzue industriarako?
Trazagarritasunerako eta IoTren kudeaketarako proiektu pilotuak lantzen ari gara. Prozesu industrialetan komunikazio handia dago makinen artean eta komunikazio hori bermatu egin behar da. Guk Blockchain teknologia erabiltzen dugu horretarako. Blockchain sare batek hainbat gune edo ordenagailu ditu informazioa gordetzeko, eta informazio hori ezin da aldatu edo ezabatu sareko gainerako kideen baimenik gabe. Horrela bermatzen dugu atzematen diren datu guztiak egiazkoak direla.
Bestalde, Blockchain teknologiari esker, Smart Contract edo kontratu adimendunak sortu ditzakegu, beren bitartez fabrikazio-prozesu batek bete behar dituen aldagai guztiak definitzeko. Adibidez, langile batek bere burua identifikatu behar du makina baten aurrean makina hori erabili baino lehen, dela hatz markarekin, NFC seinale batekin, pasahitzarekin edo ikusizko errekonozimenduarekin. Une horretan, makinak langilea ezagutzen du, eta bere gaitasunen arabera erabakitzen du makina erabil dezakeen ala ez. Langile horren prestakuntza-mota kontratu adimendunean (Smart Contract) zehazten da. Kontratu horietan orobat ezar daiteke zein lehengai erabili behar den pieza zehatz bat fabrikatzeko, eta baita ere posible da jakitea material hori iraungita dagoen edo egokiena den. Hala, prozesua ez da martxan jarriko baldintza guztiak betetzen ez badira. Azkenean, informazio hori guztia –langilearen gaitasunak, lehengaiaren kalitatea eta makina bakoitzak egin dituen ekintzak- funtsezkoa da bezeroari trazagarritasuna emateko.
Produkzio-zikloaren amaieran posible da kontratu bat egitea errekonozimendu-sistema batek jakin dezan produktua iritsi dela bezeroaren biltegira, eta une horretan automatikoki aktibatuko da ordainketa, langile baten esku-hartzerik gabe. Blockchain teknologiari esker, gai gara prozesu bat automatizatzeko.
Smart Contracts aplikazioak konta ezin ahala aukera dauzka negozioen munduan, ez da hala?
Mantenimendu-zerbitzuetarako erabil daitezke. Etxetresna elektriko adimendun bat erosten baduzu, Smart Contract bat egin daiteke zehazteko nork egingo dituen etxetresna horren mantenimendu-lanak hemendik eta bi urtera, eta zerbitzu horren gehienezko zenbatekoa ere finkatu daiteke kontratu horretan. Kontratu hori partekatu egiten da eta mantenimendu-enpresek eskaintzak egiten dituzte kontratu hori lortzeko. Kontratu Adimendunean ezarritako lehentasunen arabera erabakiko da nori esleitu kontratua. Ondoren, mantenimendu-lanak egitean, Blockchain teknologiak aukera ematen du ordainketa-sistema automatiko bat ezartzeko eta jakiteko nor den lanak egin dituen teknikaria edo zein pieza aldatu dituen.
Konponbide gehiago ere ikusiko ditugu, Blockchain teknologian oinarrituko direnak eta hiritarrei zuzenduko zaizkienak (adibidez, boto elektronikoa edo nortasuna erregistratzeko zerbitzuak), baina teknologiaren iraultza handia industriaren munduan gertatuko da.
Zer esaten dute zuen bezeroek Blockchain konponbideez hitz egiten diezuenean?
Sektorea asko aldatu da. Bezeroek jarrera onez hartzen dituzte aldaketa teknologikoak, batez ere digitalizazioaren arlokoak. Guretzat Blockchain teknologian zentratzea lehiakortasun-abantaila bat da teknologia zaharkituagoa duten enpresen aldean. Industrian Blockchain konponbideak inplementatzen dituen Estatuko enpresa bakanetako bat gara. Bezeroak ez du jakin nahi zertan datzan teknologia edo nola funtzionatzen duen Blockchain-ak, baina jakin nahi du nola balia dezakeen teknologia hori. Azaltzen diozunean, harra sortzen zaio eta Blockchain teknologiari buruz irakurtzen hasten da.
Zeintzuk dira zuen hurrengo erronkak enpresa gisa?
Lau proiektu dauzkagu eskuartean eta garapen horiek bukatu nahi ditugu. 2019ra begira, enpresa gisa hazten jarraitu nahi dugu. Gure helburua Estatuko merkatua da, baina dagoeneko hainbat lan-ildo dauzkagu zabalik Hego Amerikako eta beste herrialde batzuetako bezeroekin. Ez daukagu fakturazio arloko helbururik, gure xede nagusia da enpresei laguntzea digitalizazioaren arlo guztietan gure ezagutza esparrutik abiatuta.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.